វិបត្តិ​នៅ​អ៊ុយក្រែន៖ សង្គ្រាម​លោក​លើក​ទី​៣ ហៀប​នឹង​ផ្ទុះ​ឡើង !

អតីតមេបញ្ជាការនៃក្រុមចារកម្ម កាហ្សេប៊េ (KGB) របស់អតីតសហភាពសង្គមនិយមសូវៀត និងជាអតីតនាយក​ការិយាល័យ​ស៊ើបការណ៍សម្ងាត់ (SBU) របស់ប្រទេសអ៊ុយក្រែន លោក អ៊ីហ្គ័រ ស្មេកូ (Igor Smeshko) បានថ្លែងនៅ​ក្នុង​កិច្ច​សម្ភាសពិសេសមួយ ថាប្រទេសអ៊ុយក្រែនរបស់លោក ត្រូវឆ្លើយតបតាមផ្លូវយោធា ប្រឆាំងនឹងការ​ឈ្លាន​ពាន​​របស់​ប្រទេសរ៉ូស្សី។ ការតដៃរបស់ប្រទេសអ៊ុយក្រែន ដែលអាចនឹងធ្វើឲ្យសង្គ្រាមលោកលើកទី៣ ផ្ទុះឡើង។
វិបត្តិ​នៅ​អ៊ុយក្រែន៖ សង្គ្រាម​លោក​លើក​ទី​៣ ហៀប​នឹង​ផ្ទុះ​ឡើង !
កងទ័ពរបស់ប្រទេសអ៊ុយក្រែន កំពុងត្រៀមនៅតាមបណ្ដោយព្រំដែនរបស់ខ្លួន។ (រូបថត REUTERS/Yannis Behrakis)
Loading...
  • ដោយ: ឈូករ័ត្ន ([email protected]) - ប៉ារីស​ ថ្ងៃទី២២ មីនា ២០១៤
  • កែប្រែចុងក្រោយ: March 23, 2014
  • ប្រធានបទ: វិបត្តិអ៊ុយក្រែន
  • អត្ថបទ: មានបញ្ហា?
  • មតិ-យោបល់

វិបត្តិអ៊ុយក្រែន - លោក អ៊ីហ្គ័រ ស្មេកូ (Igor Smeshko) ធ្លាប់ជាមេបញ្ជាការនៃក្រុមចារកម្ម កាហ្សេប៊េ (KGB) និងជា​នាយក​ការិយាល័យស៊ើបការណ៍សម្ងាត់ របស់រដ្ឋអ៊ុយក្រែន (SBU) ក្នុងអំឡុងពេលដែលរដ្ឋនេះ បានស្ថិតនៅ​ជា​ទឹកដី​មួយផ្នែក របស់សហភាពសូវៀត។ នៅក្នុងតួនាទីនេះ លោក អ៊ីហ្គ័រ ស្គាល់សឹងតែទាំងអស់ ពីអាថ៌កំបាំងយោធា​របស់​ប្រទេសទាំងសងខាង។ នៅក្នុងកិច្ចសម្ភាសដោយផ្ទាល់មួយ បុរសចូលនិវត្តន៍រូបនេះ បានបញ្ចេញកំហឹង​របស់​លោក ប្រឆាំងនឹងប្រធានាធិបតីរ៉ូស្សី លោក វ្លាឌីមៀ ពូទីន (Vladimir Poutine) ដោយបានចោទមេដឹកនាំរ៉ូស្សី​មាឌ​តូចតែខ្លាំងរូបនេះ ថា«បានបញ្ឆេះភ្លើង នៅទ្វីបអ៊ឺរ៉ុប ឲ្យ​ចូលក្នុងសង្គ្រាមលោកលើកទី៣»។

ហួសពីខឹងលោក វ្លាឌីមៀ ពូទីន អតីតមន្ត្រីចារកម្មលោក អ៊ីហ្គ័រ ស្មេកូ ក៏បានសម្ដែងការខឹងសម្បារដ៏ខ្លាំងដូចគ្នាដែរ ដាក់រដ្ឋាភិបាលអ៊ុយក្រែនបច្ចុប្បន្ន ថាមិនបានធ្វើអ្វីទាំងអស់ដើម្បីបញ្ជៀសការកាត់ទឹកដី គ្រីមៀរ ដោយប្រទេស​រ៉ូស្សី និងដើម្បីបង្ហាញទៅលោក ពូទីន ថា ប្រទេសអ៊ុយក្រែនមានសមត្ថភាពអាចការពារខ្លួនបាននោះ។

