«ដោយសារពួកយើងចង់បានតម្លៃការងាររបស់ពួកយើង យើងក៏ចង់បានសិទ្ធិសេរីភាពដែរ» នេះជាការទាមទារ របស់​កម្មករិនីបំរើការងារតាមផ្ទះម្នាក់ ដែលបានចូលរួម ក្នុងទិវាអ្នកធ្វើការងារតាមផ្ទះអន្តរជាតិនៅថ្ងៃនេះ ដើម្បី​ទាមទារ​ឱ្យ​រដ្ឋាភិបាលកម្ពុជាអនុម័ត ផ្តល់សច្ចាប័នលើអនុសញ្ញាលេខ១៨៩ ដើម្បីឱ្យពួកគេទទួលបាន ការអនុវត្តសិទ្ធិ​ដូចកម្មករ​ធ្វើការងារក្នុងវិស័យផ្សេងទៀតដែរ។

តំណាងស្ត្រីធ្វើការតាមផ្ទះ។ (រូបថត សហការី)

កម្មករធ្វើការតាមផ្ទះ - នៅព្រឹកថ្ងៃទី១៦ ខែមិថុនា ឆ្នាំ២០១៤នេះ ក្រុមស្រ្តីដែលធ្វើការងារតាមផ្ទះ ក្នុងថ្ងៃទិវាអ្នកធ្វើ​ការងារតាមផ្ទះ​អន្តរជាតិ លើកទីបីក្នុងប្រទេសកម្ពុជា បានដាក់ញត្តិទៅក្រសួងការងារ និង​បណ្តុះបណ្តាល​វិជ្ជាជីវៈ ដើម្បី​ស្វែងរកអន្តរគមន៍​ពី​ក្រសួងមួយនេះ ក្នុងការជម្រុញឱ្យរដ្ឋាភិបាល ផ្តល់សច្ចាប័នទៅលើអនុសញ្ញា​លេខ​១៨៩​របស់អង្គការពលកម្មអន្តរជាតិ ស្តីពីការងារសមរម្យសម្រាប់កម្មករធ្វើការងារតាមផ្ទះ ដូចបណ្តាប្រទេសផ្សេងៗ។

អ្នកស្រី វុន សម្ផស្សប្រធានបណ្តាកម្មករធ្វើការតាមផ្ទះកម្ពុជា បានឱ្យដឹងនៅតាមបណ្តាប្រទេសមួយចំនួន ដូចជា​ហ្វីលីពិន ឥណ្ឌូនេស៊ី ហុងកុង និងអ៊ុយរ៉ាហ្គាយជាដើម គេបានផ្តល់សច្ចាប័ន លើអនុសញ្ញាលេខ១៨៩នេះរួច​រាល់​ហើយ។ អ្នកស្រីបន្តថា នៅបណ្តាប្រទេសដែលគេ ផ្តល់សច្ចាប័នទៅលើអនុសញ្ញានេះ ឃើញថា អ្នកដែលធ្វើការងារ​តាមផ្ទះនៅស្រុកនោះ គេមានលក្ខខណ្ឌការងារសមរម្យ ទាំងម៉ោងការងារ ថ្ងៃឈប់សម្រាក ប្រាក់ថែមម៉ោងក៏គេ​ទទួលបានដូចកម្មករ ក្នុងវិស័យផ្សេងអញ្ចឹងដែរ។ ប៉ុន្តែនៅតែកម្ពុជាទេ ដែលមិនទាន់អនុម័ត​ឱ្យមានការផ្តល់សច្ចាប័ន​លើអនុសញ្ញាលេខ១៨៩ នេះ បើទោះបីជាខាងអង្គការអន្តរការងារ រាល់ថ្ងៃនេះកំពុងជំរុញក៏ដោយ។

អតីតអ្នកបំរើការងារតាមផ្ទះរូបនេះ បានអះអាងថា៖ «ដោយសារតែកន្លងមកពួកខ្ញុំបានដាក់ញត្តិ ទៅក្រសួងការងារ ៤-៥ ដងហើយ ប៉ុន្តែអ្វីដែលខ្ញុំទទួលបាន ត្រឹមតែគាត់និយាយថាដំណាច់ឆ្នាំ ចុងឆ្នាំ២០១៤ហ្នឹង បើសិនជាគាត់អត់​មានយន្តការអី ក៏គាត់មានច្បាប់មួយ ដែលចែងថាអ្នកធ្វើការតាមផ្ទះនឹង មានលក្ខខណ្ឌការងារមួយរម្យមួយផ្នែក ដូច​ថាមានប្រាក់ខែគោលសមរម្យ ដូចកម្មករក្នុងវិស័យផ្សេងៗ»។

