សម្ភាស មុត ចន្ថា៖ ជាតិ​និយម រួម​ជា​មួយ​សង្គ្រោះ​ជាតិ ដើម្បី​«ខ្លាំង»

គណបក្សជាតិនិយម មិនមែនចុះចូលជាមួយ គណបក្សសង្គ្រោះជាតិទេ តែជាការរួបរួម ការរួមកម្លាំងប្រជាធិបតេយ្យ ដើម្បីធ្វើឲ្យកម្លាំងនោះកាន់តែខ្លាំង និងមិនបែកខ្ញែកគ្នា។ លោក មុត ចន្ថា អគ្គលេខាធិការគណបក្សជាតិនិយម បាន​បង្ហាញពីគោលជំហរ នៃការរួមរួបនេះថាគណបក្សលោក ក៏ដូចជាគណបក្សសង្គ្រោះជាតិ ចង់ធ្វើអ្វីទៅតាម​ឆន្ទៈរបស់​រាស្រ្ត ដែលចង់ឲ្យ​មាន​ការផ្លាស់ប្តូរ។
Loading...
  • ដោយ: អ៊ុម វ៉ារី
  • កែប្រែចុងក្រោយ: April 07, 2014
  • ប្រធានបទ:
  • អត្ថបទ: មានបញ្ហា?
  • មតិ-យោបល់

គណបក្សជាតិនិយម មិនមែនចុះចូលជាមួយ គណបក្សសង្គ្រោះជាតិទេ តែជាការរួបរួម ការរួមកម្លាំងប្រជាធិបតេយ្យ ដើម្បីធ្វើឲ្យកម្លាំងនោះកាន់តែខ្លាំង និងមិនបែកខ្ញែកគ្នា។ លោក មុត ចន្ថា អគ្គលេខាធិការគណបក្សជាតិនិយម បាន​បង្ហាញពីគោលជំហរ នៃការរួមរួបនេះថាគណបក្សលោក ក៏ដូចជាគណបក្សសង្គ្រោះជាតិ ចង់ធ្វើអ្វីទៅតាម​ឆន្ទៈរបស់​រាស្រ្ត ដែលចង់ឲ្យ​មាន​ការផ្លាស់ប្តូរ។


សមាជិកគណបក្សជាតិនិយម កាលពីពេលធ្វើការរួបរួមជាមួយគណបក្សហ្វុនស៊ីនប៉ិច។ (រូបថតគណបក្ស)

នយោបាយ - ក្នុងពិធីរំលឹកខួប១ឆ្នាំ នៃការបង្កើតគណបក្សសង្គ្រោះជាតិ នាព្រឹកថ្ងៃទី៧ ខែមេសានេះ នៅស្នាក់ការ​កណ្តាលគណបក្សសង្គ្រោះជាតិចាក់អង្រែលើ លោក ប៉ុល ហំម ប្រធានគណៈកម្មាធិការនាយក​នៃគណបក្សសង្រ្គោះ​ជាតិ បានប្រកាសជាផ្លូវការថា«គណបក្ស ជាតិនិយម» នឹងរួបរួមជាមួយគណបក្សសង្គ្រោះជាតិ។ ការ​ប្រកាស​ខាងលើ បានធ្វើឡើងនៅចំពោះវត្តមានលោក ផែង ហេង ជាប្រធានគណបក្ស និងលោក មុត ចន្ថា ជាអគ្គលេខាធិការ​«គណបក្ស​ជាតិនិយម» ដែលអង្គុយនៅលើវេទិកានោះដែរ។

ក្នុងកិច្ចសម្ភាសដោយឡែកមួយ ជាមួយទស្សនាវដ្តីមនោរម្យ.អាំងហ្វូ លោក មុត ចន្ថា បានលើកឡើង​ថាគណបក្ស​ជាតិ​និយម ជាគណបក្សប្រជាធិបតេយ្យ ដូច្នេះត្រូវតែរកដៃគួរបស់ខ្លួន ដែលប្រកាន់ជំហរជាអ្នកប្រជាធិបតេយ្យ​ដូច​គ្នា។ ជាចុងក្រោយលោកបានបង្ហាញថា លោកមានការសម្លឹងឃើញ មានតែគណបក្សសង្គ្រោះជាតិមួយគត់ ដែល​អាច​យកជាដៃគូរ ក្នុងការដឹកនាំប្រទេសឈានទៅរកលិទ្ធិប្រជាធិបតេយ្យពិតប្រាកដ។

លោក មុត ចន្ថា បានអះអាងថា៖ «បើចង់ឲ្យកម្ពុជាមានការផ្លាស់ប្តូរ ទាល់តែអ្នកប្រជាធិបតេយ្យរួបរួមគ្នា។ យើងត្រូវ​តែរួមកម្លាំង ជាមួយអ្នក​ប្រជាធិបតេយ្យដូចគ្នា។ បើអ្នកប្រជាធិបតេយ្យ ធ្វើការទីទៃៗពីគ្នា នោះជាបញ្ហាធំនៃការបែក​កម្លាំង​របស់អ្នក​ប្រជាធិបតេយ្យ។» អគ្គលេខាធិការរូបនេះ បានបញ្ជាក់ថា ឈរលើជំហរតែមួយនេះ វាអាស្រ័យ​ទៅ​លើពេលវេលាខាងមុខទៀត ថា តើពេលណាដែលត្រូវច្របាច់បញ្ចូលគ្នា នៃគណបក្សទាំងពីរនាពេលខាងមុខ។ លោក​បន្តថា ចាប់ពីពេលនោះតទៅ លោកនៅតែបន្តទុកនូវអត្តសញ្ញាណនៃគណបក្សជាតិនិយម រហូតដល់​ក្រោយ​ឆ្នាំ២០១៧ ដើម្បីការពារ និងរក្សានូវសមាជិកក្រុមប្រឹក្សាឃុំសង្កាត់។

