ប្រទេសអូស្ត្រាលី នឹងធ្វើជាម្ចាស់ផ្ទះ នៅក្នុងសប្ដាហ៍ខាងមុខនេះ នូវអ្នកទទួលខុសត្រូវជនជាតិចិន និងជាតិម៉ាឡេស៊ី ដើម្បីកំណត់ពីគោលការណ៍នាពេលអនាគត នៅក្នុងការរុករកយន្ដហោះប៊ូអីង នៃជើងហោះហើរ MH370 ដែលបាន​បាត់ខ្លួនតាំងពីថ្ងៃទី៨ ខែមីនាកន្លងទៅ។ នេះជាការផ្លាស់ប្ដូរទៅរកយុទ្ធសាស្ត្រ​ថ្មីទៀត ក្រោយពីបានរុករក​នៅផ្ទៃ​មហាសមុទ្រឥណ្ឌាខាងត្បូង មិនបានទទួលលទ្ធផលនោះមក និងត្រូវបានប្រកាសឲ្យដឹងកាលពីរសៀលថ្ងៃសុក្រ ដោយអ្នកទទួលខុសត្រូវក្នុងសំនុំរឿង ជាតិម៉ាឡេស៊ី។

ក្រុមហ៊ុនអាកាសចរណ៍ ម៉ាឡេស៊ីអ៊ែរឡាញ នៅព្រលានយន្ដហោះអន្តរជាតិ កូឡាឡំពួរ។ (រូបថត Reuters)

បាត់យន្ដហោះ - កិច្ចប្រជុំនៅទីក្រុងកង់បេរ៉ា (Canberra) មានទិសដៅក្នុងការរៀបចំ«ជំហានថ្មី» សម្រាប់​យុទ្ធនាការ​រុករក នៅក្នុងមហាសមុទ្រឥណ្ឌាខាងត្បូង ទីកន្លែងដែលគេជឿថា យន្ដហោះប៊ូអីង៧៧៧ បានធ្លាក់ បន្ទាប់ពី​យន្ដហោះ​នេះ បានភ្ជាប់ជើងហោះហើរលេខ MH370 ពីរដ្ឋធានីកូឡាឡំពួរ ប្រទេសម៉ាឡេស៊ី ទៅកាន់រដ្ឋធានីប៉េកាំង ប្រទេស​ចិន កាលពីព្រឹកព្រហាមថ្ងៃទី៨ ខែមីនាកន្លងទៅ។ យន្ដហោះបានបាត់ខ្លួនពីកញ្ចក់ប្រព័ន្ធរលកអាកាស នៅ​មួយម៉ោង​ក្រោយពីបានបង្ហើបខ្លួនពីដី ជាមួយនឹងមនុស្ស២៣៩នាក់ នៅលើយន្ដហោះ។

រដ្ឋាភិបាលរបស់ប្រទេសម៉ាឡេស៊ី បានតែងតាំងអតីតអ្នកទទួលខុសត្រូវ របស់អាកាសចរណ៍ស៊ីវិលរបស់ខ្លួនម្នាក់ ដើម្បីមកដឹកនាំគណកម្មការមួយ ដែលមានការចូលរួមពីមន្ត្រីជំនាញបរទេសជាច្រើននាក់។ អាជ្ញាធររ​បស់​ប្រទេស​នេះ ក៏បានសុំយោបល់ផងដែរ ពីលោក ហ្សង់ប៉ូល ត្រូអាដេក (Jean-Paul Troadec) អតីតប្រធានមជ្ឈមណ្ឌល​ស៊ើប​អង្កេត និងវិភាគបារាំង (BEA) ដែលបានអង្កេតទៅលើគ្រោះថ្នាក់យន្ដហោះអ៊ែប៊ូស របស់ក្រុមហ៊ុន​អាកាស​ចរណ៍​អ៊ែរហ្វ្រង់ (Air France) នៃជើងហោះហើរលេខ447 ពីទីក្រុងរីយ៉ូប្រទេសប្រេស៊ីល មករដ្ឋធានីប៉ារីសប្រទេសបារាំង ដែលបាន​បាត់ខ្លួននៅលើមហាសមុទ្រអាត្លង់ទីក កាលពីខែមិថុនាឆ្នាំ២០០៩។

ប្រទេសចំនួនប្រាំបី បានចូលរួមរុករុកយន្ដហោះប៊ូអីង របស់ក្រុមហ៊ុនម៉ាឡេស៊ីអែរឡាញ នៅក្នុងមហាសមុទ្រឥណ្ឌា នៅក្នុងក្ដីសង្ឃឹមថានឹងអាចរកឃើញតួយន្ដហោះ ដែលបានធ្លាក់ចូលទៅក្នុងសមុទ្រ។ យុទ្ធនាការរុករកនេះ បាន​ចាប់ផ្ដើមតាំងពីថ្ងៃទី១៨ ខែមីនានោះមក បានគ្របដណ្ដប់ទៅលើផ្ទៃក្រឡារុករក ធំជាង៤,៥លានគីឡូម៉ែត្រក្រឡា។ ប៉ុន្តែយុទ្ធនាការនេះ ត្រូវបានប្រកាសបិទបញ្ចប់ជាផ្លូវការ ក្នុងសប្ដាហ៍នេះ។ ក្រុមអ្នករុករកបាននិយាយថា អ្វីដែល​គេ​ត្រូវធ្វើពីពេលនេះតទៅ គឺត្រូវស្វែងរកតួយន្ដហោះ នៅក្នុងទឹកក្រោមសមុទ្រវិញ។

សម្រាប់ក្រុមគ្រួសារនៃអ្នកដំណើរនៅលើយន្ដហោះនេះវិញ ការក្ដៅក្រហាយបានកើនឡើង បន្ទាប់ពីពួកគេត្រូវបាន​បញ្ជាឲ្យចាកចេញ ក្នុងថ្ងៃតែមួយ ពីសណ្ឋាគារនារដ្ឋធានីប៉េកាំង។ ពួកគេបានមកស្នាក់នៅក្នុងសណ្ឋាគារនេះ តាំង​ពីជិតពីរខែមកហើយ នៅក្នុងបន្ទុកចំណាយនៃការស្នាក់នៅ របស់ក្រុមហ៊ុនអាកាសចរណ៍​ម៉ាឡេស៊ី​អ៊ែរឡាញ៕

------------------------------------
ដោយ សេក មនោរកុមារ (ទំនាក់ទំនង៖ [email protected]) - ប៉ារីស​ ថ្ងៃទី០២ ឧសភា ២០១៤