ជាកូនសិស្សរបស់លោក ឈិត សារឹម អ្នកប្រដាល់ក្បាច់បុរាណខ្មែរ វង្ស ណយ ដែលត្រូវបានគេទទួលស្គាល់ថា កំពូល​កីឡាករប្រដាល់ដ៏មានសមត្ថភាព ដែលអាចផ្តួលគូប្រកួតឱ្យសន្លប់ជាច្រើនដង បានពោលរៀបរាប់​ពីបញ្ហា​វិស័យ​កីឡាប្រដាល់ និងបញ្ហាជីវភាពរបស់កីឡាករខ្មែរ ដែលធ្វើឱ្យបណ្តាកីឡាករជើងខ្លាំងមួយចំនួន ពិបាកចេញ​ទៅ​ប្រកួតក្រៅប្រទេស។

កីឡាករ វង្ស ណយ ក្នុងឱកាសចេញមកប្រកួត នៅប្រទេសបារាំង។ (រូបថត ហ្វេសប៊ុក)

កីឡាប្រដាល់ - ស្របពេលដែលមានអ្នកស្នេហាកីឡាប្រដាល់មួយចំនួន ចង់ឱ្យកីឡាជើងខ្លាំងរបស់ខ្មែរ ប្រកួត​ជា​មួយកីឡាករជើងខ្លាំងរបស់ថៃ វង្ស ណយ បានប្រៀបធៀបជីវភាពកីឡាករខ្មែរ និងថៃថា ជីវភាពរបស់កីឡាករខ្មែរ និង​ថៃខុសគ្នាដាច់ស្រឡះ៖ «កីឡាករថៃដេកស៊ីស្រួល វ៉ៃម្តងៗបានលុយរាប់ម៉ឺន ហើយយើងមកមើលកីឡាករខ្មែរ ខ្មែរ​យើង​វ៉ៃម្តងៗបាន៣០០ អ្នកខ្លះវាយបានតែ១៥០ទេ អញ្ចឹងបងប្អូនគួរគិតថា តើកីឡាករខ្មែរមានជីវភាពលំបាកយ៉ាង​ណា?»។

កីឡាករដែលមានស្រុកកំណើត នៅស្រុកសាលាក្រៅ ខេត្តប៉ៃលិន រូបនេះបន្តថា ដោយសារតែ កីឡាករខ្លះ​មាន​ជីវភាពខ្វះខាត ក្រោយចេញពីសៃវៀនប្រកួត បានឆ្លៀតពេលទៅរត់កង់បី រត់ម៉ូតូ និងត្រូវបំពេញការងារ​ផ្សេងៗដើម្បី​រកប្រាក់មកផ្គត់ផ្គង់ជីវភាព បន្ថែមលើអាជីពជាអ្នកប្រដាល់។

កីឡាករដែលមកពីក្លឹបកងពលតូចលេខ៣១រូបនេះ បញ្ជាក់ទៀតថា នៅប្រទេសថៃរដ្ឋយកចិត្តទុកដាក់ និងគិតគូរ​ជាខ្លាំង ដល់វិស័យកីឡាប្រដាល់របស់ប្រទេសគេ ប៉ុន្តែសម្រាប់កីឡាប្រដាល់នៅកម្ពុជាវិញ កីឡាករជើងខ្លាំង​រូបនេះ​ចោទ​ជាសំណួរ និងឆ្លើយខ្លួនឯងថា៖ «ម្នាក់ៗតែងគិតថាប្រដាល់ជាមរតករបស់ខ្មែរ ក្បាច់គុណរបស់ខ្មែរ អញ្ចឹងបើជា​ក្បាច់គុណរបស់ខ្មែរ តើមានអ្នកណាដែលចេញមុខ លើកតម្កើនវិស័យកីឡាប្រដាល់ ដូចជាក្បាច់គុនរបស់ខ្មែរយើង​ឬទេ? អញ្ចឹងគ្មានទេ។»

គាំទ្រនឹងការលើកឡើងរបស់ វង្ស ណយ អ្នកប្រើប្រាស់បណ្តាញហ្វេសប៊ុកមួយអង្គ ព្រះសង្ឃ Nou Veasna បានបន្ទរ​ថា៖ «សុំឱ្យរដ្ឋាភិបាលគិតគួរផង សុំកីឡាករទាំងអស់ហ៊ាននិយាយ ហ៊ានថានោះ ទើបកីឡាយើងរីកចម្រើន ទើប​ជីវិត​រស់នៅបានល្អប្រសើររបស់កីឡាករ។ អ្នកណាក៏ដឹងហើយថា នៅផ្ទាំងថ្មប្រាសាទអង្គរវត្ត បានឆ្លាក់ពីក្បាច់​ប្រដាល់​របស់ខ្មែរ រឿងអីដែលខ្មែរត្រូវខ្សោយ? ដោយសារអ្នកណា យើងគួរដឹងហើយ។»

ចំណែក Po Seyla បញ្ចេញយោបល់បន្ថែមថា៖ «ខ្ញុំគាំទ្រសំដីរបស់បង វង្ស ណយ។ នេះបណ្តាលមក​ពីថ្នាក់ដឹកនាំ ឬ ក្រសួងកីឡា ដែលមិនអោយតម្លៃលើវិស័យកីឡា ដូចជាកីឡាបាល់ទាត់ បាល់ទេះ ជាពិសេសគីកីឡាប្រដាល់​នេះ​តែ​ម្តង។ តាមសម្តីរបស់កីឡាករពីរនាក់ ដែលគាត់មកដល់កន្លែងខ្ញុំ គាត់និយាយថា៖ បងអើយកីឡាករស្រុកគេ មុន​ចេញ​រត់ឬហាត់ គេហូបបាយហាងមួយឆ្អែត តែកីឡាករខ្មែរមុនចេញហាត់ ហូបបាយកក មានកម្លាំងណាទៅ​វាយ​ជាមួយ​គេ។»

ដោយមិនចង់ធ្វើការរិះគន់ ដោយគ្មានដំណោះស្រាយនោះ ម្ចាស់គណនីហ្វេសប៊ុកម្នាក់ទៀត LyThean UnLove បាន​លើកជាសំណុំពរឡើងថា៖ «ខ្ញុំសូមអោយក្រសួងដែលពាក់ព័ន្ធ មេត្តាជួយ​លើក​តម្កើនក្បាច់ប្រដាល់ខ្មែរ កុំឲ្យ​ប្រទេស​ណាយករបស់ខ្មែរបន្តរទៀត ហើយក៏សុំអគុណ បងប្រុស វង្ស ណយ ដែល​ចេញមុខមកបកស្រាយ ប្រាប់​បងប្អូន​ជន​រួមជាតិខ្មែរអោយបានដឹង។ តើបងប្អូនដឹងទេថា វិស័យកីឡារនៅ​ស្រុក​យើង​ឈានដល់កំរិតណា? ហើយ​បើ​រដ្ឋាភិបាល​​ដឹងហើយ លឺហើយ តែនៅតែមិនអើរពើរទៀតនោះ យូៗទៅក្បាច់​ប្រដាល់​ខ្មែរ​នឹងទៅជាយ៉ាងណា?»៕

សូមទស្សនាវីដេអូ របស់កីឡាករ វង្ស ណយ ដូចតទៅ៖