ក្រោយពីមានការវាយប្រហារ ពីសំណាក់ជនមិនសស្គាល់មុខ ដែលចាក់សម្លាប់ជនស៊ីវិលស្លូតត្រង់ នៅស្ថានីយ៍​រថភ្លើងមួយកន្លែង ក្នុងប្រទេសចិន បណ្តាលឲ្យមនុស្ស ២៩ នាក់បានស្លាប់ និងមនុស្ស ១៣០ នាក់រងរបួសរួចមក អគ្គលេខាធិការអង្គការសហប្រជាជាតិលោក បាន គីមូន (Ban Ki-moon) បានចេញសេចក្តីថ្លែងការណ៍ ថ្កោល​ទោស​យ៉ាងដាច់​អហង្ការ ចំពោះទង្វើដ៏សហាវនេះ។ ជាមួយនេះដែរ ប្រធានាធិបតីចិន ក៏ចេញមុខបញ្ជា ឲ្យអាជ្ញាធរបើក​ការស៊ើប​អង្កេត ចាប់ជនដៃដល់មកផ្តន្ទាទោស ឲ្យខាងតែបានផងដែរ។

រូបភាពផ្ដិតពីវីដេអូនៃការផ្សាយទូរទស្សន៍ក្នុងស្រុកចិន ស្ដីពីជនរងគ្រោះនិងការជួយសង្គ្រោះនឹងការចាក់សម្លាប់នេះ។

ចិន - ឃាតករមិនស្គាល់មុខមួយក្រុម ដែលប្រដាប់ដោយកាប់បិទគ្រប់ដៃ បានសម្រុកចូលទៅក្នុង​ស្ថានីយ៍រថភ្លើង​គូនមីង (Kunming) នៅភាគនិរតីនៃខេត្តយូណាន (Yunnan) ប្រទេសចិន បានចាក់សម្លាប់មិនរើសមុខ ទៅលើជន​ស៊ីវិលស្លូតត្រង់យ៉ាងសាហាវយង់ឃ្នង ដោយបណ្តាលឲ្យមនុស្ស ២៩ នាក់បានស្លាប់ភ្លាមៗ និងមនុស្ស ១៣០ នាក់​ផ្សេងទៀត រងរបួសយ៉ាងដំណំ។ នេះបើយោងតាមការចុះផ្សាយ របស់ទីភ្នាក់ងារសារព័ត៌មានរដ្ឋស៊ីនហួរ ដែលចុះ​ផ្សាយនៅថ្ងៃអាទិត្យនេះ។

នៅក្នុងបរិវេណកើតហេតុកាល ពីយប់ថ្ងៃសៅរម្សិលមិញ ឈាមរបស់ជនរងគ្រោះក្រហមឆ្អៅបានប្រឡាក់ជោកជាំ និងសម្រែកដង្ហៅរកឲ្យជួយរបស់ជនស្លូតត្រង់ បានលាន់កងរំពងនៅពាសពេញកន្លែងនោះ។ ភ្លាមៗក្រោយពី​ព្រឹត្តិការណ៍ដ៏សហាវ ដែលស្ទើរមិនគួរឲ្យជឿបែបនេះ លោកអគ្គលេខាធិការអង្គការសហប្រជាជាតិ បាន គីមូន បាន​ចេញសេចក្តីថ្លែងការណ៍ទាំងយប់ ថ្កោលទោសចំពោះសកម្មសម្លាប់ជនស៊ីវិលនេះ។

សេចក្តីថ្លែងការណ៍ ដែលបញ្ចេញឲ្យដឹងតាមរយៈអ្នកនាំពាក្យរបស់ខ្លួន លោក បាន គីមូន បានចាត់ទុកសម្មភាព​សម្លាប់ជនស៊ីវិល ដែលគ្មានកំហុសនេះថា ជាអំពើគួរឲ្យខ្លាចជាទីបំផុត ហើយវាជារឿង​អយុត្តិធម៌ណាស់សម្រាប់​ពួកគេ ដែលមិនដឹងអ្វីសោះ ត្រូវគេសម្លាប់យ៉ាងអណោចអធមបែបនេះ។ លោកប្រមុកដឹកនាំអង្គការសហប្រជាជាតិ​រូបនេះ បានស្នើឲ្យឲ្យអាជ្ញាធរចិន ចាប់ខ្លួនជនទាំងនោះ មកផ្តន្ទាទោសតាមច្បាប់ ដោយមិនអាចលើកលែង​បាន​នោះទេ។

នៅក្នុងហេតុការណ៍ចាក់សម្លាប់ជនស៊ីវិលនោះ ប៉ូលិសចិន បានបាញ់ឃាតករមិនស្គាល់អត្តសញ្ញាណទាំងនោះ បណ្តាលឲ្យស្លាប់ ៤ នាក់។ ក៏ប៉ុន្តែអាជ្ញាធរចិន មិនអាចកំណត់ឲ្យច្បាស់ថា សកម្មភាពទាំងនេះ ជាអំពើរបស់ក្រុម​ខាងណានោះឡើយ ដោយពួកគេគ្រាន់តែដាក់ការសង្ស័យមិនច្បាស់ថា អំពើនេះ គឺប្រព្រឹត្តដោយក្រុមភេវរករ​ហិង្សា​មានការរៀបចំទុកជាមុន ដែលទំនងជាស្នាដៃរបស់ក្រុមជនជាតិភាគតិច អ៊ុយហ្គួរ ដែលតែងតែទាមទារចង់ផ្តាច់ខ្លួន និងប្រឆាំងនិងរដ្ឋាភិបាលចិន។

រូបភាពឈាមក្រហមឆ្អិនឆ្អៅក្រាលពាសពេញដី និងសកម្មភាពរបស់គ្រូពេទ្យកំពុងធ្វើការជួយសង្គ្រោះ ជន​រង​របួស​យ៉ាងសកម្ម ត្រូវបានគេបង្ហោះនៅលើគេហទំព័រ Weibo និងផ្សព្វផ្សាយនៅលើកញ្ចក់ទូរទស្សន៍ស៊ីស៊ីធីវី (CCTV) របស់ចិនផងដែរ។ ជាមួយគ្នាសារលិខិតចូលរួមរំលែកទុក្ខ នៃក្រុមគ្រួសារសពពីថ្នាក់ដឹកនាំកំពូលៗចិន បានធ្វើ​ឡើង​ជាបន្តបន្ទាប់។

លោកប្រធានាធិបតីចិន ស៊ី ជីនពីង (Xi Jinping) ក៏បានសម្តែងការសោកស្តាយ និងសរសេរសារមរណទុក្ខ​ចំពោះ​គ្រួសារសព ព្រមទាំងបញ្ជាឲ្យអាជ្ញាធរចិនបើកការស៊ើបអង្កេតជាបន្ទាន់ ដើម្បីវែកមុខជនដៃដល់ឲ្យឃើញ ចាប់​យក​មកដាក់ទណ្ឌកម្មឲ្យខាងតែបាន៕

-------------------------------------------------
ដោយ ជា ធីរិទ្ធ (ទំនាក់ទំនង៖ [email protected]) - ភ្នំពេញថ្ងៃទី ០២ មីនា ២០១៤