បន្ទាប់ពីអាក់ខានមួយរយៈមកនោះ គណបក្សប្រជាជនកម្ពុជា និងគណបក្សសង្រ្គោះជាតិ ទំនងជាផ្តើមចរចា​នយោបាយ​ជាមួយគ្នាជាថ្មី ក្នុងពេលដ៏ខ្លីខាងមុខនេះ ព្រោះមន្រ្តីជាន់ខ្ពស់របស់គណបក្សទាំងពីរ បានព្រលយឲ្យ​ដឹង​ដូចគ្នាថា ពួកគេពិតជាមានឆន្ទៈពិតប្រាកដ ក្នុងការចរចាដើម្បីបញ្ចប់ជម្លោះនយោបាយឲ្យបានឆាប់។

លោក សម រង្ស៊ី (ខាងឆ្វេង) និងលោក ហ៊ុន សែន ចាប់ដៃគ្នានៅមន្ទីរដ្ឋសភាជាតិ ថ្ងៃទី១៧ខែកញ្ញាឆ្នាំ២០១៣។ (រូបថត MONOROOM.info/ O. Vary)

នយោបាយ - មន្រ្តីជាន់ខ្ពស់របស់គណបក្សប្រជាជនកម្ពុជាលោក ស ខេង បានបង្ហើបប្រាប់ក្រុមអ្នកសារព័ត៌មាន​ នៅមន្ទីររដ្ឋសភាជាតិ ថ្ងៃទី២០ ខែឧសភា ឆ្នាំ២០១៤ នេះថា គណបក្សប្រជាជនកម្ពុជា មិនមានហេតុផល​បោះបង់​ការចរចា ជាមួយគណបក្សសង្រ្គោះជាតិនោះទេ។

លោកស ខេង ពន្យល់ថា៖ «ខ្ញុំដឹងតាមសារព័ត៌មានទេ មិនទាន់មានអីជាជាក់លាក់ កំណត់ថា ពេលណា អីពេល​ណាទេ។ ប៉ុន្តែជាជំហររបស់គណបក្សប្រជាជន អត់មានអីប្រែប្រួលទេ។ ជានិច្ចជាកាល ហូរហែមក តែងតែបើកចំហរ និងជជែកពិភាក្សា ប្រកបដោយការទទួលខុសត្រូវ ជាពិសេសទទួលខុសត្រូវ ទៅលើជោគវាសនាប្រទេសជាតិ ហើយ​ក៏ដូចជាម្ចាស់ឆ្នោត។»

ការព្រលយឲ្យដឹង ពីគោលជំហរចរចាដោយមន្រ្តីជាន់ខ្ពស់របស់គណបក្សប្រជាជនរូបនេះ  បានកើតឡើង​តែប៉ុន្មាន​ថ្ងៃប៉ុណ្ណោះ ក្រោយការបង្កើបឲ្យដឹងពីចេតនាផ្តើមចរចាឡើងវិញ ពីសំណាក់លោកសម រង្ស៊ី ប្រធានគណបក្ស​សង្រ្គោះជាតិ។

លោកសម រង្ស៊ី ប្រធានគណបក្សសង្រ្គោះជាតិ បានថ្លែងក្នុងសន្និសីទសារព័ត៌មាន នៅទីស្នាក់ការកណ្តាលគណបក្ស ថ្ងៃទី១៨ ខែឧសភាថា៖ «ដើម្បី ដំណោះស្រាយភាពទាល់ច្រកនយោបាយ យើងនឹងចាត់គណៈប្រតិភូយើង តំណាង​យើងតាមបែបបទសមរម្យ មានទំនាក់ទំនងជាមួយគណបក្សមួយទៀត ដើម្បីរកដំណោះស្រាយមួយ​ឲ្យ​បានយុត្តិធម៌ ស្របតាមឆន្ទៈប្រជារាស្រ្ត។»

ការបង្ហើបឲ្យដឹងពីចេតនាផ្តើមចរចាឡើងវិញ រវាងគណបក្សសង្រ្គោះជាតិ និងគណបក្សប្រជាជនកម្ពុជា ដោយមិន​បានកំណត់កាលបរិច្ឆេទច្បាស់លាស់ ត្រូវបានលោក គល់ បញ្ញា នាយកប្រតិបត្តិ គណៈកម្មាធិការដើម្បីការបោះឆ្នោត​ដោយសេរី និងយុត្តិធម៌នៅកម្ពុជា អត្ថាធិប្បាយប្រាប់ទស្សនាវដ្តីមនោរម្យ.អាំងហ្វូនៅថ្ងៃទី២០ ខែឧសភា នេះថា៖ «គណបក្សទាំងពីរ អាចជជែកគ្នាបន្ត។ (...) ហើយពួកគេអាចរកដំណោះស្រាយផ្សេងទៀត ទាំងការកែទម្រង់​ការបោះ​ឆ្នោត និងបញ្ហានយោបាយ៕»