អ្នកស្រីបន្តថា ប្រសិនបើការដាក់ញត្តិក្នុងថ្ងៃនេះ មិនមានលទ្ធផលដូចលើកមុនៗ ក្រុមបណ្តាញអ្នកធ្វើការតាមផ្ទះ នឹង​ធ្វើការទាមទារដាក់ញត្តិបន្តទៀត នាថ្ងៃបុណ្យសិទ្ធនារី បុណ្យ១០ធ្នូ និងថ្ងៃ១ឧសភាជាដើម ដើម្បីឱ្យរដ្ឋាភិបាលទទួល​ស្គាល់​ការចូលរួម របស់កម្មករធ្វើការងារតាមផ្ទះក្នុងការអភិវឌ្ឍសេដ្ឋកិច្ចជាតិ និងទទួលបានការអនុវត្តសិទ្ធិរបស់ខ្លួន ដូចកម្មករក្នុងវិស័យផ្សេងទៀត។

ឆាយ សុមិនា អាយុ៣១ ជាអ្នកធ្វើការតាមផ្ទះ បានប្រាប់ថា អ្នកស្រីមួយថ្ងៃត្រូវធ្វើការ១៤ម៉ោង នឹងត្រូវធ្វើការ​ច្រើន​ជំពូក។ កាលពីមុនចូល ធ្វើការដំបូងថៅកែបានដាក់លក្ខខណ្ឌ ត្រឹមតែមើលថែមនុស្សចាស់ទេ ប៉ុន្តែពេលចូល​ទៅដល់ ត្រូវបានគេប្រើឱ្យធ្វើការងារជាច្រើន ដូចជាបោសផ្ទះ ដាំបាយ លាងចានឆ្នាំង និងរ៉ាប់រងការងារក្នុងផ្ទះ​ផ្សេងៗ​ទៀត​ទាំងអស់។

កម្មការិនីបំរើការងារតាមផ្ទះរូបនេះ បញ្ជាក់យ៉ាងដូច្នេះទៀតថា៖ «បើជួបម្ចាស់ផ្ទះស្រួលទៅ គេចាត់ទុកយើងដូចជា​កូនក្មួយអញ្ចឹង ប៉ុន្តែបើម្ចាស់ផ្ទះខ្លះអត់ស្រូលជាមួយយើង វាយឱ្យទៅលិតកំអួត យកឆ្នាំអ៊ុតខោអាវមក​អ៊ុតលើ​យើង។ (..) ខ្ញុំចង់ឱ្យរាជរដ្ឋាភិបាលផ្តល់ (សច្ចាប័នទៅលើ) អនុសញ្ញាលេខ១៨៩ ស្តីពីសិទ្ធិពីការងារសមរម្យ ប្រាក់សមរម្យ​សម្រាប់​កម្មករធ្វើការងារតាមផ្ទះដូចពួកខ្ញុំ ដូចវិស័យផ្សេងៗដែរ។»

តំណាងក្រសួងការងារលោក ក្រួច សុផារី អគ្គលេខាធិការរង គណកម្មការដោះស្រាយបាតុកម្ម និងកូដកម្ម ដែល​បាន​មកទទួលញត្តិដោយផ្ទាល់បានសន្យាថា នឹងពិថារណដើម្បីពីភាក្សាគ្នា ហើយបន្ទាប់ពីការធ្វើការ​សិក្សា ​និងស្រាវ​ជ្រាវ​រួចហើយ និងជូនដំណឹងតាមក្រោយ។ លោកអះអាងយ៉ាងដូច្នេះថា៖ «រឿងទាំងអស់នេះ មកដល់ដៃក្រសួង ក្រសួង​នឹង​ចាត់ការហើយ ជាមួយអង្គភាពពាក់ព័ន្ធមួយចំនួនដូចជាអាយឡូ និងអង្គការសង្គមស៊ីវិលមួយចំនួនទៀត។ ក្រសួង​នឹងមិនប្រងើយកន្តើយទេ។»៕