មេបញ្ជាការកងទ័ពអាមេរិក បានទូរស័ព្ទជជែកជាមួយមេទ័ពថៃ លោក ប្រាយុទ ចាន់អ៊ូចារ នៅយប់ថ្ងៃសុក្រនេះ ដើម្បី​ថ្លែងឲ្យវិលត្រឡប់មករក «គោលការណ៍ប្រជាធិបតេយ្យ»វិញ បន្ទាប់ពីការដណ្ដើមកាន់កាប់អំណាច របស់កងទ័ពថៃ ដោយរដ្ឋប្រហារមួយក្នុងប្រទសថៃ កាលពីថ្ងៃព្រហស្បត្តិ៍ទី២២ ខែឧសភា។ ការជួបជជែកនេះ បានធ្វើឡើង​បន្ទាប់​ពី​សហរដ្ឋ​អាមេរិក បានផ្អាកជំនួយលើកដំបូងរបស់ខ្លួនមួយ ដែលមានទឹកប្រាក់ប្រមាណជា ៣,៥លានដុល្លា។

ទាហានកាន់កាំភ្លើងយន្ដ ត្រូវបានដាក់ពង្រាយនៅចំនុចមួយចំនួន ក្នុងរាជធានីបាងកក។ (រូបថត REUTERS)

នយោបាយថៃ - ក្រសួងការបរទេសអាមេរិក ដែលគេស្គាល់ថា ជាមន្ទីរប៉ង់តាហ្គោន នោះ បានថ្លែងអះអាងថា ការ​ទាក់ទងតាមទូរស័ព្ទមួយ បានធ្វើឡើងរវាងអគ្គមេបញ្ជាការកងទ័ពអាមេរិក លោក រ៉េម៉ុង អូឌែនណូ (Raymond Odierno) និងអគ្គមេបញ្ជាការកងទ័ពថៃ លោក ប្រាយុទ ចាន់អ៊ូចារ (Prayuth Chan-o-cha) កាលពីថ្ងៃសុក្រ (វេលា​យប់ បើប្រៀបធៀបម៉ោងក្នុងប្រទេសកម្ពុជា) ។

អ្នកនាំពាក្យរបស់មន្ទីប៉ង់តាហ្គោន លោក ចន គៀប៊ី (John Kirby) បានថ្លែងថា៖ «លោកឧត្ដមសេនីយ៍អាមេរិក បាន​បញ្ជាក់យ៉ាងច្បាស់ថា យើងរងចាំឲ្យបានប្រាកដសិន នូវការវិលត្រឡប់មកវិញ នូវគោលការណ៍ប្រជាធិបតេយ្យ នៅ​ក្នុងប្រទេសថៃ នៅពេលណាមួយដែលឆាប់បំផុត»។

សហរដ្ឋអាមេរិក មានទាហានជើងទឹកចំនួន៧០០នាក់ និងនាវាមួយចំនួន ស្ថិតក្នុងប្រទេសថៃ ដើម្បីអនុវត្តគម្រោង​ធ្វើសមយុទ្ធមួយ ដែលនឹងត្រូវបញ្ចប់នៅថ្ងៃអង្គារខាងមុខ ហើយមិនត្រូវបានលប់ចោលនោះទេ។ តែអ្នកនាំពាក្យ​របស់ក្រសួងការពារជាតិអាមេរិក បានព្រមានទុកថា គេនៅមិនទាន់ដឹង ពីដំណើរការនៃសមយុទ្ធ ដែលកើតក្រោយ​ព្រឹត្តិការណ៍រដ្ឋប្រហារ នឹងមានសភាពបែបណានោះនៅឡើយ។

សហរដ្ឋអាមេរិក បានបរិហារ និងថ្កោលទោស តាំងពីថ្ងៃព្រហស្បត្តិ នូវរដ្ឋប្រហារយោធា នៅក្នុងប្រទេសថៃនេះ ហើយបាននិយាយថា នឹងសើរើឡើងវិញ នូវជំនួយទាំងឡាយ និងចំណងទាក់ទងផ្នែកយោធារបស់ខ្លួន ជាមួយ​នឹងប្រទេសថៃ។

ប៉ុន្តែកាលពីថ្ងៃសុក្រនេះដដែល អ្នកនាំពាក្យក្រសួងការបរទេសអាមេរិក លោកស្រី មែរី ហាហ្វ (Marie Harf) បាន​ប្រកាសថា សហរដ្ឋអាមេរិកបានផ្អាកជំនួយយោធា ប្រមាណជា៣,៥លានដុល្លារ ដែលប្រទេសមហាអំណាច ត្រូវ​ផ្ដល់ទៅឲ្យក្រុងបាងកក ជារៀងរាល់ឆ្នាំ។ លោកស្រី មែរី ហាហ្វ បានថ្លែងបន្តថា សហរដ្ឋអាមេរិក នឹងបន្តពិចារណា​បន្ថែម ទៅលើជំនួយផ្សេងៗទៀត ដែលកាលពីឆ្នាំ២០១៣កន្លងទៅ ជំនួយទាំងនោះមានចំនួនសរុបប្រមាណជា ១០,៥លានដុល្លារ។

មិនត្រឹមតែប៉ុណ្ណោះ អ្នកនាំពាក្យក្រសួងការបរទេសអាមេរិក បានបញ្ជាក់ទៀតថា ទីក្រុងវ៉ាស៊ីតោន នឹងសើរើ​ពិនិត្យ​ឡើងវិញ ពីការប្រើប្រាស់លំអិតពីជំនួយរបស់ខ្លួន ទៅតាមរយៈអង្គការអន្តរជាតិនានា តួយ៉ាងដូចជា អាស៊ាន ថាតើ​ប្រទេសថៃបានទទួលចំនួនប៉ុន្មាន។ ការផ្អាករុះរើ ឬការសើរើឡើងវិញ ពីជំនួយទាំងនេះ ជាការអនុវត្តច្បាប់របស់​សហរដ្ឋអាមេរិក ដែលបានកំណត់ឲ្យប្រទេសមហាអំណាចមួយនេះ ធ្វើទៅកាន់ប្រទេសណាមួយ ដែលរដ្ឋាភិបាល​ដែលចេញពីការបោះឆ្នោត ត្រូវបានទម្លាក់ដោយរដ្ឋប្រហារ៕