ក្រុមហេគឃឺអនាមិកកម្ពុជា (Anonymous Cambodia) បើកយុទ្ធនាការប្រឆាំងរដ្ឋាភិបាលកម្ពុជា ជាបន្តបន្ទាប់ តាម​រយៈសាដែល​បញ្ចេញនៅលើ​ទំព័រហ្វេសប៊ុករបស់ខ្លួន បន្ទាប់ពីយុវនិស្សិតជំនាញខាងបច្ចេកវិទ្យាពីរនាក់ ដែលទំព័រ​ហ្វេសប៊ុកដាក់ឈ្មោះក្រុមនេះអះអាងថា ជា​សមាជិករបស់ក្រុមអនាមិកកម្ពុជានោះ ត្រូវបានចាប់ខ្លូន។

«យើងជាក្រុមជនអនាមិក យើងមានសមាជិក...» (រូបថតហ្វេសប៊ុក)

បច្ចេកវិទ្យា - បន្ទាប់ពីបញ្ចេញសារមួយដែលមានន័យថា «ពួកអ្នកចាប់ពួកយើង ពួកយើងនឹងមិនបំភ្លេចចោល ពួក​យើងនឹងមិនអភ័យ ពួកយើងនឹងបន្តការងាររបស់ពួកយើងទៀត» និង«អ្នកចាប់ពួកយើងត្រឹម២នាក់ ប៉ុន្តែពួកយើង​នៅ​តែអាចបន្តការងាររបស់យើង ហើយនឹងចាប់ផ្តើមអោយខ្លាំងជាងមុន ១០ ដង ១០០០ ដង ១០០០០០ ដង គ្មាន​ទីបញ្ចប់ចាប់ពីពេលនេះទៅ»។

បន្ថែមពីលើសារនេះ ក្រុមហេគឃឺអនាមិកកម្ពុជា បានសរសេរសារនៅលើទំព័រហ្វេសប៊ុកមួយឈ្មោះថា Anonymous Cambodia ជាការព្រមានរដ្ឋាភិបាលថា ពួកគេនឹងស្វែងរកការគាំទ្រ ដើម្បីឱ្យដោះលែងសមជិករបស់ពួកគេ ប្រសិន​បើមិនដោះលែងសមាជិករបស់ខ្លួនទេនោះ ពួកគេនឹងចូលរួមជាមួយ ក្រុមហេកឃឺអានាមិក (Anonymous) ទូទាំង​ពិភពលោកដើម្បីផ្តួលរំលំរដ្ឋាភិបាលកម្ពុជា។

នៅថ្ងៃទី២៤ ខែមេសា ឆ្នាំ២០១៤នេះ ទំព័រហ្វេសប៊ុកមួយនេះ បញ្ចេញសារមួយទៀតថា «ស្ងាត់ស្ងាត់ចោរលួចសេះ​បាត់ យប់នេះ យើងនឹងធ្វើការវាយលុក ចូលប្រព័ន្ធទូរសោសម្ងាត់ ទាំងយប់តែម្តង និងដាក់កូនក្រកបន្ថែម អោយគ្រប់​ទីកន្លែងទាំងអស់»។ បន្ទាប់មកនៅល្ងាចថ្ងៃដដែល ទំព័រហ្វេសប៊ុក បានបន្ថែមទៀតថា ពួកគេកំពុងបាញ់ទិសដៅ​ទៅលើ គេហទំព័ររបស់អគ្គស្នងការនគរបាលជាតិ។ នៅវេលាម៉ោងប្រមាណជា៧យប់ គេហទំព័ររបស់អគ្គស្នងការ​នគរបាល​ជាតិមួយនេះ បានអាក់ខានដំណើរការមួយរយៈ មុននឹងត្រឡប់មកដើរជាធម្មតាមកវិញ នៅកន្លះម៉ោង​ក្រោយមក។

