បើទោះបីជាវិស័យចម្រៀងនៅក្នុងប្រទេសកម្ពុជា រីកចម្រើនគួរអោយកត់សម្គាល់ក៏ដោយ តែបទចម្រៀងខ្លះមិន​ត្រូវ​បានគាំទ្រ ពីបណ្តាយុវវ័យនិងអ្នកស្ដាប់វ័យចំណាស់ៗឡើយ ដោយប្រិយមិត្តទាំងនោះបានងាកទៅចូលចិត្ត​ស្តាប់​តែ​ចម្រៀងបរទេស និងខ្លះទៀតសុទ្ធចិត្តស្ដាប់ចម្រៀង បន្សល់ទុកពីសង្គមចាស់នោះជាដើម។ នេះអាចជា​មូលហេតុ​​មួយ ដែលធ្វើឲ្យបណ្តា​ផលិតកម្មមួយចំនួនដើរលួចចម្លងបទល្បីៗ ដែលអ្នកស្ដាប់ចូលចិត្តទាំងនោះ យកមកបកប្រែ ឬលេងភ្លេងដាក់តន្ត្រីថ្មី ដើម្បីទាក់ទាញចំណាប់អារម្មណ៍អ្នកស្ដាប់។

ការចាប់ផ្ដើមបញ្ចេញស្នាដៃរបស់បណ្ដាយុវជន នៅថ្ងៃសម្ភោធកម្មវិធី ស្ដាប់ចម្រៀងរបស់ខ្ញុំ នៅថ្ងៃទី២៧ ខែកុម្ភៈ ឆ្នាំ២០១៤។ (រូបថត MONOROOM.info/ Channita)

ចម្រៀង - តែសម្រាប់កម្មវិធី«ស្តាប់ចម្រៀងរបស់ខ្ញុំ ឬ Hear My Song» វិញ មានគោលបំណងលើកទឹកចិត្ត​អ្នក​និពន្ធទំនុកច្រៀង ក្នុងការឈានទៅរកការអភិវឌ្ឍនៃការនិពន្ធបទចម្រៀង បទភ្លេងដោយខ្លួនឯង និងកាត់បន្ថយ​ការចម្លងពីបទបរទេស។ ជាពិសេសកម្មវិធីនេះ ចង់រកឲ្យឃើញនូវទេពកោសល្យថ្មីៗ របស់អ្នកតែងទំនុកនិពន្ធ និង​អ្នកចម្រៀង ដើម្បីពង្រីកគំនិតតែងនិពន្ធ អោយកាន់តែប្រសើរឡើង។

ដោយមានកិច្ចសហការ ពីក្រុមហ៊ុនសប្បាយឌីជីខបភើរេសិននផងនោះ លោក ខៀវ កាញារិទ្ធ រដ្ឋមន្រ្តីក្រសួង​ព័ត៌មាន ដែលជាអ្នកផ្ដួចផ្ដើមគំនិត ដើម្បីបង្កើតកម្មវិធីនេះ បានថ្លែងឡើងថា ដោយសារតែអ្នកនិពន្ធនៅស្រុកខ្មែរ មានចំនួនតិចតួចនៅឡើយ ហើយការតែងនិពន្ធនោះទៀតសោត ក៏នៅមានកម្រិត ដែលជាហេតុធ្វើឲ្យបទចម្រៀង​ដែលផលិតចេញមក មិនបានឆ្លើយតបទៅនឹងការទន្ទឹងរងចាំ របស់អ្នកស្ដាប់ជាពិសេសយុវវ័យ។