កាយវិការរបស់អតីតមន្ត្រីចារកម្មធ្វើឲ្យគេយល់ថា លោកនៅមិនទាន់ឃ្លាតនៅឡើយ ពីការណ៍សម្ងាត់​ទាំង​ឡាយ ជា​ពិសេសទាក់ទងនឹងវិស័យកងទ័ព និងសន្តិសុខ នៃប្រទេសទាំងពីរ រ៉ូស្សី-អ៊ុយក្រែន។ លោក​បានអះអាងថា ប្រទេស​អ៊ុយក្រែន បានត្រៀមខ្លួនរួចជាស្រេចហើយ ក្នុងការតបតរប្រឆាំងនឹងប្រទេសរ៉ូស្សី ដោយសារ​កងទ័ព​អ៊ុយក្រែន​ប្រមាណ ៧សែននាក់។ លោកបានបញ្ជាក់ថា លោកស្រឡាញ់ប្រជាជនរ៉ូស្សី តែ​«មិនស្រឡាញ់មេដឹកនាំ​របស់​រ៉ូស្សី» របៀបដូចសព្វថ្ងៃនេះឡើយ។ លោកទទួលស្គាល់ថា៖ «កងទ័ពអ៊ុយក្រែន​មិន​បានធ្វើទំនើបកម្ម ជាយូរ​ណាស់​មក​ហើយ ដូច្នេះយើងមិនអាចវាយលុកត្រឡប់ ទៅលើទឹកដីរ៉ូស្សីវិញទេ។ តែយើង​មានសមត្ថភាព ក្នុងការ​ការពារដី​មួយ​ដុំ​របស់​ប្រទេសយើង។»

«មានគិញសម្ងាត់រ៉ូស្សីរាប់រយនាក់ នៅលើទឹកដីអ៊ុយក្រែន។ យើងដឹងយ៉ាងច្បាស់ថា ពួកគេជានរណា និងនៅឯណា ដោយសារតែថ្មីៗនេះ ពួកគេទើបនឹងបានលាក់ខ្លួនប៉ុណ្ណោះ។  បើយើងចាប់គិញសម្ងាត់ប៉ុន្មាននាក់នោះ វាគ្រប់គ្រាន់​នឹងបង្ហាញទៅ វ្លាឌីមៀរ ពូទីន ថា អ៊ុយក្រែនមិនមែន"ខ្សោយ"ដូចអ្វីដែល ពូទីន គិតឡើយ។ រឿងសំខាន់មួយទៀត ដែល វ្លាឌីមៀ ពូទីន មិនបានយល់៖ ប្រទេសរ៉ូស្សី ជាខ្លាចាស់ដែលនៅតែខ្លាំង ដោយសារតែអាវុធ​នុយក្លេអ៊ែររបស់​ខ្លួន​ប៉ុណ្ណោះ។ ប៉ុន្តែកងអន្តរាគមន៍របស់រ៉ូស្សី មិនទាន់បានត្រៀមខ្លួនរួចជាស្រេច សម្រាប់ចម្បាំងប្រឆាំងនឹងកងទ័ព​តស៊ូ​របស់យើងនោះទេ។ ចម្បាំងដែលធ្លាប់កើត នៅតំបន់កូកាស (Caucase) ជាអំណះអំណាងឲ្យឃើញស្រាប់​ហើយ។ រ៉ូស្សី មិនពិបាកនឹងធ្វើសង្គ្រាម ប្រឆាំង ហ្សេអកហ្សី (Géorgie) ដ៏តូចនោះទេ។ តែប្រទេសអ៊ុយក្រែនវិញ មាន​ប្រជាជន​ដល់ទៅជាង៤០លាននាក់ ហើយឪពុកម្ដាយជនជាតិរ៉ូស្សី នឹងមិនទុកឲ្យកូនចៅរបស់ខ្លួន ចេញទៅធ្វើ​សង្គ្រាម​ដែល​គ្មានបុព្វហេតុត្រឹមត្រូវ ថែមទាំងត្រូវបង់ជីវិតយ៉ាងវេទនានោះឡើយ។»

លោក អ៊ីហ្គ័រ ស្មេកូ បានឡើងជានាយកក្រុមចារកម្មរបស់ប្រទេសអ៊ុយក្រែន នៅឆ្នាំ២០០០។ ប៉ុន្តែប្រធានាធិតបី ដែល​ទើបនឹងត្រូវគេបណ្ដេញចេញពីតំណែង លោក វិចទ័រ អ៊ូចឆិនកូ (Viktor Iouchtchenko) បានបញ្ឈប់លោក​ពី​នាយក​ក្រុមចារកម្មនេះ នៅឆ្នាំ២០០៦ ពោលគឺមួយឆ្នាំក្រោយ ពីការជាប់ឆ្នោតជាប្រធានាធិបតីនៅឆ្នាំ២០០៥។ បើ​ទោះ​ជា​លោកអស់តួនាទី នៅក្នុងរដ្ឋាភិបាលក៏ដោយ តែលោក ស្មេកូ មិនបានអស់ទឹកចិត្តស្រឡាញ់ជាតិ ទឹកដី និង​ប្រជាជន​អ៊ុយក្រែននោះទេ។ ហើយក៏ជាហេតុផល ដែលធ្វើឲ្យលោកបានបង្កើត គណបក្សនយោបាយតូចមួយ ក្នុង​និន្នាការប្រឆាំង​នឹង«អំពើពុករលួយ» ដែលជាដំបៅយ៉ាងធំ នៅក្នុងសង្គមអ៊ុយក្រែនកន្លងមក។

