នៅក្នុងការប្រកួតកីឡាបាល់ទាត់ ដើម្បីដណ្ដើមជើងឯក កាលពីដើមសប្ដាហ៍នេះ នៅក្នុងប្រទេសបូលីវី (អាមេរិកខាង​ត្បូង) ម៉ាស៊ីនថតវីដេអូរបស់ស្ថានីយ៍ទូរទស្សន៍ របស់ប្រទេសនេះ បានថតជាប់នូវរូបភាពយ៉ាងចម្លែក។ នោះគឺអ្នក​គាំទ្រ​បាត់ទាត់មួយរូប បានរត់កាត់ហ្វូងមនុស្ស ដែលកំពុងអង្គុយមើលការប្រកួត ដែលហាក់ដូចជា​បានបង្ហាញនូវ​ភាពប្លែកខុសធម្មតា។ ទូរទស្សន៍ដែលផ្យាយរូបភាពនេះ បានច្រានចោលនូវការចោទប្រកាន់ ដែលថាខ្លួនបានធ្វើការ​កាត់តរូបភាពទាំងនេះ។ បើជារូបពិត តើនោះជាខ្មោចឬ?

រូបភាពផ្ដិតពីវីដេអូ ដែលបង្ហាញពីស្រមោលរត់កាត់ហ្វូងទស្សនិកជន។

នៅក្នុងបាល់ទាត់ រឿងប្លែកៗមិនមែននៅក្នុងតែការប្រកួត នៅលើស្មៅប៉ុណ្ណោះទេ។ នៅពេលមានការប្រកួតរបាល់​ទាត់ដណ្ដើមជើងឯកមួយ នៅក្នុងកីឡាដ្ឋាន ហើណេនដូ ស៊ីលេស នៅក្នុងប្រទសបូលីវី ម៉ាស៊ីនថតវីដេអូ បានចាប់​បានរូបភាពដ៏ចម្លែកខុសពីធម្មតាមួយ ពីចំណោមកន្លែងអង្គុយរបស់ទស្សនិកជន។ គេឃើញស្រមោលមួយ បានរត់​កាត់ហ្វូងមនុស្ស ដែលកំពុងអង្គុយយ៉ាងកុះករមើលបាល់។

អ្វីដែលចម្លែកនោះ គឺល្បឿនដែលស្រមោលនោះបានរត់កាត់ មានសភាពលឿនជាងធម្មតា ដែលធ្វើឲ្យគេគិតថា វា​មិនអាចជាល្បឿនរបស់មនុស្សធម្មតា នៅក្នុងចំណោមហ្វូងមនុស្សដូច្នេះឡើយ។

ស្ថានីយទូរទស្សន៍ ដែលផ្សាយរូបភាព បានបដិសេធថាខ្លួនមិនបានកាត់តរ ឬបន្ថែមបន្ថយរូបភាពទាំងនេះឡើយ ដែល​បង្កឲ្យរូបភាពដែលត្រូវបានប្រព័ន្ធផ្សព្វផ្សាយផ្សេងៗ នៅលើពិភពលោក យកមកផ្សាយបន្តនោះ កាន់តែបង្ក​ការសង្ស័យខ្លាំងឡើង។

មិនត្រឹមតែប៉ុណ្ណេះ ទស្សនិកជនដែលអង្គុយនៅទីនោះ បានថ្លែងបញ្ជាក់ថា ពួកខ្លួនមិនបានចាំថា មាននរណារត់​កាត់​ពីមុខខ្លួននោះទេ។ ជាមួយនឹងការច្រានចោល របស់ស្ថានីយទូរទស្សន៍នោះផង គេត្រូវតែរងចាំការបកស្រាយ​ណា​មួយ របស់អ្នកវិទ្យាសាស្ត្រណាម្នាក់ជុំវិញបញ្ហានេះ។ ប៉ុន្តែក្នុងពេលនេះ សូមទស្សនាវីដេអូនេះ ហើយធ្វើការត្រិះរិះ​ពិចារណា ទៅតាមការយល់ឃើញផ្ទាល់ខ្លួនទៅហោង៕

---------------------------------------------
ដោយ ឈូករ័ត្ន (ទំនាក់ទំនង៖ [email protected]) - ប៉ារីស ថ្ងៃទី២៥ ខែមេសា ឆ្នាំ២០១៤