យ៉ាងហោចណាស់ មានពលករជាតិកម្ពុជា ចំនួនជាង៤៤ម៉ឺននាក់ ដែលបានធ្វើការដោយខុសច្បាប់ នៅប្រទេសថៃ នេះមិនទាន់រាប់បញ្ចូល ចំនួនពលករខុសច្បាប់រ បស់ប្រទេសឡាវ ភូមា និងប្រទេសផ្សេងៗទៀត។ គិតត្រឹមថ្ងៃទី១៦ ខែមិថុនា ឆ្នាំ២០១៤ នេះ ពីក្នុងចំណោមពលករខ្មែរទាំង៤៤ម៉ឺននាក់នោះ មានជាង១៥ម៉ឺននាក់ហើយ ដែលត្រូវរបប​យោធាថ្មីថៃ បញ្ជូនត្រលប់មកប្រទេសកម្ពុជាវិញ។ ហើយចំនួននេះនឹងបន្តកើនឡើង បើយោងតាមលោក​អភិបាល​ខេត្តបន្ទាយមានជ័យលោក គោស៊ុំ សារឿត ដែលបានបញ្ជាក់ប្រាប់ប្រព័ន្ធផ្សព្វផ្សាយក្នុងស្រុក កាលពីពេលថ្មីៗនេះ។

ពលរដ្ឋកម្ពុជានៅក្នុងឡានទ្រុងគ្មានដំបូល ដឹកចេញពីថៃ។ (រូបថតសហការី)

វិស័យការងារ - ការសម្រេចបញ្ជូនពលករខុសច្បាប់បរទេស ចេញពីប្រទេសថៃរាប់សិបម៉ឺននាក់ យ៉ាងគំហុកនេះ ត្រូវ​បាន​របបយោធាថ្មី កំពុងគ្រប់គ្រងប្រទេសថៃ លើកហេតុផលថា ដើម្បីរក្សាសន្តិសុខផ្ទៃក្នុង និងត្រៀម​លក្ខណៈការ​រៀបចំ​ការបោះឆ្នោតជាថ្មី ចាំបាច់ត្រូវបញ្ជូនពលករចេញ។ ប៉ុន្តែយុទ្ធនាការ ដែល​មិនមាន​ការសហការល្អ ជាមួយ​រដ្ឋាភិបាលរបស់ប្រទេសដើមរបស់ពលករនេះ ត្រូវបានអង្គការសិទ្ធិមនុស្សអន្តរជាតិជាច្រើន សម្តែង​ការព្រួយបារម្ភថា បានបំពានលក្ខខណ្ឌមនុស្សធម៌ និងសិទ្ធិរបស់ពលករទាំងនោះ។

លោក យ៉ា ណាវុធ ប្រធានអង្គការការ៉ាមកម្ពុជា ដែលជំនាញក្នុងការជួយជ្រោមជ្រែង និងការពារសិទ្ធិរបស់ពលករ ចំណាកស្រុក បានមើលឃើញថា ចាំបាច់ណាស់ដែលរបបយោធាថៃ ត្រូវបញ្ជូនពលករបរទេសចេញពីប្រទេសថៃ ព្រោះរបបយោធាថៃ ទំនងជាបារម្ភថាពួកពលករបរទេស អាចធ្វើសកម្មភាពជាមួយពួកអាវក្រហម ឬគណបក្សភឿថៃ ជាគូបដិបក្ខរបស់ក្រុមអាវលឿង ឬគណបក្សប្រជាធិបតេយ្យ ដែលមាននិន្នាការនយោបាយស្និទ្ធនឹងក្រុមយោធា និង​ក្រុមព្រះបរមរាជវាំង។

