ជាថ្មីម្តងទៀតគណបក្សសង្រ្គោះជាតិ ដែលជាគណបក្សជំទាស់បានបង្ហាញចេតនា បន្តចរចានយោបាយជាមួយ​គណបក្សប្រជាជនកម្ពុជា ដើម្បីដោះស្រាយភាពជាប់គាំងផ្នែកនយោបាយ ដែលបានអូសបន្លាយតាំងពី​ក្រោយការ​បោះឆ្នោតជ្រើសតាំងតំណាងរាស្រ្តឆ្នាំ២០១៣។

លោក សម រង្ស៊ី និងលោក កឹម សុខា ធ្វើសន្និសីទសារព័ត៌មាន នៅស្នាក់ការកណ្ដាលបក្សសង្គ្រោះជាតិ ថ្ងៃទី០១ ខែឧសភា ឆ្នាំ២០១៤។ (រូបថត MONOROOM.info/ S. Tith)

នយោបាយ -លោកសម រង្ស៊ី ប្រធានគណបក្សសង្រ្គោះជាតិ បានថ្លែងក្នុងសន្និសីទសារព័ត៌មាន នៅទីស្នាក់ការ​កណ្តាលគណបក្ស ថ្ងៃទី១៨ ខែឧសភា ថារហូតមកដល់ពេលនេះ គណបក្សសង្រ្គោះជាតិ បានរក្សាបំណង​ចរចា​ជាមួយគណបក្សប្រជាជនកម្ពុជា តែដោយសារជាប់រវល់ ក្នុងដំណើរការបោះឆ្នោតជ្រើសរើស​ក្រុមប្រឹក្សារាជធានី​-ខេត្ត និងក្រុង-ស្រុក-ខណ្ឌ ទើបបណ្តាលឲ្យមានការអូសបន្លាយពេល។

ក្នុងឱកាសនោះប្រមុខគណបក្សជំទាស់ដែលនេះបញ្ជាក់ថា៖ «ចាប់ពីស្អែកនេះទៅ យើងមានពេលទំនេរដើម្បីគិតគូរ ពីដំណោះស្រាយភាពទាល់ច្រកនយោបាយ យើងនឹងចាត់គណៈប្រតិភូយើង តំណាងយើងតាមបែបបទសមរម្យ ដើម្បីមានទំនាក់ទំនងជាមួយគណបក្សមួយទៀត ដើម្បីរកដំណោះស្រាយមួយឲ្យបានយុត្តិធម៌ ស្របតាមឆន្ទៈ​ប្រជា​រាស្រ្ត។»

ចំពោះការអះអាងពីបំណងចរចាជាមួយគណបក្សប្រជាជនកម្ពុជាជាថ្មី ដោយគណបក្សសង្រ្គោះជាតិនេះ ទស្សនាវដ្តី​មនោរម្យ.អាំងហ្វូ មិនអាចទាក់ទងមន្រ្តីជាន់ខ្ពស់របស់គណបក្សប្រជាជនកម្ពុជាណាម្នាក់ ដើម្បីធ្វើសេចក្តី​អត្ថាធិប្បាយបាននៅឡើយ។

លោក ហ៊ុន សែន ជាអនុប្រធានគណបក្សប្រជាជនកម្ពុជា កាលពីចុងខែមេសា ធ្លាប់បានចោទប្រកាន់គណបក្ស​សង្រ្គោះជាតិថា គណបក្សនេះគ្មានឯកភាពផ្ទៃក្នុងរបស់គណបក្ស ហើយក៏គ្មានឆន្ទៈពិតប្រាកដ ដើម្បីចរចាបញ្ចប់​ជម្លោះនយោបាយដូចគណបក្សប្រជាជនកម្ពុជារបស់លោកនោះទេ។

លោកនាយករដ្ឋមន្ត្រី ហ៊ុន សែណ បានអះអាងបន្តថា រដ្ឋាភិបាលគ្រប់គ្រង​ដោយគណបក្សប្រជាជនកម្ពុជា ក្នុង​អាណត្តិទីប្រាំនេះ កំពុងដំណើរការទៅមុខជាប្រក្រតី ហើយគណបកប្រជាជនកម្ពុជា ក៏មិនខ្វល់ខ្វាយ នឹងការចរចា​នយោបាយជាថ្មី ជាមួយគណបក្សសង្រ្គោះជាតិ នោះដែរ។

ប៉ុន្តែបើទោះជាលោក ហ៊ុន សែន បានអះអាងពីការមិនខ្វល់ខ្វាយយ៉ាងណាក៏ដោយ ក៏គេនៅតែកត់សម្គាល់ឃើញថា លោក ស ខេង និងលោក ជាម យៀប ជាមន្រ្តីជាន់ខ្ពស់របស់គណបក្សប្រជាជនកម្ពុជា ជាបន្ទបន្ទាប់ បានថ្លែងប្រាប់​ប្រព័ន្ធព័ត៌មានក្នុងស្រុកថា គណបក្សប្រជាជនកម្ពុជា មិនបានបោះបង់ការបន្តចរចាជាមួយគណបក្សសង្រ្គោះជាតិ នោះទេ តែបានព្រមានថាគណបក្សសង្រ្គោះជាតិ គម្បីប្រុងប្រយ័ត្ន ពីគោលជំហរចរចា៕