ការវះកាត់ ជាក្តីព្រួយបារម្ភ និងស្មុគស្មាញមួយ ដែលពិបាកប្រឈមមុខរបស់អ្នកជំងឺមួយចំនួន ព្រមទាំងទាមទារឲ្យ​គ្រូពេទ្យជាអ្នកមានជំនាញពិតប្រាកដ និងច្បាស់លាស់ ដើម្បីធ្វើឲ្យការវះកាត់នេះប្រកបដោយជោគជ័យ។ ដើម្បី​ជៀសវាងហានិភ័យទាំងឡាយ ដែលអាចកើតឡើងជុំវិញការវះកាត់នេះ អ្នកជំងឺគួរតែចំណាយ​ពេលវេលាមួយ​គួរ​សម ធ្វើការសាកសួរគ្រូពេទ្យ ឬអ្នកជំនាញផ្នែកជំងឺ ដើម្បីឲ្យអ្នកជំងឺទុកចិត្តឲ្យបានច្បាស់លាស់ ព្រមទាំងកុំឲ្យ​មាន​វិប្បដិសារី នាពេលខាងមុខ។

ក្រុមគ្រូពេទ្យកំពុងធ្វើការវះកាត់។ (រូបថត ឯកសារ)

សុខភាព - ខាងក្រោមនេះ ជាសំនួនសំខាន់ៗចំនួន៥ ដែលអ្នកគួរតែធ្វើការសាកសួរដល់គ្រូពេទ្យ ឬអ្នកជំនាញ​របស់​អ្នកជាមុនសិន មុននឹងធ្វើការវះកាត់។

១. តើអ្នក«ចាំបាច់» ត្រូវតែធ្វើការវះកាត់?

មុនដំបូង អ្នកត្រូវដឹងថា តើជំងឺរបស់អ្នកចាំបាច់ត្រូវតែធ្វើការវះកាត់ ដោយខានមិនបាន ឬយ៉ាងណា? តើអ្នកអាច​ស្វែង​រកជំរើសផ្សេងទៀត ដែលអាចបញ្ចៀសការវះកាត់បានឬទេ? អ្នកត្រូវដឹងថា តើរាល់វិធីសាស្រ្តនីមួយៗ វានឹង​ផ្សាភ្ជាប់នូវគុណសម្បត្តិ និងគុណវិបត្តិអ្វីខ្លះ? តើខាងមន្ទីរវះកាត់ មាននីតិវិធី និងការធានារ៉ាប់រងអ្វីខ្លះ? អ្នកក៏អាច​ប្រើប្រាស់ប្រព័ន្ធអ៊ីនធឺណេត ដើម្បីស្វែងរកចម្លើយពីបញ្ហាទាំងនេះដែរ ព្រោះជួនកាលគ្រូពេទ្យ​របស់អ្នកអាច​កុហក​អ្នក ប៉ុន្តែបណ្តាញពត៌មានតាមអ៊ីនធឺណេតមួយចំនួន អាចប្រាប់ការពិត ឬចម្លើយដ៏ត្រឹមត្រូវមួយចំនួន ជុំវិញបញ្ហា​វះកាត់នេះ និងមធ្យោយបាយថ្មី ដើម្បីដោះស្រាយ។

២. ប្រវត្តិនិងបទពិសោធន៏នៃទីកន្លែង ដែលអ្នកនឹងត្រូវឲ្យធ្វើការវះកាត់ ទាក់ទងនឹងប្រភេទជំងឺអ្នក

បន្ទាប់ពីអ្នកបានដឹងថា អ្នកពិតជាត្រូវធ្វើការវះកាត់ដោយខានមិនបាននោះ អ្នកត្រូវគិតពីប្រវត្តិទីកន្លែង បទពិសោធន៏ និងក្តីរំពឹងចេញពីទីកន្លែងដែលធ្វើការវះកាត់។ អ្នកត្រូវរាប់បញ្ចូល ទាំងបុគ្គលិកលក្ខណៈរបស់មន្ទីពេទ្យ និង​គ្រូពេទ្យ​នៅទីនោះ ទៅតាមលក្ខខណ្ឌមួយចំនួនដូចជា៖

តើពួកគេមានបទពិសោធន៏ច្បាស់លាស់ឬទេ ទាក់ទងនឹងប្រភេទជំងឺ របស់អ្នក? តើមានតែមន្ទីពេទ្យមួយនេះឬ ដែល​មានជំនាញខាងជំងឺរបស់អ្នក?  ឬមានជម្រើសមន្ទីពេទ្យជាច្រើនទៀត ដែលអ្នកអាចជ្រើសរើសបាន? តើអាចមាន​មជ្ឃមណ្ឌលវះកាត់ ឬកន្លែងពិគ្រោះជំងឺត្រឹមត្រូវដែរឬទេ? បើសិនអ្នក​មាន​កូនជាអ្នកជំងឺវិញ តើមន្ទីពេទ្យនោះ មាន​បទពិសោធន៏ច្បាស់លាស់ឬទេ? ហើយធ្លាប់បានធ្វើការវះកាត់កុមារ ក្នុងអាយុស្របាលគ្នានោះ ដោយជោគជ័យដែរ ឬទេ?

