បក្ស​សង្គ្រោះ​ជាតិ​មិន​ទាន់​ជឿ​ថា អង្គការ​សហ​ប្រជាជាតិ​ទទួល​ស្គាល់​រដ្ឋាភិបាល

រដ្ឋាភិបាលកម្ពុជាបានអះអាងថា អង្គការសហប្រជាជាតិបានសម្តែងការទទួលស្គាល់ខ្លួនជាផ្លូវការ តែការអះអាងនេះ​ត្រូវ​បានគណបក្សសង្រ្គោះជាតិ ដែលជាគណបក្សជំទាស់ លើកឡើងថាវាអាចជារឿងមិនពិត។ ការអះអាងផ្ទុយគ្នា រវាង​រដ្ឋាភិបាល និងគណបក្សសង្រ្គោះជាតិ នៅពេលនេះ គឺស្របពេលដែល​ប្រទេស​កម្ពុជា កំពុងមានភាពទាល់ច្រក​នយោបាយ​នៅឡើយ។ ក្រុមអ្នកតំណាងរាស្រ្ត របស់គណបក្សសង្រ្គោះជាតិ ទាំង៥៥រូប នៅ​តែបន្តធ្វើពហិការមិនចូលរួមប្រជុំរដ្ឋសភា និងជម្រុញឲ្យសហគមន៍អន្តរជាតិ បដិសេធមិនទទួលស្គាល់​រដ្ឋាភិបាល​ឯកបក្ស ដែលទើបតែបង្កើតឡើង​កាលពីពេលថ្មីៗ​នេះ។
Loading...
  • ដោយ: អ៊ុំ បូរី
  • កែប្រែចុងក្រោយ: October 11, 2013
  • ប្រធានបទ:
  • អត្ថបទ: មានបញ្ហា?
  • មតិ-យោបល់

រដ្ឋាភិបាលកម្ពុជាបានអះអាងថា អង្គការសហប្រជាជាតិបានសម្តែងការទទួលស្គាល់ខ្លួនជាផ្លូវការ តែការអះអាងនេះ​ត្រូវ​បានគណបក្សសង្រ្គោះជាតិ ដែលជាគណបក្សជំទាស់ លើកឡើងថាវាអាចជារឿងមិនពិត។


លោកហ៊ុន សែន ក្នុងពេលដំណើរទស្សនកិច្ចរបស់លោក បាន គី-មូន អគ្គលេខាធិការ អ.ស.ប នៅកម្ពុជា កាលពីថ្ងៃ​ទី២៧​ខែតុលាឆ្នាំ២០១០។  (រូបថត AP/Heng Sinith)

រាជធានីភ្នំពេញ - ការអះអាងផ្ទុយគ្នា រវាង​រដ្ឋាភិបាល និងគណបក្សសង្រ្គោះជាតិ នៅពេលនេះ គឺស្របពេលដែល​ប្រទេស​កម្ពុជា កំពុងមានភាពទាល់ច្រក​នយោបាយ​នៅឡើយ។ ក្រុមអ្នកតំណាងរាស្រ្ត របស់គណបក្សសង្រ្គោះជាតិ ទាំង៥៥រូប នៅ​តែបន្តធ្វើពហិការមិនចូលរួមប្រជុំរដ្ឋសភា និងជម្រុញឲ្យសហគមន៍អន្តរជាតិ បដិសេធមិនទទួលស្គាល់​រដ្ឋាភិបាល​ឯកបក្ស ដែលទើបតែបង្កើតឡើង​កាលពីពេលថ្មីៗ​នេះ។

រដ្ឋមន្រ្តីប្រតិភូអមនាយករដ្ឋមន្រ្តី លោក កៅ គឹមហួន នាអាកាសយានដ្ឋានអន្តរជាតិភ្នំពេញ បានថ្លែងប្រាប់អ្នក​ការសែត នៅ​ថ្ងៃទី១០ ខែតុលា ឆ្នាំ២០១៣ ថា ក្នុងជំនួបរវាងលោក បាន គីមូននិងលោក ហ៊ុន សែន នៅប្រទេសប្រុយណេ លោក បាន គីមូន អគ្គលេខាធិការអង្គការសហប្រជាតិ បានកោតសរសើរ ចំពោះការបោះឆ្នោតនៅប្រទេសកម្ពុជា ថាបានប្រព្រឹត្តទៅ ដោយរលូន និងសន្តិភាព។

តែការលើកឡើងនេះត្រូវបានលោក យ៉ែម ប៉ុញ្ញឬទ្ធិ បានថ្លែងប្រាប់ទស្សនាវដ្តីមនោរម្យព័ងអាំងហ្វូ នៅថ្ងៃទី១១ ខែតុលា ឆ្នាំ​២០១៣ នេះថា វាពិបាកនឹងមានការជឿជាក់ណាស់ ចំពោះព័ត៌មាននេះ ព្រោះវាគ្រាន់តែជាការអះអាង​របស់អ្នកការទូត​កម្ពុជា តែម្ខាងតែប៉ុណ្ណោះ ហើយអ្វីគ្រប់យ៉ាង គឺអាស្រ័យលើពលរដ្ឋកម្ពុជា កំពុងរង់ចាំមើលជាបន្តពីគោលជំហរពិតប្រាកដ របស់សហរដ្ឋអាមេរិក សហភាពអ៊ឺរ៉ុប និងអង្គការសហប្រជាជាតិជាដើម ។

