ពាក្យ«បង្រួបបង្រួមជាតិ និងឯកភាពជាតិ» ដែលអតីតព្រះមហាក្សត្រព្រះបរមរតនកោដ្ឋ នរោត្តម សីហនុ ធ្លាប់មាន ព្រះរាជបន្ទូល កំពុងប្រឈមនឹងការបំពារបំពាន គួរឲ្យព្រួយបារម្ភ ក្នុងកាលៈទេសៈនៃការជាប់គាំងនយោបាយ ក្រោយការបោះឆ្នោតដ៏ប្រទាំងប្រទើស ព្រោះគណបក្សប្រជាជនកម្ពុជា និងគណសង្រ្គោះជាតិ ចុងក្រោយនេះ បាន​ប្រើប្រាស់វិធីការពារអំណាច និងទាមទារអំណាច ផ្ទុយពីលិទ្ធិប្រជាធិបតេយ្យ​នដែលជាសញ្ញាបង្ហាញថា​«ឯកភាព​ជាតិខ្មែរ» អាចនឹងត្រូវបែកបាក់។

លោកនាយករដ្ឋមន្ត្រី ហ៊ុន សែន នៅមន្ទីរដ្ឋសភាជាតិ កាលថ្ងៃទី២០ ខែធ្នូ ឆ្នាំ២០១៣។ (រូបថត MONOROOM.info/ O.Vary)

នយោបាយកម្ពុជា - ឆ្លើយតបនឹងការអំពាវនាវរបស់គណបក្សង្រ្គោះជាតិ លោក ហ៊ុន សែន នាយករដ្ឋមន្រ្តីកម្ពុជា និងជាមន្រ្តីជាន់ខ្ពស់របស់គណបក្សប្រជាជនកម្ពុជា ក្នុងពិធីមួយនៅខេត្តក្រចេះ នៅថ្ងៃទី១៨ ខែមករា ឆ្នាំ២០១៤ នេះ បានលើកឡើងថា ប្រជាពលរដ្ឋខ្មែរដែលបានបោះឆ្នោតគាំទ្រគណបក្សប្រជាជនកម្ពុជា ត្រូវក្រោកឈរឡើង​ទាំង​អស់គ្នា ប្រឆាំងជាមួយទង្វើ ដែលឈានទៅដល់ការផ្តួលរំលំរដ្ឋាភិបាល និងផ្ទុយពីរដ្ឋធម្មនុញ្ញ។ លោក ហ៊ុន សែន បញ្ជាក់ថា៖ «កម្ពុជា មិនមែនដូចនៅអេហ្ស៊ីប ទុយនេស៊ី និងលីប៊ីនោះឡើយ សូមស្តាប់ឲ្យច្បាស់ ឲ្យតែឈានដល់​ការផ្តួលរលំគេនឹងធ្វើហើយ។»

គួររម្លឹកថា ប្រតិកម្មរបស់បុរសខ្លាំងកម្ពុជា លោក ហ៊ុន សែន ដែលមានខ្លឹមសារ«បង្រ្កាប» នៅពេលនេះ គឺបានកើត​ឡើងតែមួយថ្ងៃតែប៉ុណ្ណោះ ក្រោយពីលោក កឹម សុខា អនុប្រធានគណបក្សសង្រ្គោះជាតិដែលជាគណបក្សជំទាស់ បានបញ្ជាក់ទៅកាន់អ្នកគាំទ្រថា៖ «ខ្ញុំសូមអំពាវនាវបងប្អូនទាំងក្នុង និងក្រៅប្រទេសក្រោឈរឡើងជាមួយគណបក្ស​សង្គ្រោះជាតិ ធ្វើមហាបាតុកម្មទូទាំងប្រទេស និងលើពិភពលោក ដើម្បីទាមទាររកយុត្តិធម៌ជូនម្ចាស់ឆ្នោត។» ជាមួយ​គ្នានោះ លោក កឹម សុខា បានចាត់ទុកការចូលរួមធ្វើមហាបាតុកម្ម គឺជាការរួមចំណែកដ៏សំខាន់មួយទៀតសម្រាប់​ស្ថានភាពនយោបាយបច្ចុប្បន្ន និងជាការធ្វើឲ្យរដ្ឋាភិបាលគណបក្សប្រជាជនកម្ពុជា បញ្ឈប់ការបាញ់សម្លាប់ជាតិ​សាសន៍ខ្មែរដូចគ្នា។

ចំពោះជម្លោះនយោបាយដ៏តានតឹងនៅកម្ពុជា លោក សុរិយា ស៊ូប៊ែឌី ជាអ្នករាយការណ៍ពិសេស ស្ដីពីសិទ្ធិមនុស្ស​របស់អង្គការសហប្រជាជាតិ​ប្រចាំកម្ពុជា បានលើកឡើងក្នុងពេលបំពេញបេសកកម្មនៅកម្ពុជា កាលពីពេលថ្មីៗ​នេះ​ថា រូបលោកផ្ទាល់ សហគមន៍អន្តរជាតិ ក៏ដូចជាអង្គការសហប្រជាជាតិនឹងពិចារណា ក្នុងការធ្វើជាអាជ្ញា​កណ្កាល ដើម្បីសម្របស្រួលបិទបញ្ចប់វិបត្តិនេះ តែអ្វីសំខាន់ គឺអាស្រ័យលើការចរចា របស់គណបក្សទាំងពីរ ថាតើអ្វីដែលល្អ​បំផុត និងអាចជាប្រយោជន៍សម្រាប់ពលរដ្ឋកម្ពុជា និងប្រទេសកម្ពុជាទាំងមូល។