សូមរំលឹកថា គេហទំព័ររបស់អគ្គស្នងការនគរបានជាតិដដែល បានឱ្យដឹងកាលពីថ្ងៃទី២២ ខែមេសា ឆ្នាំ២០១៤ថា ស្ថាប័នជាតិសំខាន់ៗយ៉ាងហោចណាស់៣០ និងស្ថាប័នឯកជនមួយចំនួនផងដែរ ត្រូវរងគ្រោះពីការវាយប្រហារតាម​បច្ចេកវិទ្យា ព័ត៌មានពីសំណាក់ក្រុមហេគឃឺអនាមិកកម្ពុជា ចាប់តាំងពីមុនការបោះឆ្នោតជាតិជ្រើសរើសតំណាងរាស្ត្រ កាលពីខែកក្កដា ឆ្នាំ២០១៣។ ស្ថាប័នជាតិសំខាន់ៗ ដែលទទួលរងគ្រោះមានដូចជា៖ គណៈកម្មាធិការជាតិរៀបចំ​ការ​បោះឆ្នោត អង្គភាពប្រឆាំងអំពើពុករលួយ ក្រសួងការបរទេស ក្រសួងការពារជាតិ និងសាលារាជធានីភ្នំពេញ ជាដើម។

ប្រភពគេហទំព័រអគ្គស្នងការនោះ បានសរសេរទៀតថា អាជ្ញាធរកម្ពុជា បានតាមដាន និងសហការស្រាវជ្រាវជាមួយ អែហ្វ.ប៊ី.អាយ (FBI) ប្រចាំកម្ពុជា អស់រយៈពេល​ប្រមាណ ៨ខែមកហើយ ទើបឃាត់ខ្លួនជនសង្ស័យកាលពីថ្ងៃទី៧ ខែមេសា។ គេហទំព័រដដែល បានអះអាងថា ក្រុម​ហេកឃឺរអនាមិកកម្ពុជា បានធ្វើសកម្មភាពវាយប្រហារ ធ្វើឱ្យ​រអាក់​រអួលមិនដំណើរការគេហទំព័រ ជ្រៀតចូល​បណ្ដាញ​ព័ត៌មានវិទ្យាដោយខុសច្បាប់ លួចទិន្នន័យសម្ងាត់ជាតិពីប្រព័ន្ធ​ព័ត៌មាន និងការកែទំព័រដើម។

កញ្ញា កែវ គូនីឡា អ្នកជំនាញខាង Blogger បានប្រាប់ថាអ្នកដែលចេះជំនាញហេកគេហទំព័រ ឬវាយប្រហារតាម​បច្ចេកវិទ្យាព័ត៌មាននេះ មានភាគច្រើននៅប្រទេសក្រៅ ហើយនៅកម្ពុជាទើបតែមានថ្មីនេះទេ អ្នកដែលមាន​ជំនាញ​ខាង​ផ្នែកកុំព្យួរទ័រ ចាប់ផ្តើមប្រើប្រាស់វា យកទៅវាយប្រហារទំព័ររបស់អ្នកដទៃ ក្នុងបំណងធ្វើអ្វីមួយ​មិនល្អទៅលើ​នរណាម្នាក់។ អ្នកដែលត្រូវបានគេវាយប្រហារ ក៏មានសិទ្ធិប្តឹងបានដែរ។

ជនសង្ស័យពីរនាក់ ដែលត្រូវបានឃាត់ខ្លួននោះ មានម្នាក់ជានិស្សិតឆ្នាំទី៣ នៃសាកលវិទ្យាល័យស៊ីតិច ដែលមាន​ឈ្មោះថា ប៊ុន ឃីងមង្គលបញ្ញា ហៅ Sexmachine ឬ Blackcyberភេទប្រុស អាយុ២១ឆ្នាំ និងម្នាក់ទៀតឈ្មោះ ជូ សុងហេង ហៅ Zoro ភេទប្រុសអាយុ២១ឆ្នាំ ត្រូវចោទប្រកាន់តាមមាត្រា ៤២៧ ៤២៨ ៤២៩ នៃក្រមព្រហ្មទណ្ឌ។ ជនសង្ស័យត្រូវប្រឈមនឹងការពិន័យជាប្រាក់ពី ១០០.០០០រៀល ដល់ ៤.០០០.០០០រៀល និងអាចជាប់ពន្ធនាគារពី ១ខែរហូតដល់ ២ឆ្នាំ៕

----------------------------------------------
ដោយ ក. ចាន់នីតា (ទំនាក់ទំនង៖ [email protected]) - ភ្នំពេញ ថ្ងៃទី២៤ មេសា ២០១៤