អ្នកនាំពាក្យគណបក្សជំទាស់រូបនេះ អះអាង​ថា​បើទោះជាការបោះឆ្នោត នៅកម្ពុជាបានប្រព្រឹត្តទៅ ដោយគ្មានអំពើហិង្សា និងសន្តិភាព​យ៉ាង​ណា​ក្តី ក៏ការបោះឆ្នោតនេះត្រូវបានគេរកឃើញ ថាមានភាពមិនប្រក្រតីធ្ងន់ធ្ងរ ដែលធ្វើឲ្យប៉ះពាល់ដល់​លទ្ធផលបោះឆ្នោត។ លោក យ៉ែម ប៉ុញ្ញឬទ្ធិ បញ្ជាក់ថា៖ «នៅ​ពេល​នេះ យើងកំពុងតែរកស្នាមមេដៃឲ្យបានរាប់លាន ដើម្បី​ដាក់ទៅ​អង្គការ​សហប្រជាជាតិ»។

បើទោះជាឥស្សរជននយោបាយ មកពីគណបក្សប្រជាជនកម្ពុជា និងគណបក្សសង្រ្គោះជាតិ បានធ្វើការអះអាងខុសគ្នា ដែលគេអាចយល់បានថា វាជាការអះអាងមានលក្ខណៈនយោបាយ យ៉ាងណាក៏ដោយ ក៏នៅលើគេហទំព័ររបស់​អង្គការ​សហប្រជាតិ បានបង្ហាញច្បាស់ថា ក្នុងជំនួបរវាងលោក បាន គីមូន និងលោក ហ៊ុន សែន អគ្គលេខាងធិការអង្គការ​សហ​ប្រជាជាតិ លោក បាន គីមូន ពិតជាបានការកោតសរសើរ ចំពោះការបោះឆ្នោតនៅកម្ពុជា ថាបានប្រព្រឹត្តទៅ ដោយរលូន និងសន្តិភាព និងបានអបអរសាទរចំពោះលោក ហ៊ុន សែន ដែលបានឈ្នះការបោះឆ្នោតនៅកម្ពុជា។

ទន្ទឹមនឹងការលើកឡើងនេះ លោក បាន គីមូន ក៏បានលើកឡើងពីបញ្ហា ការគោរពសិទ្ធិមនុស្ស ការគោរពលទ្ធិ​ប្រជា​ធិបតេយ្យ ការមិនចូលរួមប្រជុំសភារបស់គណបក្សសង្រ្គោះជាតិ និងការស្មើរបស់លោក សម រង្ស៊ី ឲ្យព្យួរបេក្ខភាពរបស់​កម្ពុជានៅអង្គការសហប្រជាជាតិជាដើម។ តែលោក កៅ គឹមហួន មិនបានលើកយកបញ្ហាទាំងអស់នេះ បា្រប់អ្នកសារព័ត៌ នៅព្រលានយន្តហោះអន្តរជាតិនោះទេ។

លោក គល់ បញ្ញា នាយកប្រតិបត្តិនៃគណៈកម្មាធិការ ដើម្បីការបោះឆ្នោតដោយសេរី និងយុត្តិធម៌នៅកម្ពុជា ហៅកាត់ថា ខុមហ្រ្វែល ពន្យល់ថាប្រសិនបើលោក បាន គីមូន បានសម្តែងការទទួលស្គាល់មែននោះ ក៏រដ្ឋាភបាល​ត្រូវពិចារណាថា​អង្គការសហប្រជាតិ និងអ្នករាយអ្នករាយការណ៍ពិសេស របស់អង្គការសហប្រជាជាតិ ទទួលបន្ទុកសិទ្ធិមនុស្សនៅកម្ពុជា លោក សូរិយា សូបេឌី និងប្រទេសធំៗមួយចំនួនទៀត ធ្លាប់លើកឡើងពីភាពមិនប្រក្រតីក្នុងកំឡុងពេលបោះឆ្នោត និង​ទាមទារឲ្យមានការស៊ើបអង្កេត។ ដូច្នេះការដែល អគ្គលេខាធិការ អង្គការសហប្រជាជាតិ និងប្រទេសមួយចំនួន​ផ្សេង​ទៀត​ប្រកាសទទួលស្គាល់ នៅចំពោះ​លោក ហ៊ុន សែន វាគ្រាន់តែជានយោបាយការទូតរបស់គេ តែប៉ុណ្ណោះ។ លោក គល់ បញ្ញា បញ្ជាក់ថា៖ «រដ្ឋាភិបាលត្រូវ​ធានា និត្យានុកូលភាព (ភាពស្របច្បាប់) របស់ខ្លួន ខណៈគណបក្សជំទាស់មិនទាន់​ទទួល​ស្គាល់នៅឡើយ»។

---------------------------------------------
ដោយ៖ អ៊ុំ បូរី - ថ្ងៃទី១១ ខែតុលា ឆ្នាំ២០១៣
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...