ថ្លែងប្រាប់ទស្សនាវដ្តីមនោរម្យ.អាំងហ្វូនៅថ្ងៃទី១៦ ខែមិថុនា ឆ្នាំ២០១៤ នេះ លោក យ៉ា ណាវុធ បានពន្យល់ថា ការ​ពង្រឹងសណ្តាប់ធ្នាប់សាធារណៈ និងសន្តិសុខផ្ទៃក្នុងប្រទេស ក៏ជាហេតុផលចម្បងតម្រូវ​ឲ្យយោធាថៃ ត្រូវបញ្ជូន​ពលករបរទេសចេញ ដើម្បីផ្តល់ទំនុកចិត្តដល់ពលរដ្ឋខ្លួន និងសហគមន៍អន្តរជាតិ។ ប្រធានអង្គការការ៉ាម​កម្ពុជា បាន​បន្តទៀតថា៖ «បើទោះជារបយោធាថៃ ត្រូវបានព្រះមហាក្សត្រថៃទទួលស្គាល់ក៏ដោយ ក៏នៅតែជារបបយោធា ដែល​មិនទាន់មានរដ្ឋាភិបាលស្របច្បាប់ង្កើតឡើង។»

សម្រាប់លោកសម រង្ស៊ី ប្រធានគណបក្សសង្រ្គោះជាតិវិញ បើទោះជាបានទទូចដល់របបយោធាថៃ អនុគ្រោះដល់​ពលករ​កម្ពុជាក៏មែនពិត ក៏ប្រមុខគណបក្សជំទាស់រូបនេះ បានព្រមានថាប្រទេសថៃគម្បីរក្សាពលរដ្ឋកម្ពុជា ដូច​កម្ពុជា​រក្សា​ពលរដ្ឋថៃ ដែលនៅកម្ពុជា ឲ្យស្របទៅតាមច្បាប់ និងកិច្ចព្រមព្រៀងផ្សេងៗ។ លោកសម រង្ស៊ី បានថ្លែងទៀតថា៖ «ប្រទេស​​ទាំងពីរត្រូវមានទំនាក់ទំនងវែងឆ្ងាយ»។

ចំពោះហេតុផលដែលប្រទេសថៃ បញ្ជូនពលករខុសច្បាប់បរទេសចេញយ៉ាងតក់ក្រហល់ ត្រូវបានលោក សម រង្ស៊ី ពន្យល់ដោយយោងប្រភពពីប្រទេសថៃ ថារបបយោធាថៃចង់បោសសំអាតអំពើពុករលួយ ដែលត្រូវបានឃុបឃិតគ្នា​រវាងនគរបាលថៃ និងថៅកែថៃ សម្រួលដល់ការប្រើប្រាស់ពលករបរទេសខុសច្បាប់។ ប្រភដដែលបន្តថា ក៏អាចពាក់​ព័ន្ធ​ ទៅនឹងករណីនយោបាយសុទ្ធសាធផងដែរ ព្រោះមានការចោទប្រកាន់ថា មានក្រុមនគរបាលខ្លះ គាំទ្រដល់ក្រុម​អាវក្រហម ឬគណបក្សភឿថៃ។

តែនៅលើទំព័រហ្វេសប៊ុកផ្លូវការ របស់លោកសម រង្ស៊ី ប្រធាគណបក្សសង្រ្គោះជាតិ បានបញ្ជាក់នៅថ្ងៃទី១៦ ខែមិថុនា ឆ្នាំ២០១៤ នេះថា៖ «ពេលណាគេ (ពួកយោធា) បោសសម្អាតក្រុមនគរបាលពុករលួយរួច ពេលនោះគេនឹងរៀបចំឲ្យ ពលករជនជាតិបរទេស មកធ្វើការនៅប្រទេសថៃវិញ ពីព្រោះសេដ្ឋកិច្ចនៃប្រទេសថៃ ត្រូវការដាច់ខាតពលករជនជាតិ បរទេស រាប់លាននាក់ ឲ្យមកធ្វើការនៅប្រទេសថៃ។»

រហូតមកដល់ពេលនេះ ដោយសំអាងលើហេតុផលរក្សាចំណងការទូតឲ្យបានល្អ រដ្ឋាភិបាលកម្ពុជាហាក់ដូចជានៅ ប្រកាន់គោលជំហរស្រទន់នៅឡើយ ត្បិតប្រតិកម្មតបត្រឹមទទូចឲ្យរបបយោធាថៃ គម្បីបញ្ជូនពលករខុសច្បាប់កម្ពុជា ត្រលប់មកប្រទេសកម្ពុជាវិញ ផ្អែកតាមគោលការណ៍មនុស្សធម៌ប៉ុណ្ណោះ៕