«រ៉ែមាស» ជាមាសទឹកខ្ចី ដែលមិនអាចធ្វើការកែឆ្នៃ ជាគ្រឿងអលង្ការបាននៅឡើយនោះ ត្រូវបានឈ្មួញ​ម្នាក់មក​ពី​ភាគខាងលិច នៃខេត្តត្បូងឃ្មុំយកមកលក់ នៅក្នុងទឹកដីផ្សារខ្នា ភូមិខ្នា ឃុំស្រឡប់ ស្រុកត្បូងឃ្មុំ ខេត្តត្បូងឃ្មុំ នាពេល​កន្លងមក និងថ្មីៗនេះ ជាមួយនឹងការទិញយកទៅប្រើប្រាស់ តាមជំនឿសាសនារៀងៗខ្លួន នៃពលរដ្ឋមួយចំនួន​ប្រចាំតំបន់នោះ។

«មាសស្រួយ» ដែលឡើងទៅជាមាសបន្ដិចម្ដងៗ។ (រូបថត MONOROOM.info/ O. Vary)

មាសស្រួយ - ក្នុងកិច្ចសម្ភាសជាមួយទស្សនាវដ្តីមនោរម្យ.អាំងហ្វូ ប្រជាពលរដ្ឋម្នាក់ដែលជាអាជីវករ​លក់សម្លៀក​បំពាក់ និងសម្ភារៈប្រើប្រាស់នានា លោក ស្រ៊ីម ចាន់ថន បានបញ្ជាក់ប្រាប់ថា ដុំថ្ម ជាច្រើនដុំ ដែលមានពណ៌ប្រាក់ៗ​ពណ៌លឿងខ្ចី ត្រូវបានបុរសម្នាក់មកពីភាគខាងលិច នៃខេត្តរបស់លោក និយាយភាសាខ្មែរ បែបប៉ៃឡាំ លាយឡំ​ជា​មួយនឹងសំនៀងយួន ដែលធ្វើឲ្យលោកអាចសន្និដ្ឋានថា ពលរដ្ឋអ្នកលក់នេះជាជនជាតិយួន មិនមែនជាខ្មែរទេ។

លោកបានបន្ថែមថា ដុំថ្ម ដែលជាប្រភេទរ៉ែមាស និងជាមាសស្រួយនេះ មិនមែនលក់ក្នុងលក្ខណៈជាសាធារណៈ និងលក់ជាប្រចាំទេ គឺគាត់យកមកម្តងបន្តិចបន្តួចប៉ុណ្ណោះ (ប្រហែលបួនដប់គីឡូក្រាម) ហើយដើរសួរគេ បើ​អ្នកណា​ចង់ទិញគាត់ នឹងយកមកលក់ឲ្យ។ លោកបន្ថែមទៀតថា៖ «ខ្ញុំមិនដឹងថាគាត់មកពីខាងណាទេ។ ហើយក៏មិនដឹងគាត់​យកមកពីកន្លែងណាដែរ តែឃើញតែគាត់មកពីទិសខាងលិច មិនដឹងពីក្រចេះ ឬពីយួនទេ។ តែគាត់មើលទៅជា​ជន​ជាតិយួន។ (...) ខ្ញុំឃើញវាស្អាត ចេះតែទិញវាទុកទៅ យកមកដាក់ក្នុងផ្ទះឲ្យត្រជាក់ត្រជុំ។ (...) អាមួយដុំកាល​ទិញ​ក្នុងឆ្នាំ២០១១នោះ ឥឡូវ មានឡើងពណ៌លឿងពាសពេញ ហើយ មានមានលក្ខណៈជាដុំមាសសុទ្ធសាធ និងមាន​ទំងន់កានតែធ្វង់ជាងមុនទៅទៀត។ មុនទំនង់វាជាងមួយគីឡូបន្តិចទេ តែឥឡូវវាជិតពីរគីឡូទៅហើយ។»

លោកបានបញ្ជាក់បន្ថែមថា នេះជាប្រភេទមាសស្រួយ ដែលមានលោហធាតុពណ៌លឿង គេហៅថាជា«មាសទឹកខ្ចី» ឬជាថ្មដុះម្យ៉ាង កន្លែងខ្លះថ្លាដូចកញ្ចក់ ដេញពន្លឺថ្ងៃព្រៀកៗ ដូចជាគ្រាប់ពេជ្រពេលត្រូវនឹងពន្លឺ។ នេះហើយជា​មូលហេតុ ធ្វើឲ្យលោកមានចំណាប់អារម្មណ៍ ទិញដាក់មួយនៅនឹងកុងម៉ា ទុកជាវត្ថុនាំនូវសេចក្តីសុខសប្បាយ និងត្រជាក់ត្រជុំ។ «ខ្ញុំមានជំនឿថា (វា)នាំមកនូវសេចក្តីសុខសប្បាយ ត្រជាក់ត្រជុំដល់គ្រួសារ។ (...) កាលខ្ញុំសង់​ផ្ទះថ្មីៗ ខ្ញុំក៏បានប្រើប្រាស់វា ដាក់តាមរណ្តៅនៃសសរគ្រិះផ្ទះរបស់ខ្ញុំដែរ។»