សម្រាប់ចំណាត់ការប្រឆាំង នឹងការឈ្លានពានរបស់ប្រទេសរ៉ូស្សី លោក ស្មេកូ បានរិះគន់យ៉ាងខ្លាំងក្លា ប្រឆាំងនឹង​រដ្ឋាភិបាលបណ្ដោះអាសន្នសព្វថ្ងៃ របស់ប្រទេសអ៊ុយក្រែន ដែលលោកគិតថា មិនបានធ្វើអ្វីសោះ ដើម្បីការពារទឹកដី​ប្រទេសរបស់ខ្លួន។ លោកបានរៀបរាប់ថា «ខ្ញុំមានមិត្តភ័ក្រជាច្រើន ដែលបានទូរស័ព្ទមកខ្ញុំ និយាយថា បើសិនជា​ពួកគេទទួលបញ្ជាឲ្យទប់ស្កាត់ ពួកគេនឹងដាក់ពង្រាយកម្លាំង ដើម្បីបញ្ជៀសកងកម្លាំងរ៉ូស្សី មិនឲ្យចូលមកកាត់​យក​ទឹកដីគ្រីមៀដូច្នេះទេ ឬយ៉ាងហោចណាស់ដើម្បីការពារបន្ទាយទាហានរបស់យើង នៅទីនោះដែរ។ តែផ្ទុយទៅវិញ យើងបាត់បង់អ្វីទាំងអស់ ហើយទាហានរបស់យើងត្រូវបានបញ្ជា មិនឲ្យបាញ់ថែមទៀត។ ទាំងនេះ គឺដោយសារតែ​រដ្ឋាភិបាល មិនបានបញ្ជាឲ្យធ្វើសកម្មភាព។ យើងជាអ្នកបង្ហាញថា យើងខ្សោយ និងមិនច្បាស់លាស់។»

លោកថែមទាំងបានបរិហាខ្លាំងៗទៀតថា នៅពេលមានការគម្រាមរបស់ប្រទេសរ៉ូស្សីដំបូង នាវាចម្បាំងអ៊ុយក្រែន មិនគួរត្រូវចាកចេញយ៉ាងទាន់ហន់ ពីដែនទឹកសមុទ្ររបស់ប្រទេសអ៊ុយក្រែនយ៉ាងដូច្នេះទេ។ លោកបានថ្លែងទាំង​ក្ដៅក្រហាយ​ថា «វាគ្រប់គ្រាន់ណាស់ទៅហើយ ដោយត្រឹមតែបញ្ជូននាវាចម្បាំងរបស់យើង ឆ្ពោះទៅកាន់ដែនទឹក​សមុទ្រអន្តរជាតិប៉ុណ្ណោះ។ កងទ័ពរ៉ូស្សី មិនហានបាញ់នាវាយើងឡើយ ហើយយើងក៏អាចនៅត្រួត​ស្ថាន​ការណ៍​​នាវា​របស់យើងផ្សេងទៀត នៅគ្រីមៀនោះដែរ។ តែផ្ទុយទៅវិញ យើងជាអ្នកបង្ហាញថា យើងអន់ ហើយ វ្លាឌីមៀរ ពូទីន នឹងបានចិត្តកាន់តែខ្លាំង។»

«មុននេះ ពូទីន មិនហ៊ានធ្វើអញ្ចឹងទេ ព្រោះ ពូទីន ខ្លាចពួកម៉ៃដាន (Maïdan - ចលនាកម្លាំងមហាជនអ៊ុយក្រែន ស្និត​នឹងបស្ចឹមលោក ដែលទើបនឹងផ្ដួលប្រធានាធិបតី វិចទ័រ អ៊ូចឆិនកូ ចេញពីអំណាច)។ ពូទីន ចង់បញ្ជៀស​ហេតុ​ការណ៍​របៀបនេះ នៅរ៉ូស្សី។ តែអ្វីដែលពូទីនធ្វើ នៅគ្រីមៀ នឹងបកត្រឡប់ទៅរក ពូទីន វិញ។ ពូទីន នឹងបាត់បង់​អស់​នូវ​អំណាច ដោយសារអ្វីដែលពូទីន បានធ្វើនៅគ្រីមៀ និងព្រោះទាំងអស់គ្នា បានយល់ក្នុងពេលនេះថា អត្ថន័យរួម​របស់ ពូទីន បានបាត់បង់អស់ទៅហើយ។»៕

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...