ឆ្លើយតបនឹងយុទ្ធនាការបោសសំអាត កម្មករខុសច្បាប់ នៅប្រទេសថៃ គណបក្សប្រឆាំងកម្ពុជា បានអះអាងថា​នឹង​ធ្វើការស្នើជាផ្លូវការនៅថ្ងៃទី១៣ ខែមិថុនា ឆ្នាំ២០១៤ នេះ ដល់របបយោធាថ្មី កំពុងគ្រប់គ្រងអំណាចនៅប្រទេសថៃ គម្បីអនុគ្រោះដល់ពលករកម្ពុជា ផ្អែកលើគោលការណ៍មនុស្សធម៌។

លោក សម រង្ស៊ី ប្រធានគណបក្សសង្រ្គោះជាតិ នៅថ្ងៃទី១៣ ខែមិថុនា ឆ្នាំ២០១៤។ (រូបថត MONOROOM.info/ U. Bory)

ការងារ- ដោយសំអាងថា ជាថ្នាក់ដឹកនាំគណបក្សនយោបាយ ដែលទទួលបានការគាំទ្រច្រើនពីប្រជាពលរដ្ឋកម្ពុជា លោក សម រង្ស៊ី ប្រធានគណបក្សសង្រ្គោះជាតិ នៅចំពោះមុខពលករកម្ពុជា ដែលទើបបញ្ជូនត្រលប់ពីប្រទេសថៃ បានថ្លែងថាគណបក្សសង្រ្គោះជាតិ នឹងផ្ញើលិខិតជាផ្លូវការទៅកាន់ប្រមុខដឹកនាំយោធាថៃ ដើម្បីសុំការយោគយល់ និងសម្តែងធម៌មេត្តាដល់ពលករចំណាកស្រុកកម្ពុជា។

លោកសម រង្ស៊ី បញ្ជាក់ថា៖ « ថ្ងៃនេះខ្ញុំនឹងសរសេរលិខិតទៅលោកនាយករដ្ឋមន្រ្តីថៃ បា្រយុទ ចាន់អ៊ូចារ ប្រមុខ​ដឹក​នាំយោធាថៃ សុំការយោគយល់។ (...) ប្រទេសថៃ និងកម្ពុជា ជាប្រទេសជាមិត្ត ជនជាតិខ្មែរ និងថៃដូចបងប្អូន បង​ប្អូនកុំធ្វើបាបគ្នា។ ចង់ឲ្យប្រទេសយើងមានទំនាក់ទំនងល្អទៅថ្ងៃក្រោយ ត្រូវចេះគោរពប្រជាពលរដ្ឋ ប្រទេស​មួយ​ទៀតដែលរស់នៅប្រទេសយើង។ជនជាតិថៃនៅប្រទេសយើង យើងក៏ចេះគោរព ចេះមើលខុសត្រូវ។ យើងត្រូវ​ចេះ​ពឹងពាក់គ្នា អនុវត្តគោលការណ៍មនុស្សធម៌។»

ក្នុងឱកាសធ្វើសន្និសីទការសែទ នៅទីស្នាក់ការកណ្តាលគណបក្ស ថ្ងៃទី១៣ ខែមិថុនា ឆ្នាំ២០១៤ នេះ ប្រមុខ​គណបក្ស​ប្រឆាំងកម្ពុជាលោក សម រង្ស៊ី បានឆ្លៀតឱកាសវាយប្រហាររដ្ឋាភិបាលរបស់លោកនាយករដ្ឋមន្រ្តី ហ៊ុន សែន ថាបរាជ័យក្នុងការដឹកនាំវិស័យសេដ្ឋកិច្ចកម្ពុជា ទើបជំរុញឲ្យមានពលករចំណាកស្រុករាប់សែននាក់។ លោក សម រង្ស៊ី បញ្ជាក់ថា៖ «បើពលករមានការងារ គេមិនចាកចេញទេ»។

គិតត្រឹមថ្ងៃនេះ ពលករខុសច្បាប់កម្ពុជារាប់សិបពាន់នាក់ ត្រូវបានសមត្ថកិច្ចថៃ ក្រោមរបបដឹកនាំយោធាថ្មី ដឹចេញ​ពី​ប្រទេសថៃ មកទម្លាក់ចោលនៅព្រំដែនកម្ពុជាថៃ ជាបន្តបន្ទាប់។ កម្មករសំណង់មួយរូបឈ្មោះ កើត ហួន វ័យជាង​៣០​ឆ្នាំ ដែលទើបត្រលប់ពីប្រទេសថៃ មកដល់រាជធានីភ្នំពេញ បាននិយាយប្រាប់ទស្សនាវដ្តី​មនោរម្យ.អាំងហ្វូ​ថា លោក​មិនទាន់ដឹងថាធ្វើអ្វីបន្ត នៅកម្ពុជាទេ។ កម្មករខុសច្បាប់ដដែលនេះ បញ្ជាក់ថា៖ «អត់នៅទេ ចេញមកខ្លួនឯង ខ្លាច​គេ​ចាប់ គេធ្វើបាប។ ខ្ញុំមិនបានឃើញ ការប្រើអំពើហិង្សា តែគេរិតបន្តឹងខ្លាំង។»

ឆ្លើយតបនឹងបញ្ហានេះ រដ្ឋាភិបាលកម្ពុជា ត្រូវគេសង្កេតឃើញថា បានចាត់វិធានការរួចហើយ តាមរយៈលោក អ៊ឹង ស៊ាន ជារដ្ឋលេខាធិការក្រសួងការបរទេសកម្ពុជា ក្នុងជំនួបជាមួយឯកអគ្គរាជទូតថៃប្រចាំកម្ពុជា កាលពីថ្ងៃទី១០ ខែមិថុនា ឆ្នាំ២០១៤ បានស្នើឲ្យភាគីថៃ អនុវត្តការបញ្ជូនពលករខែ្មរ ដែលចូលធ្វើការខុសច្បាប់ក្នុងប្រទេសថៃ មក​កម្ពុជាវិញ តាមគោលការណ៍មនុស្សធម៌។ ជាមួយគ្នានេះប្រមុខរដ្ឋាភិបាលកម្ពុជាលោកនាយករដ្ឋមន្រ្តីហ៊ុន សែន ក៏បានបញ្ជាដល់ក្រសួងការពារជាតិ ចេញរថយន្តយោធា១៥០គ្រឿង ជួយអន្តរាគមន៍ទទួលដឹក ពលករកម្ពុជា​នៅ​ព្រំដែន វិលទៅកាន់ស្រុកំណើតវិញផងដែរ៕