«យើងរួបរួមនៅក្នុងបញ្ជីបោះឆ្នោតតែមួយ។ ឯការបោះឆ្នោត យើងបោះឆ្នោតឲ្យគណបក្សសង្គ្រោះជាតិ។ យើងរួប​រួមគ្នា ធ្វើការជាមួយគ្នាដើម្បីជាតិ។»

លោកបានពន្យល់យ៉ាងដូច្នេះថា៖ «បើយើងធ្វើនយោបាយដើម្បីជាតិ យើងត្រូវស្វែងរកអ្វី (គណបក្ស) ដែលមាន​ទិសដៅដូចគ្នា។ ហើយទៅតាមអ្វី ដែលជាបំណងប្រាថ្នារបស់ប្រជាពលរដ្ឋលោកចង់បាននូវការផ្លាស់ប្តូរ។ (…) ការ​ផ្លាស់​ប្តូរនេះអាចទៅបានលុះត្រា តែកម្លាំងអ្នកប្រជាធិបតេយ្យខ្លាំង និងមិនបែកខ្ញែកគ្នា។»

ជាមួយនឹងសំនួចោទសួរថា ហេតុអ្វីមិនរួមកម្លាំងជាមួយគណបក្សប្រជាជនកម្ពុជា ដែលជាគណបក្សមួយ​កំពុង​កាន់​អំណាចសព្វថ្ងៃនោះ លោកបានពន្យល់ថា ដោយគណបក្សលោកប្រកាន់គោលជំហរ គោលការណ៍ប្រជាធិបតេយ្យ និងគោរពនូវឆន្ទៈរបស់ប្រជាពលរដ្ឋ។ លោកបន្តថា ការដែលមិនចូលរួមជាមួយគណបក្សប្រជាជនកម្ពុជា ព្រោះថា មនោគមវិជ្ជានៃគណបក្សប្រជាជនកម្ពុជា ខុសគ្នានឹងគណបក្សជាតិនិយម ដោយឡែកត្រូវគ្នាជាមួយ​នឹង​មនោគមន៍​វិជ្ជា​នៃគណបក្សសង្គ្រោះជាតិ។

ទស្សនាវដ្តីមនោរម្យ.អាំងហ្វូ មិនអាចសុំប្រតិកម្មពីលោក ជៀម យាប មន្រ្តីជាន់ខ្ពស់នៃគណបក្សប្រជាជនកម្ពុជា ដើម្បីប្រតិកម្មតបចំពោះការលើកឡើងខាងលើរបសល់លោក មុត ចន្ថា បានទេ។ តែលោក ផៃ ស៊ីផាន មន្ត្រីនាំពាក្យ​នៃ​ទីស្ដីការ​គណៈរដ្ឋមន្ត្រី លោកមិនមានយោបល់អ្វីចំពោះការចូលរួមនៃគណបក្សទាំងពីរនោះទេ ព្រោះថានោះ​ជា​សិទ្ធិរបស់ពួកគេ។ តែយ៉ាងណាក៏ដោយលោក ក៏ដូចជាគណបក្សប្រជាជនកម្ពុជា ក៏មិនមានអ្វីជាការព្រួយបារម្មណ៍ និងប្លែកនោះទេ នូវសម្ព័ន្ធភាពថ្នីនេះ។ លោកបញ្ចាក់ដូចច្នេះថា «គណបក្សជាតិនិយមតែងតែទទួលបរាជ័យ ដោយ​ប្រជាពលរដ្ឋលោកមិនបោះឆ្នោតឲ្យ។ យើង (គណបក្សប្រជាជនកម្ពុជា) មានការពិសោធន៍ជាមួយការងារ ប្រជែង​តាមរយៈការបោះឆ្នោត តាំងពីពេលកន្លងមកហើយ។»

សូមរម្លឹកថា គណបក្សជាតិនិយម ត្រូវបានប្រសូតចេញ តាមរយៈការប្តូឈ្មោះពី«គណបក្សនរោត្តមរណឫទ្ធិ» កាល​ពីថ្ងៃសុក្រទី២៤ ខែសីហា ឆ្នាំ២០១២ បន្ទាប់ពីការការដកព្រះកាយរបស់ព្រះអង្គម្ចាស់នរោត្តម រណឫទ្ធិ ដែលធ្លាប់ជា​ព្រះប្រធានគណបក្សនេះ ចេញពីឆាកជីវិតជាអ្នកនយោបាយកាលពីថ្ងៃទី១០ ខែសីហា ឆ្នាំ២០១២។ គណបក្សនេះ​ធ្លាប់​បានចូលធ្វើសម្ព័នភាព ជាមួយគណបក្សហ្វុនស៊ីនប៉ិច នៅមុនការបោះឆ្នោតសកល ខែកក្កដាឆ្នាំ២០១៣ តែ​បាន​ប្រកាសបំបែកខ្លួនចេញពីសម្ព័ន្ធភាពនេះវិញ នៅថ្ងៃទី១៣ ខែមករា ឆ្នាំ២០១៤៕

--------------------------------------------------
ដោយ អ៊ុម វ៉ារី (ទំនាក់ទំនង៖ [email protected]) - ភ្នំពេញថ្ងៃទី០៧ មេសា ២០១៤

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...