លោកប្រធានាធិបតីចិន ស៊ី ជិនភីង បានទទួលជួបលោក ហ៊ុន សែន នាយករដ្ឋមន្ត្រីកម្ពុជា នៅទីក្រុងសៀងហៃ ប្រទេស​ចិន ហើយបានថ្លែងស្វាគមន៍ អំពីចំណងមេត្រីភាពរវាងប្រទេសទាំងពីរ ដែលរហូតមកដល់ពេលនេះ កាន់តែ​មានភាពស្អិតរមួតខ្លាំងឡើង។ ទន្ទឹមនឹងនេះ លោក ស៊ី ជិនភីង ថែមទាំងបានសន្យាគាំទ្រការខិតខំរបស់កម្ពុជា ក្នុង​ការថែរក្សាសន្តិសុខសណ្ដាប់ធ្នាប់ និងស្ថិរភាពជាតិនោះថែមទៀត។

លោក ហ៊ុន សែន និងលោក ស៊ី ជីនភីង ក្នុងជំនួបទល់មុខគ្នា នៅទីក្រុងសៀហៃ ថ្ងៃទី១៩ ខែឧសភា ឆ្នាំ២០១៤។ (រូបថត Xinhua)

កម្ពុជាចិន - នៅក្នុងឱកាសនៃការអញ្ជើញចូលរួម ក្នុងជំនួបកំពូលលើកទី៤ នៃសន្និសីទនៅទីក្រុង​សៀងហៃប្រទេស​ចិន លោកនាយករដ្ឋមន្ត្រី ហ៊ុន សែន ត្រូវបានលោកស៊ី ជីនភីង ប្រធានាធិបតីចិន អនុញ្ញាតឲ្យចូលជួបពិភាក្សា ដើម្បី​ពង្រឹកចំណងមេត្រីភាពចាក់ទឹកមិនលេច របស់ប្រទេសទាំងពីរ។ ក្នុងឱកាសនោះ លោកប្រធានាធិបតីចិន បាន​សន្យាគាំទ្រកិច្ចខិតខំប្រឹងប្រែង របស់ប្រទេសកម្ពុជា​ ក្នុងការថែរក្សាសន្តិសុខ សណ្ដាប់ធ្នាប់ និងស្ថិរភាពជាតិរបស់ខ្លួន ព្រមទាំងបន្តជួយជំរុញ ការអភិវឌ្ឍន៍សេដ្ឋកិច្ច និងសង្គម នៅក្នុងប្រទេសនេះថែមទៀត។

លោកប្រធានាធិបតី ស៊ី បានអំពាវនាវឲ្យជំរុញកាន់តែខ្លាំងឡើង នូវកិច្ចសហប្រតិបត្តិការទ្វេភាគី នៅលើវិស័យ​កសិកម្ម និងទេសចរណ៍ ក៏ដូចជានៅក្នុងគំរោងវារីអគ្គិសនី ធ្យូងថ្ម និងតំបន់សេដ្ឋកិច្ចពិសេសនៅកម្ពុជាជាដើម។ លោកបានសន្យាទៀតថា នឹងជួយសម្រួលការដ្ឋានសាងសង់ ខ្សែក្រវាត់សេដ្ឋកិច្ច ដែលសុទ្ធសឹងជា​ហេដ្ឋារចនា​សម្ព័ន្ធ និងដង្ហើមសេដ្ឋកិច្ច ទាំងនៅលើគោក ទាំងនៅតាមផ្លូវទឹក ឲ្យកម្ពុជានោះថែមទៀត។

ពាក្យសម្ដីថ្លែងរបស់លោកប្រធានាធិបតីចិន ជាមួយនាយករដ្ឋមន្ត្រីកម្ពុជា បានបង្កើតភាពកក់ក្ដៅកាន់តែខ្លាំង សម្រាប់​លោក ហ៊ុន សែន បន្ទាប់ពីភាពជាប់គាំងផ្នែកនយោបាយ បានកើតឡើងក្នុងប្រទេសកម្ពុជា យ៉ាងចម្រូង​ចម្រាស។

ប៉ុន្តែការគាំទ្ររបស់ប្រធានាធិបតីចិន ក៏បានធ្វើឡើងចំពេលដែលប្រទេសចិន កំពុងមើលមុខគ្នាមិនចំ ជាមួយនឹង​ប្រទេសវៀតណាម ដែលជាមិត្តម៉ឺនឆ្នាំរបស់កម្ពុជា  ជុំវិញជម្លោះដែនសមុទ្រ​ក្នុង​សមុទ្រចិនខាងត្បូង និងអំពើហិង្សា​ប្រឆាំងចិន នៅក្នុងប្រទសវៀតណាមកាលពីពេលថ្មីៗនេះ។ កុបកម្មហិង្សា​ប្រឆាំងចិន ដែលបានកើតឡើង​យ៉ាង​កក្រើក នៅប្រទេសវៀតណាម បានធ្វើឲ្យមនុស្សស្លាប់ និងរបួសជាច្រើននាក់ និងបណ្ដាលឲ្យជនជាតិចិន​ច្រើនជាង​១ពាន់នាក់ រត់ភៀសខ្លួនមកសុំជ្រកកោន នៅក្នុងប្រទេសកម្ពុជា។

ជម្លោះដែនទឹកក្នុងសមុទ្រចិនខាងត្បូង បានធ្វើឲ្យប្រទេសចិនត្រូវប្រឈមនឹងប្រទេសជាច្រើនទៀត នៅក្នុងសមាគម​ប្រជាជាតិនៅអាស៊ីអាគ្នេយ៍ ហៅកាត់ថា អាស៊ាន។ ដូច្នជាការចាំបាច់ ដែលចិនត្រូវការការគាំទ្រ ពីប្រទេសដែលជា​សមាជិករបស់សមាគមមួយនេះ។

នៅក្នុងជំនួបដដែល លោក ហ៊ុន សែន បានបញ្ជាក់តបទៅប្រធានាធិបតីចិនវិញជាអាថ៌ ថាកម្ពុជានឹងបន្តដើរតួរ​ប្រកប​ដោយស្ថាបនា ដើម្បីពង្រឹង​ចំណងទាក់ទងរវាងចិន និងអាស៊ាន។ ជាពិសេសប្រទេសកម្ពុជា នឹងធ្វើការជាមួយចិន ដើម្បីឲ្យជំនួបកំពូលនៅទីក្រុងសៀងហៃ ទទួលបានជោគជ័យ។

សូមបញ្ជាក់ថា លោក ហ៊ុន សែន បានធ្វើដំណើរទៅកាន់ប្រទេសចិន តាំងពីថ្ងៃទី១៨ ខែឧសភានេះ ដើម្បីចូលរួម​ក្នុងសន្និសីទកំពូលលើកទី៤ ស្ដីពី កាបង្កើន និង​បង្កើតវិធានការនៃភាពទុកចិត្តគ្នា នៅទ្វីបអាស៊ី​ ហៅកាត់ជាភាសា​អង់គ្លេសថា CICA ដែលប្រព្រឹត្តិទៅពីថ្ងៃអង្គារទី២០ ដល់ថ្ងៃពុធទី២១ ខែឧសភា នៅក្នុងទីក្រុងសៀងហៃ ប្រទេស​ចិន។ លោក ហ៊ុន សែន គ្រោងនឹងធ្វើមាតុភូមិនិវត្តន៍វិញ នៅថ្ងៃទី២៥ ខែឧសភាខាងមុខ៕