មន្រ្តីអ្នកនាំពាក្យបណ្តោះអាសន្ន របស់គណបក្សសង្រ្គោះជាតិ លោកស្រី មួរ សុខហួរ បានអះអាងលោកសម រង្ស៊ី មានសិទ្ធិគ្រប់គ្រាន់ក្នុងការបកស្រាយថា សមាជិកសភា ត្រូវមានយ៉ាងតិ១២០រូប ស្របតាមរដ្ឋធម្មនុញ្ញ និងជាការ​ទូលថ្វាយព្រះមហាក្សត្រ។ ការលើកឡើងរបស់លោកស្រី មួរ សុខហួរ គឺបានកើតឡើយក្រោយពេលលោក​នាយក​រដ្ឋមន្រ្តី ហ៊ុន សែន ព្រមានថានឹងប្តឹងលោកសម រង្ស៊ី ពីបទមិនគោរពសេចក្តីសម្រេចរបស់ក្រុមប្រឹក្សាធម្មនុញ្ញ។

លោក សម រង្ស៊ី នៅក្នុងក្បួនដង្ហែរំលឹកខួបការបាញ់សម្លាប់មេដឹកនាំសហជីពកាលពី១០ឆ្នាំមុន លោក ជា វិជ្ជា។ (រូបថត MONOROOM.info/ O.Vary)

នយោបាយ - «លោកប្រធានសម រង្ស៊ី អត់និយាយអ្វីខុសពីការពិតនោះទេ តែជាការនិយាយតាមរដ្ឋធម្មនុញ្ញ ដែល​ចែងអំពីសភាត្រូវមានសមាជិកយ៉ាងតិច១២០រូប ដើម្បីបើកជាសភា ស្របតាមស្មារតីសេរីពហុបក្ស។ នេះជាជំហរ និងគំនិតដើម ដើម្បីថ្វាយព្រះករុណា»។ នេះជាការលើកឡើងរបស់លោកស្រីមួរ សុខហួរ មន្រ្តីអ្នកនាំពាក្យបណ្តោះ​អាសន្ន របស់គណបក្សសង្រ្គោះជាតិ ក្នុងកិច្ចសម្ភាសជាមួយទស្សនាវដ្តីមនោរម្យ.អាំងហ្វូ នៅថ្ងៃទី០៧ មេសា នេះ។

លើសពីសេចក្តីថ្លែងការណ៍របស់រដ្ឋាភិបាលចុះថ្ងៃទី០៥ មេសា ដែលថ្កោលទោស លោក សម រង្ស៊ី ថាបានប្រមាថ​ព្រះមហាក្សត្រ និងមិនគោរពសេចក្តីសម្រេចរបស់ក្រុមប្រឹក្សាធម្មនុញ្ញ ហើយព្រមានចាត់វិធានការ ទោះក្នុងតម្លៃណា​ក៏ដោយនោះ លោក ហ៊ុន សែន ក៏បានអះអាងដែរថា បណ្តឹងប្រឆាំងលោកសម រង្ស៊ី នឹងទៅដល់ដៃតុលាការ​មុន​ចូល​ឆ្នាំខ្មែរ។

នាយករដ្ឋមន្រ្តីកម្ពុជាលោកហ៊ុន សែន ក្នុងកម្មវិធីមួយនៅកោះពេជ្រ ថ្ងៃទី០៧ មេសា នេះបានអះអាងថាក្រុមអ្នក​ច្បាប់កំពុងតែសិក្សាពីនីតិវិធីច្បាប់ ដើម្បីដាក់បណ្តឹងទៅតុលាការ ប្រឆាំងលោក សម រង្ស៊ី ប្រធានគណបក្ស​សង្រ្គោះ​ជាតិ ពីបទជំទាស់សេចក្តីសម្រេចរបស់ ក្រុមប្រឹក្សាធម្មនុញ្ញ ឲ្យបានមុនចូលឆ្នាំខ្មែរ។ លោកហ៊ុន សែន បានបញ្ជាក់​ច្បាស់ទៀតថា៖ «ការដឹកនាំ​ធ្វើបាតុកម្មនាំឲ្យមានអំពើហិង្សាកន្លងមក រួមទាំងការប្រឆាំងនឹងសេចក្តីសម្រេច​របស់​ក្រុមប្រឹក្សាធម្មនុញ្ញ គឺវាគ្រប់គ្រាន់សម្រាប់ការដាក់ទោសហើយ។»

តែសម្រាប់លោក យ៉ង់ គឹមអេង ប្រធានមជ្ឈមណ្ឌល អភិវឌ្ឍន៍ពលរដ្ឋ និងសន្តិភាព បានលើកឡើងថា ការសម្រេច​ចិត្តរបស់អ្នកនយោបាយ យកការប្តឹងផ្តល់ទៅតុលាការ ដើម្បីមានប្រៀបនោះ វានឹងធ្វើឲ្យបញ្ហាគ្រប់យ៉ាងកាន់តែ​ស្មុគ​ស្មាញ ខណៈវិបត្តិនយោបាយ នៅបន្តជាប់គាំងនៅឡើយនោះ។

ប្រធានមជ្ឈមណ្ឌល អភិវឌ្ឍន៍ពលរដ្ឋ និងសន្តិភាព រូបនេះ បានសម្តែងចម្ងល់ថា៖ «យើងឃើញគណបក្ស​ប្រជាជន​កម្ពុជា និងគណបក្សសង្រ្គោះជាតិ បានប្រឹងប្រែងស្វែងរកដំណោះស្រាយនយោបាយច្រើនមកហើយ ទាក់ទងនឹង​បញ្ហា​បោះឆ្នោត ចុះហេតុអ្វីនៅពេលទៅជ្រើសរើសការប្តឹងផ្តល់ ដែលនឹងនាំឲ្យបញ្ហាកាន់តែលំបាក? ពួកគេគម្បី​ជជែក​គ្នាឲ្យបានច្រើន ហើយបោះបង់ការប្តឹងផ្តល់គ្នានៅតុលាការ៕»

-------------------------------------
ដោយ អ៊ុំ បូរី (ទំនាក់ទំនង៖ [email protected]) - ភ្នំពេញ ថ្ងៃទី០៧ មេសា ២០១៤