ជាពិសេសទៅទៀត អ្នកគួរតែទាក់ទងក្រុមហ៊ុនធនារ៉ាប់រងអាយុជីវិតរបស់អ្នក ឲ្យធ្វើការកំណត់កាន់តែច្បាស់ទៀត ទៅកាន់មន្ទីពេទ្យនោះ ដើម្បីសម្រួលដល់ការចំណាយ ឬធ្វើទំនាក់ទំនងនីតិវិធីផ្សេងៗទៀត ក្នុងន័យធានាសុវត្តិភាព​ដល់​រូបអ្នក ឬកូនរបស់អ្នក នៅពេលវះកាត់។

៣. តើអ្នកត្រូវត្រៀមទាំងផ្លូវចិត្ត និងផ្លូវកាយបែបណា ជុំវិញការវះកាត់?

ការរៀបចំទាំងផ្លូវកាយ និងផ្លូវចិត្តជុំវិញការវះកាត់ ពិតជាមានសារៈសំខាន់ណាស់ សម្រាប់ការវះកាត់ជាលក្ខណៈ​ឯកជននេះ។ សម្រាប់មនុស្សខ្លះ ការរៀបចំបន្តិចបន្តួច គឺពិតជាមានភាពចំបាច់ខ្លាំងណាស់ ជាពិសេសការចចារ ឬ​ពិភាក្សារាល់ការព្រួយបារម្ភជាមួយវេជ្ជបណ្ឌិត និងអ្នកជំនាញ ទាំងនោះជាមុនសិន ដើម្បីឲ្យដំណើរការនៃ​ការវះកាត់​ប្រកបដោយភាពប្រយ័ត្នប្រយែង យកចិត្តទុកដាក់។ ចំណែកផ្លូវចិត្តវិញ អ្នកក៏ត្រូវត្រៀមឲ្យបានជាក់លាក់ដែរ អ្នកគួរ​តែត្រៀម និងរៀបចំទុកដាក់មុន ដូចជារយៈពេលនៃការនៅផ្ទះ និងជំនួញជួញដូរ ការមើលថែរក្សាអ្នក ឬករណីអ្នក​បានស្លាប់ នៅក្នុងពេល ឬក្រោយការវះកាត់។

៤. ការជ្រើសរើសប្រភេទថ្នាំសន្លប់

ការប្រើប្រាស់ថ្នាំសន្លប់ ត្រូវបានមនុស្សជាច្រើន ចាត់ទុកថា វាមានជាប់ទាក់ទងយ៉ាងជិតស្និតបំផុត ទាក់ទងនឹង​ការ​វះកាត់។ អ្នកត្រូវតែសួរទៅកាន់គ្រូពេទ្យរបស់អ្នក អំពីភាពខុសប្លែកគ្នា នៃប្រភេទថ្នាំសន្លប់។ ការវះកាត់ខ្លះត្រូវ​ការ​ប្រភេទថ្នាំសន្លប់មានលក្ខណៈពិសេស ប៉ុន្តែអ្នកត្រូវតែដឹងពីវាឲ្យបានច្បាស់ ដើម្បីជ្រើសរើសប្រភេទថ្នាំ ដែលសម​ល្មមនឹង​សុខភាពរបស់អ្នក។ ដូចគ្នានេះដែរ អ្នកត្រូវតែប្រាកដថា អ្នកដឹងពីពេលវេលានៃជាតិសន្លប់របស់ថ្នាំ ហនិភ័យ និងអត្ថប្រយោជន៏របស់វា។ ការចាប់ផ្តើមពីការព្រួយបារម្ភ ពីហនិភ័យនៃថ្នាំសន្លប់ជារឿងធម្មតាមួយ ដើម្បីកាត់បន្ថយ​ការភ័យខ្លាចដែលកើតមាន ព្រោះការប្រើប្រាស់ថ្នាំសន្លប់ សម្រាប់ជួយឲ្យមនុស្សភ្ញាក់ក្រោយពីដេក មិនមែនសម្រាប់​គេងទៅរហូតទេ។

៥. តើមានគុណវិបត្តិអ្វីខ្លះ ដែលកើតមានក្រោយពីការវះកាត់?

ផលវិបាកកើតមាន ក្រោយពីការវះកាត់ គឺមិនអាចជៀសផុតបានឡើយ ប៉ុន្តែអ្នកអាចកាត់បន្ថយហនិភ័យ​ តាមរយៈ​ការធ្វើតាមសេចក្តីណែនាំរបស់គ្រូពេទ្យ និងការថែរក្សាសុខភាពរបស់អ្នក ដោយនៅសម្រាកនៅក្នុង​មន្ទីរពេទ្យ ដែល​អ្នកបានវះកាត់។ អ្នកអាចប្រាប់មនុស្សជាទីស្រឡាញ់របស់អ្នក ឲ្យបានដឹងមុន ដើម្បីបង្កាបញ្ហាទាំងឡាយដែលអាច​កើតមាន កំឡុងពេលសម្រាកព្យាបាលបន្ទាប់ពីវះកាត់រួច៕