ប្រជាពលរដ្ឋម្នាក់ទៀតឈ្មោះ ជា ស៊ឹមស្រេង ដែលបានទិញនូវរ៉ែមាសនេះដែរ បានលើកឡើងថា មិនមានតែ​លោក​ទេ ដែលបានទិញវានោះ នៅមានប្រជាពលរដ្ឋជាច្រើនទៀតនៃផ្សារខ្នានេះ បានទិញ និងយកទៅប្រើប្រាស់ទៅ​តាម​ជំនឿរៀងៗខ្លួន។ លោកថា សម្រាប់លោកយកមកប្រើប្រាស់ ដាក់នឹងព្រះភូមិ ឬជំនាងផ្ទះ ទុកជាជំនឿក្នុងការរកស៊ី និងនាំមកនូវសេចក្តីសុខសប្បាយ។ បើកាលណាវាមានការប្រែពណ៌ ពីប្រភេទថ្ម ទៅជាពណ៌លឿងច្រើន នោះមាន​ន័យថា រ៉ែមាសនេះកំពុង«ដុះ» និងនាំមកនូវការរកស៊ីប្រកបដោយជោគជ័យ និងសប្បូរសប្បាយ។

លោក ស្រេង បានបន្តថា អ្នកខ្លះក៏បានយកប្រភេទមាសស្រួយទាំងនោះ ទៅឲ្យព្រះសង្ឃ ចារ្យ និងយកមកដាក់​ក្នុងអាងទឹក ដែលកំពុងប្រើប្រាស់ប្រចាំថ្ងៃ ដើម្បីសុំសេចក្តីសុខ និងភាពត្រជាក់ត្រជុំ។ លោកក៏បានបង្ហាញ​ពីតម្លៃ​សម្រាប់មាសស្រួយនេះថា វាមិនជាថ្លៃប៉ុន្មានទេ។ មាសស្រួយនេះ(វា)មានលក្ខណៈជាដុំ ជាថ្មភ្នំ ចាប់ពីប៉ុនភ្លៅ រហូតមកប៉ុនមេដៃ។ តម្លៃរបស់វា គឺក្នុងមួយគីឡូក្រាម ២ម៉ឺនរៀលសម្រាប់ដុំធំៗ និងមួយគីឡូក្រាម ៥រយរៀល សម្រាប់ដុំតូចៗប៉ុនមេដៃ។

ទស្សនាវដ្តីមនោរម្យ.អាំងហ្វូ មិនអាចសុំការបញ្ជាក់ពីមន្រ្តីអាជ្ញាធរបានទេ ទាក់ទងនឹងការលក់ដូររ៉ែមាស ឬមាស​ស្រួយនេះ។ តែតាមការបញ្ជាក់ពីប្រជាពលរដ្ឋ ដែលបានទិញនោះបានបញ្ជាក់ថា អាជ្ញាធរប្រហែលជាមិនបានដឹងទេ ព្រោះថាការលក់នោះ មិនមិនមានជាសាធារណៈទេ។ ព្រោះអ្នកលក់នោះមកសួរអ្នកនៅក្នុងផ្សារ បើអ្នកណាទិញ​ក៏លក់ឲ្យ អ្នកណាមិនទិញគាត់ក៏ត្រឡប់ទៅវិញ ទំនងជាយកទៅលក់នៅកន្លែងផ្សេងទៀត។

មកទល់នឹងពេលនេះ ទស្សនាវដ្តីមនោរម្យ.អាំងហ្វូ នៅមិនទាន់ស្វែងរកអ្នកលក់នោះ ដើម្បីសុំបញ្ជាក់ពីប្រភព​កំណើត​នៃរ៉ែមាសនេះ បាននៅឡើយ។ តើប្រភពពិតនៃរ៉ែមាស ឬមាសស្រួយនោះ ថាតើវាមានប្រភពប្រាកដ ពីក្នុងទឹកដី​កម្ពុជា ឬពីប្រទេសវៀតណាម។

ទោះយ៉ាងណាក៏ដោយ ក៏មានពលរដ្ឋមួយចំនួន បានបង្ហាញនូវការសោកស្តាយថា ប្រសិនបើរ៉ែមាសទាំងនេះ ត្រូវ​បានកំទេចចេញពីភ្នំណាមួយ នៃប្រទេសកម្ពុជានោះ ពិតជាសោកនាដកម្មមួយ នៃរតនសម្បត្តិរបស់ខ្មែរ ដែល​អាជ្ញាធរមូលដ្ឋាន ឬតំបន់នោះមិនបានការពារ តែបែរជាបណ្តែតបណ្តោយឲ្យជនបរទេស មកកម្ទេចកាយយកតាម​តែអំពើចិត្ត៕

«មាសស្រួយ» នៅលើរានព្រះភូមិ។ (រូបថត MONOROOM.info/ O. Vary)

«មាសស្រួយ» ដែលនៅជាដុំថ្ម មិនទាន់ក្លាយទៅជាមាស។ (រូបថត MONOROOM.info/ O. Vary)

--------------------------------------------------
ដោយ អ៊ុម វ៉ារី (ទំនាក់ទំនង៖ [email protected]) - ភ្នំពេញថ្ងៃទី១៥ មេសា ២០១៤