សេចក្ដីថ្លែងរបស់លោករដ្ឋមន្ត្រី បានធ្វើឡើងនៅក្នុងពិធីសម្ពោធ កម្មវិធី«ស្តាប់ចម្រៀងរបស់ខ្ញុំ» កាលពីថ្ងៃទី២៧ ខែ​កុម្ភៈ ឆ្នាំ២០១៤ កន្លងមក នៅមជ្ឈមណ្ឌលសហប្រតិបត្តការកម្ពុជា-ជប៉ុន។ លោក ខៀវ កាញារិទ្ធ បានថ្លែងបន្តថា «អ្វីដែលជាបញ្ហាធំពេលនេះ យើងមានអ្នកនិពន្ធតែពីរបីនាក់។ អញ្ចឹងបើអោយគាត់មួយខែ តែងអោយបាន១០បទ គឺមិនងាយនោះទេ ហេតុនេះមានតែគាត់លួចចម្លងបទរបស់គេ ដើម្បីអោយគ្រប់មួយថាសចំរៀងដើម្បីចេញលក់»។

លោក ជី សិលា អគ្គនាយកក្រុមហ៊ុន សប្បាយឌីជីខបភើរេសិន បានអោយដឹងដែរថា កម្មវិធីថ្មីមានឈ្មោះ «ស្តាប់​ចម្រៀងរបស់ខ្ញុំ ឬ Hear My Song» បានចាប់ផ្តើមធ្វើ តាំងពីឆ្នាំ២០១៣កន្លងមក ជាមួយនឹងក្ដីសង្ឃឹមថា កម្មវិធី​នេះ​នឹងមានអ្នកគាំទ្រ និងទទួលបានការចាប់អារម្មណ៍ពីយុវជនជាច្រើន ក្នុងការចូលរូមប្រកួតប្រជែងនេះ។ លោក បន្ថែមថា «យើងចង់ឃើញអ្វីជាមោទនភាពរបស់ខ្លួនឯង និងជាមោទនភាពរបស់ខ្មែរយើង»។

អ្នកចូលរូមប្រលងនៅក្នុងកម្មវិធីនេះ មិនតម្រូវអោយមានក្រុមតន្រ្តីធំនោះទេ ពួកគេគ្រាន់តែតែងបទចម្រៀង និង​បទភ្លេង ហើយអាចច្រៀងបាន ជាមួយឧបករណ៍ខ្លះៗ ដូចជាហ្គីតា ឬព្យាណូជាដើម។ បេក្ខជនទាំងអស់ អាចជា​បេក្ខជនទោល ឬជាក្រុម ដែលតែងទំនុកច្រៀងថ្មី និងអត្ថន័យចំរៀងថ្មី ដោយការបង្ហាញសមត្ថភាព តាមរយៈ​ការ​និពន្ធដោយខ្លួនឯង ហើយមិនមែនជាការប្រកួតលើទឹកដមសម្លេងនោះទេ។ នេះបើតាមការបញ្ជាក់របស់ ប្រធាន​គម្រោងកម្មវិធីនេះ កញ្ញា ដាយ ណារី។

នៅក្នុងរយៈពេលកន្លងមក ផលិតកម្មចម្រៀង អ្នកចម្រៀង និងអ្នកតែងទំនុកច្រៀងមួយចំនួន បានរងនូវការរិះគន់​យ៉ាងជូរចត់ ពីសំណាក់អ្នកស្ដាប់ និងអ្នកដែលមានទស្សនវិស័យវែងឆ្ងាយ ដោយតែការលួចចម្លង ឬយកចម្រៀង​បរទេសមកធ្វើការបកប្រែទាំងដុល ហើយគ្មានការបង្កើតនូវបទចម្រៀង ដែលជាស្នាដៃរបស់ខ្លួនឯងនោះឡើយ។ ក្រុមអ្នករិះគន់បានលើកឡើងថា ការលើកស្ទួយវិស័យចម្រៀង ឬសិល្បៈណាក៏ដោយ ចាំបាច់ណាស់ តម្រូវឲ្យ​មាន​ការលើកទឹកចិត្តក្នុងការការបង្កើតថ្មី និងការគោរពគ្នាទៅវិញទៅមក តាមរយៈការគោរព-អនុវត្តន៍​នូវច្បាប់កម្មសិទ្ធ​បញ្ញា ដោយខានមិនបាន៕

-----------------------------------------------
ដោយ ក. ចាន់នីតា (ទំនាក់ទំនង៖ [email protected]) - ភ្នំពេញ ថ្ងៃទី០១ មិនា ២០១៤