គ្រួសារថាអ្នកការសែតកាណាដាស្លាប់ បន្ទាប់ពីរកឃើញសពនៅអង្គរ
គ្រួសាររបស់ លោក ដេវីឌ វ៉លឃ័រ (David Walker) ហៅ ដេវ ដែលបានបាត់ខ្លួនតាំងពីខែកុម្ភៈមក នៅក្នុងខេត្តសៀមរាប ប្រទេសកម្ពុជានោះ បានប្រកាសនៅថ្ងៃព្រហស្បត្ត៍នេះថា ពួកគេបានរកឃើញ សាកសពរបស់អ្នកសារព័ត៌មាន និងជាសមិទ្ធិករភាពយន្ដជាតិកាណាដារូបនេះ ស្លាប់នៅក្នុងតំបន់អង្គរ ក្បែរនឹងក្រុងសៀមរាប។
លោក ដេវ វ័លឃ័រ នៅពេលលោកនៅរស់។ (រូបថត ហ្វេសប៊ុក)
សន្ដិសុខសង្គម - បើតាមសេចក្ដីប្រកាសក្នុងនាមក្រុមគ្រួសារទាំងមូល សាកសពរបស់លោក ដេវ វ័លឃ័រ ត្រូវបានរកឃើញដោយយុវជនម្នាក់ នៅក្នុងព្រៃមួយកន្លែងជិតប្រាសាទអង្គរធំ ខេត្តសៀមរាប។ អាជ្ញាធរកម្ពុជាបានបញ្ជាក់ទៅកាន់គ្រួសារថា លោក ដេវ វ័លឃ័រ បានស្លាប់តាំងពីច្រើនសប្ដាហ៍មកហើយ។
សាកសពដែលដែលគេបានរកឃើញនោះ បាននៅសល់តែគ្រោងឆ្អឹងប៉ុណ្ណោះ។ ប៉ុន្តែអ្វីដែលគេអាចកំណត់ចំណាំ ភិនភាគរបស់អ្នកការសែតជាតិកាណាដានេះបាន នោះគឺដោយសារតែខោអាវ និងស្បែកជើងនៅជាប់នឹងគ្រោងឆ្អឹងនោះ ដូចគ្នាទៅនឹងសម្លៀកបំពាក់ដែលលោកឧស្សាហ៍ពាក់ កាលពីមុនពេលលោកបាត់ខ្លួន។
គ្រូពេទ្យម្នាក់ ដែលចុះទៅដល់ផ្ទាល់នឹងកន្លែង មិនទាន់អាចកំណត់បាន ពីមូលហេតុនៃការស្លាប់នេះបាននៅឡើយ ហើយការធ្វើកោសលវិច្ឆ័យ ត្រូវបានធ្វើ ដើម្បីស្វែងយល់ថាតើអ្នកការសែត និងសមិទ្ធិករភាពយន្ដរូបនេះ ស្លាប់យ៉ាងដូចម្ដេច។
» សូមអានអត្ថបទដែលទាក់ទងឡើងវិញ ដោយចុចលើទីនេះ។
លោក ដេវ វ័លឃ័រ អាយុ៥៨ឆ្នាំ បានមករស់នៅក្នុងប្រទេសកម្ពុជា តាំងពីមួយឆ្នាំកន្លះមុន។ លោកបានសហការជាមួយនឹងដៃគូរជនជាតិកម្ពុជាម្នាក់ បើកក្រុមហ៊ុនថតកុនមួយឡើង ដែលមានឈ្មោះថា អានីមីស ហ្វាម ហ្វីម (Animist Farm Films) នៅខែកក្កដា ឆ្នាំ២០១២។ លោកនិងដៃគូរបានធ្វើការថតភាពយន្ដឯកសារមួយ ស្ដីពីរបបកម្ពុជាប្រជាធិបតេយ្យ ខ្មែរក្រហម អតីតកាលដ៏ជូរចត់របស់ប្រទេសកម្ពុជា ដែលធ្វើឲ្យប្រជាជនខ្មែរស្លាប់ជិត២លាននាក់។
កុមារ ដេវ វ័លឃ័រ បានធំដឹងក្ដីនៅក្នុងក្រុង អេដមុងតុន (Edmonton) ហើយបន្ទាប់មកបានមករស់នៅក្នុងទីក្រុងតូរ៉ុងតូ (Toronto) ប្រទេសកាណដា។ លោកបានទទួលការសិក្សា បញ្ចប់ថ្នាក់អនុបណ្ឌិត នៅសកលវិទ្យាល័យ ញ៉ូយក នៅឆ្នាំ២០០៩។
បើតាមគ្រួសាររបស់លោកបានឲ្យដឹងថា លោក ដេវ បានមករស់នៅ និងធ្វើការនៅតំបន់អាស៊ីប៉ែកអាគ្នេយ៍ តាំងពីច្រើនឆ្នាំមកហើយ៕
-----------------------------------------------
ដោយ កេសរកូល (ទំនាក់ទំនង៖ [email protected]) - ភ្នំពេញ ថ្ងៃទី០១ ឧសភា ២០១៤