បន្ទាប់ពីអះអាងយល់ស្របតាមអង្គការពលកម្មអន្តរជាតិ () ថាចំនួនអ្នកគ្មានការងារនៅកម្ពុជាមានចំនួនត្រឹមតែ ០,៣% ប៉ុណ្ណោះ នៅថ្ងៃទី១៣ ខែមិថុនានេះ លោក អ៊ិត សំហេង រដ្ឋមន្ត្រីក្រសួងការងារ របស់ប្រទេសកម្ពុជា បាន​ថ្លែង​ទៅកាន់​ពលករ​-កម្មករដែលត្រូវបានអាជ្ញាធរថៃ ក្រោមរបបគ្រប់គ្រងយោធាថ្មី ចាប់បញ្ជូនមកប្រទេសកម្ពុជាវិញ ថា​កម្ពុជា​កំពុងមានកំណើនទីផ្សារការងារ និងខ្វះពលករ។

រដ្ឋមន្រ្តីក្រសួងការងារកម្ពុជា លោក អ៊ិត សំហេង កាលពីថ្ងៃបុណ្យការងារ ទី១ ខែឧសភា ឆ្នាំ២០១៤។ (រូបថត​ក្រសួង​ការងារ)

ការងារ - រដ្ឋមន្រ្តីក្រសួងការងារកម្ពុជា លោក អ៊ិត សំហេង នៅថ្ងៃទី១៣ ខែមិថុនា ឆ្នាំ២០១៤ នេះបានទទូចដល់​ពលករ​កម្ពុជា គប្បីកុំត្រលប់ទៅធ្វើការដោយខុសច្បាប់ នៅប្រទេសថៃ។ បើតាមលោករដ្ឋមន្រ្តីរូបនេះ បាន​អះអាង​នៅចំពោះមុខ​ពលករ​ចំណាកស្រុកកម្ពុជា នៅច្រកទ្វារអន្តរជាតិប៉ោយប៉ែត ខេត្តបន្ទាយមានជ័យថា ប្រទេសកម្ពុជា​កំពុង​មាន​កំណើន​​សេដ្ឋកិច្ច​ល្អ ដែលជំរុញឲ្យទីផ្សារការងារមានកំណើនជាលំដាប់ និងកំពុងជួបប្រទះវិបត្តិ ខ្វះពលករ និង​កម្មករ។

តែសម្រាប់លោកសម រង្ស៊ី ប្រធានគណបក្សសង្រ្គោះជាតិ បានលើកឡើងថា ប្រទេសកម្ពុជាកំពុងជួប​ប្រទះ​ភាពអត់​ការងារ​ធ្វើយ៉ាងធ្ងន់ធ្ងរ និងប្រាក់ឈ្នួលទាប ដែលជំរុញឲ្យមានវិបត្តិ សេដ្ឋកិច្ច និងសង្គម។ ក្នុងសន្និសីទ​សារព័ត៌មាន ជាមួយពលករខ្មែរចំណាកស្រុក នៅទីស្នាក់ការកណ្តាលគណបក្ស ថ្ងៃទី១៣ ខែមិថុនា ឆ្នាំ២០១៤ នេះ លោក សម រង្ស៊ី ប្រធានគណបក្សជំទាស់កម្ពុជា បានលើកឡើងថា លោកនាយករដ្ឋមន្រ្តីហ៊ុន សែន ត្រូវទទួលស្គាល់ ពី​ភាព​បរាជ័យ និងការមិនទទួលខុសត្រូវ ក្នុងការដឹកនាំនយោបាយសេដ្ឋកិច្ចរបស់រដ្ឋាភិបាលខ្លួន។

