លោក អាត់ ធន់ បានអះអាងថា ការចោទប្រកាន់របស់សាលាដំបូងរាជធានីភ្នំពេញ មកលើរូបលោក គ្រាន់តែ​ជា​ចោទ​ប្រកាន់ ដែលចេះស្មានទៅៗ ដោយគ្មានភស្តុតាង ឬមូលដ្ឋានណាមួយឱ្យច្បាស់លាស់នោះទេ។

សាលាដំបូងរាជធានីភ្នំពេញ មើលពីក្រៅ។ (រូបថត MONOROOM.info/ S.Tith)

ប្រព័ន្ធយុត្តិធម៌ - ថ្លែងនៅមុខសាលាដំបូងរាជធានីភ្នំពេញកាលពីរសៀលថ្ងៃទី១៦ ខែមិថុនា ម្សិលម៉ិញនេះ ក្រោយ​ការកោះហៅទៅសាកសួរ របស់សាលាដំបូងរាជធានីភ្នំពេញ ប្រធានសហភាពការងារកម្ពុជា លោក អាត់ ធន់ បាន​បញ្ជាក់ថា ចៅក្រមសាលាដំបូង ដែលបន្តការសាកសួបបន្ថែម មកលើរូបលោកពាក់ព័ន្ធនឹងករណីបណ្តឹងរបស់កម្មករ និងចៅកែរោងចក្រអេសអិល ដែលចោទរូបលោកថា បានញុះញង់ឱ្យមានអំពើហិង្សាកើតឡើង ក្នុងអំឡុងពេល​កម្មករ​ចេញតវ៉ាកាលពីថ្ងៃទី១២ ខែវិច្ឆិកា ឆ្នាំ២០១៣ នៅមុខវត្តស្ទឹងមានជ័យ មិនមានមូលដ្ឋានច្បាស់លាស់ សម្រាប់​ដាក់​បន្ទុកមកលើរូបលោកនោះឡើយ។

លោកបន្តថា តាមសំណួររបស់ចៅក្រម ដែលបានសាកសួរទៅលើ ជនដែលចោទប្រកាន់លោកទាំងចំនួន២ដង សុទ្ធ​តែឆ្លើយខុស។ លើកទី១. បានចោទលោកថា នៅឈរបញ្ជាឱ្យគេឃើញនៅមុខរោងចក្រ ហើយលើកទី២. បានឆ្លើយ​ថាគ្រាន់តែលឺសម្លេង។ ប្រធានសហភាពកាងារកម្ពុជារូបនេះ បញ្ជាក់យ៉ាងដូច្នេះថា៖ «គ្រាន់តែ២លើក ដែលចោទ​ប្រកាន់ខ្ញុំនោះ គឺវាខុសបាត់ទៅហើយ ចៅក្រមគ្មានមូលដ្ឋាគ្រប់គា្រន់ក្នុងការចោទប្រកាន់ ប៉ុន្តែចៅក្រមនៅ​តែបន្ត​សាក​សួរយើង។»

«មួយវិញទៀតការតម្រូវឱ្យយើងបង់លុយ២ពាន់ដុល្លា មើលទៅហាក់បីដូចតុលាការ ចៅក្រមសន្មត់ជាមុនថា យើង​ហ្នឹងមានទោសបាត់ហើយ ហើយបើយើងមើលឧទាហរណ៍ថា បើសិនការកំណត់២ម៉ឺន៥ពាន់ដុល្លា តើយករូបមន្ត​អីមកកំណត់»។ នេះ ជាការបញ្ជាក់បន្ថែមរបស់លោក អាត់ ធន់ ។

លោកបានឱ្យដឹងទៀតថា លោកបានប្តឹងទៅសាលាឧទ្ធរណ៍រួចរាល់ហើយ ដើម្បីឱ្យដកការចោទ ប្រកាន់លើរូបលោក ពិសេស គឺដកសេចក្តីបង្គាប់ដែលតម្រូវឱ្យបង់លុយ និងការបំបិទសិទ្ធិមិនឱ្យមានការជួបជុំ​នៅតាមទី​សាធារណៈ​។ ប៉ុន្តែបើសេចក្តីសម្រចទាំងឡាយណា ដែលមានលក្ខណៈផ្ទុយ ហើយមិនមានការដោះស្រាយឱ្យបានត្រឹមត្រូវ និតិវិធី​បន្តទៀត លោកនឹងស្នើឱ្យមានការអន្តរាគមន៍ ពីអ្នកពាក់ព័ន្ធនៅក្រៅប្រទេស ឬក៏កម្មករ។ ប្រសិនបើចាំបាច់ នឹងមាន​ការប្តឹងទៅក្រុមប្រឹក្សាអង្គចៅក្រម ដើម្បីត្រួតពិនិត្យមើលព្រះរាជ្ញា និងចៅក្រមថាតើគាត់ធ្វើត្រូវទៅតាមនិតិវិធីដែរឬទេ ប្រសិនបើព្រះរាជ្ញា និងចៅក្រមធ្វើមិនត្រឹមត្រូវតាមនិតិវិធី នឹងប្តឹងឱ្យគាត់ពីនិត្យនិតិវិធីនេះឡើងវិញ៕