ជុំវិញវិវាទនយោបាយ ដែលកើតចេញពីភាពមិនចុះសម្រុងគ្នា រវាងគណបក្សប្រជាជនកម្ពុជា និងគណបក្សសង្រ្គោះ​ជាតិ ត្រូវបានអ្នកតាមដានស្ថានការណ៍នយោបាយ និងអ្នកវិភាគឯករាជ្យកម្ពុជាពន្យល់ថា គណបក្សប្រជាជនកម្ពុជា ក៏ដូចជារដ្ឋាភិបាល នឹងត្រូវថ្កោលទោសជាទូទៅ និងការមិនទទួលស្គាល់ពីភាពស្របច្បាប់ ពីសហគមន៍ជាតិ និង​អន្តរជាតិ ប្រសិនបើមានការបង្រ្កាបយ៉ាងហិង្សា ដែលបណ្តាលឲ្យមានអ្នកស្លាប់ និងអ្នករបួស ក្នុងយុទ្ធនាការការពារ​អំណាចរបស់ខ្លួន ។

រីឯគណបក្សសង្រ្គោះជាតិ ដែលជាគណបក្សជំទាស់ បើទោះជាមានអ្នកគាំទ្រច្រើនលើសលុបយ៉ាងណាក៏ដោយ ក៏​មិនអាចឡើងទៅគ្រប់គ្រងប្រទេស តាមរយៈអំណាចប្រជាពលរដ្ឋ ដោយរំលងការបោះឆ្នោត តាមបែបប្រជា​ធិបតេយ្យ​បានដែរ ព្រោះសហគមន៍អន្តរជាតិមិនអាចទទួលស្គាល់ ពីភាពស្របច្បាប់របស់រដ្ឋាភិបាល​ដែលឡើង​គ្រប់គ្រងអំណាចតាមរបៀបនេះបានទេ។

លោក កែម ឡី ធ្លាប់បានលើកឡើងនៅក្នុង កិច្ចប្រជុំពិភាក្សាមួយ នៅសកលវិទ្យាល័យខេមរៈ ថាដំណោះស្រាយ​ល្អបំផុត​សម្រាប់គណបក្សទាំងពីរ ក៏ដូចការទម្លាយភាពជាប់គាំងនយោបាយនៅក្នុង​កាលៈទេសៈបច្ចុប្បន្ន ពិសេស​ជៀសវាងការបែកបាក់ជាតិដ៏ជ្រាលជ្រៅ គឺមានតែការបោះឆ្នោតឡើងវិញ ក្រោយការកែទម្រង់​គណៈកម្មាធិការជាតិ​រៀបចំការបោះឆ្នោត (គ.ជ.ប) តែប៉ុណ្ណោះ។ អ្នកវិភាគឯករាជ្យជំនាញខាងបញ្ហាសង្គមរូបនេះ បានពន្យល់ថា ក្នុង​ករណីគណបក្សទាំងពីរ ព្រមព្រៀងគ្នាជា«កញ្ចប់» ជា​លាយល័ក្ខអក្សរបណ្តោះអាសន្ន ធ្វើការបោះឆ្នោតមុនអាណត្តិ តាមរយៈការចូលប្រជុំរដ្ឋសភា និងការចចារគ្នា​«ក្រៅ​ផ្លូវការ» ធ្វើវិសោធនកម្មរដ្ឋធម្មនុញ្ញ និងច្បាប់បោះឆ្នោត ក្នុងការ​កំណត់កាលបរិច្ឆេទថ្មី នៃការបោះឆ្នោតមុនអាណត្តិ (២០១៥ ឬ២០១៦)។ ទាំងនេះវាមិនបានផ្តល់ផល​ប្រយោជន៍​ណាមួយ ទៅឲ្យគណបក្សទាំងពីរនោះទេ តែជា​ដំណោះ​ស្រាយមួយស្របនឹងច្បាប់ ហើយបានផ្តល់ផលប្រយោជន៍​ទៅជាតិ និងប្រជាជន។

សូមបញ្ជាក់ដែរថាកន្លងមក តាមរយៈការចរចា រវាងគណបក្សប្រជាជនកម្ពុជា និងគណបក្សសង្រ្គោះជាតិ ក៏បាន​បង្ហាញថា ពួកគេមានចំណុចរួមគ្នា ដើម្បីទម្លាយភាពជាប់គាំងនយោបាយ គឺការបញ្ជៀសអំពើហិង្សា និងការកែ​ទម្រង់ (គ.ជ.ប) តែខុសគ្នាត្រង់ការកំណត់ពេលវេលា ដែលត្រូវបោះឆ្នោតឡើងវិញប៉ុណ្ណោះ។ បើគង់នឹងត្រូវបោះឆ្នោត​ទៀត​ដដែល សម្បទានមួយជំហានទៅវិញទៅមក មិនមែនជាការគាប់ប្រសើរទេឬ? ប៉ុន្តែចំពោះបញ្ហាមនុស្ស និងអំណាច មានតែ​ទេវតាទេដែលដឹងត្រូវធ្វើយ៉ាងណា៕

--------------------------------------
ដោយ អ៊ុំ បូរី (ទំនាក់ទំនង៖ [email protected]) - ភ្នំពេញ ថ្ងៃទី១៨ ខែមករា ឆ្នាំ២០១៤