ការផ្តល់ដីសម្បទានសេដ្ឋកិច្ចច្រើនហួសហេតុ អំពើពុករលួយ បក្សពួកនិយម និងការគ្មានសមត្ថភាព​គ្រប់គ្រាន់​ក្នុង​ការដឹកនាំនយោបាយសេដ្ឋកិច្ច របស់រដ្ឋាភិបាលលោកនាយករដ្ឋមន្រ្តី ហ៊ុន សែន ត្រូវបានលោក សម រង្ស៊ី ប្រធាន​គណបក្សសង្រ្គោះជាតិវាយតម្លៃថា ជាឬសគល់ នៃភាពអត់ការងារធ្វើនៅកម្ពុជា។ លោកសម រង្ស៊ី បានបញ្ជាក់ថា៖ «សេដ្ឋកិច្ចខ្សោយ យ៉ាប់យឺន ដែលធ្វើឲ្យរាស្រ្តអត់ការងារធ្វើ និងក្រីក្រ បានជំរុញឲ្យគេចំណាកស្រុក ព្រោះគ្មាន​ជម្រើស។»

បើតាមតួលេខក្រៅផ្លូវការ បានឲ្យដឹងថា ពលករខ្មែរធ្វើការដោយខុសច្បាប់នៅក្នុងប្រទេសថៃ អាចមានចំនួន​ក្នុង​ចន្លោះពី១៦ ទៅ២០ម៉ឺននាក់ ខណៈពលករខ្មែរធ្វើការស្របច្បាប់នៅក្នុងប្រទេសថៃ មានចំនួនប្រហាក់ប្រហែល ជិត​៩ម៉ឺននាក់ផ្សេងទៀត។ តែបើយោងតាមអាជ្ញាធរថៃ បានបង្ហាញថា មានពលករខ្មែរ ជាង៨ម៉ឺននាក់ កំពុងធ្វើការ​ខុស​ច្បាប់នៅក្នុងប្រទេសថៃ។

ប្រធានក្រុមប្រឹក្សាយោបល់ផ្នែកវិនិយោគ លោក អឹម ផល្លា បានថ្លែងប្រាប់ទស្សនាវដ្តីមនោរម្យ.អាំងហ្វូ នៅថ្ងៃទី១៣ ខែមិថុនា ឆ្នាំ២០១៤ ថា រដ្ឋាភិបាលពិតជាអង្គសំខាន់ និងត្រូវមានកាតព្វកិច្ច ជួយជ្រោមជ្រែង ផ្តល់ឱកាសការងារ​ដល់ប្រជាពលរដ្ឋគ្រប់រូប តែវាមិនមែនជាបន្ទុករបស់រដ្ឋាភិបាលតែម្នាក់ឯងនោះទេ ព្រោះត្រូវមានការចូលរួម​ពីភាគី​កម្មករនិយោជិត ភាគីនិយោជក និងភាគីពាក់ព័ន្ធផ្សេងទៀត។ ប្រធានក្រុមប្រឹក្សាយោបល់ផ្នែកវិនិយោគ រូបនេះ​បន្ត​ថា ដំណោះស្រាយការងារសម្រាប់ពលករកម្ពុជា គេត្រូវបែងរវាងដំណោះស្រាយការងាររយៈពេលខ្លី និងដំណោះ​ស្រាយការងារ សម្រាប់រយៈពេលវែង។

លោកអឹម ផល្លា  បានលើកឡើងទៀតថា លោកមិនគិតថាទីផ្សារការងារនៅកម្ពុជា ចង្អៀតពេកនោះទេ តែបញ្ហា​នៅ​ត្រង់ថា កម្ពុជាមិនទាន់អាចគ្រប់គ្រងប្រព័ន្ធការងារបានល្អ ហើយការបណ្តុះបណ្តាលជំនាញដល់ពលករ ក៏នៅ​មាន​កម្រិត នៅឡើយ។ លោកអឹម ផល្លា បញ្ជាក់ថា៖ «ក្រុមហ៊ុន គេត្រូវការជំនាញឯកទេស។ (...) ការងារវាមានច្រើន តែ​សំខាន់ថាយើងមានជំនាញគ្រប់គ្រាន់សម្រាប់គេ ឬអត់?»៕