ព្រហ្ម វិចិត្រ ជីវិត​ក្រាញ​ននៀល លើ​វិថី​«សិល្បៈ​គំនូរ-ចម្លាក់»

មនុស្សដែលស្រឡាញ់គំនូរ ច្បាស់ជាធ្លាប់លឺធ្លាប់ស្គាល់ វិចិត្រករមួយរូប ដែលលោកបានចំណាយពេលវេលា សឹង​តែមួយជីវិតរបស់លោក សម្រាប់តែសិល្បៈគំនូរ។ វិចិត្រករនោះ មានឈ្មោះថា ព្រហ្ម វិចិត្រ។ ប៉ុន្តែមិនមែនតែសិល្បៈ គំនូរនិងចម្លាក់ប៉ុណ្ណោះនោះទេ តែវិចិត្រកររូបនេះនៅបានបូជាខ្សែជីវិត និងញើសឈាមរបស់លោក ដើម្បីកុមារ​ក្នុង​ប្រទេស​កម្ពុជានោះ តាមរយៈអង្គការមួយ ដែលលោកបានពុះពារបង្កើតឡើងថែមទៀតផង។
Loading...
  • ដោយ: ក. សុខឃៀង
  • កែប្រែចុងក្រោយ: February 23, 2014
  • ប្រធានបទ:
  • អត្ថបទ: មានបញ្ហា?
  • មតិ-យោបល់

មនុស្សដែលស្រឡាញ់គំនូរ ច្បាស់ជាធ្លាប់លឺធ្លាប់ស្គាល់ វិចិត្រករមួយរូប ដែលលោកបានចំណាយពេលវេលា សឹង​តែមួយជីវិតរបស់លោក សម្រាប់តែសិល្បៈគំនូរ។ វិចិត្រករនោះ មានឈ្មោះថា ព្រហ្ម វិចិត្រ។ ប៉ុន្តែមិនមែនតែសិល្បៈ គំនូរនិងចម្លាក់ប៉ុណ្ណោះនោះទេ តែវិចិត្រកររូបនេះនៅបានបូជាខ្សែជីវិត និងញើសឈាមរបស់លោក ដើម្បីកុមារ​ក្នុង​ប្រទេស​កម្ពុជានោះ តាមរយៈអង្គការមួយ ដែលលោកបានពុះពារបង្កើតឡើងថែមទៀតផង។


វិចិត្រករ ព្រហ្ម វិចិត្រ។ (រូបថត MONOROOM.info/ Sokkheang)

ជីវិតសិល្បៈករ - ទេពកោសល្យជាសិល្បៈករ មិនមែននរណាក៏មានទាំងអស់គ្នានោះទេ។ ប៉ុន្តែបើសិនជាមាន​ទេពកោសល្យហើយ គ្មានការប្រឹងប្រែងនោះ ក៏មិនមានភាពជោគជ័យនោះដែរ។ នេះជាការចាប់ផ្ដើមនៃដំណើរ​ជីវិត​ដំបូងរបស់យុវជន ព្រហ្ម វិចិត្រ នៅពេលដែលលោកបានធំដឹងក្ដី នៅក្នុងរបបសាធារណរដ្ឋខ្មែររបស់លោក លន់ នុល។ យុវជនដែលស្រលាញ់ចូលចិត្តសិល្បៈគំនូរ តាំងពីកំណើតផងនោះ លោកមិនដែលចោលការ​ប្រឹងប្រែង​របស់​ខ្លួន ទៅសិក្សាយកជំនាញនេះបន្ថែមនៅសាលាវិចិត្រសិល្បៈ នៅខណៈពេលដែលលោក កំពុងសិក្សាចំណេះទូទៅ នៅក្នុងវិទ្យាល័យឥន្ទ្រទេវីនោះឡើយ។

ស្ថិតក្នុងវ័យ៦០ឆ្នាំនាពេលនេះ លោក ព្រហ្ម វិចិត្រ បានផ្ដល់កិច្ចសម្ភាសឲ្យទស្សនាវដ្ដីមនោរម្យ.អាំងហ្វូ ដោយរំលឹក​ពីជីវិតរបស់លោក ក្នុងរយៈពេលជាង៣០ឆ្នាំចុងក្រោយនេះទៀតថា លោកធ្លាប់ជាបុគ្គលិក នៅអង្គការ​ទស្សនៈ​ពិភពលោក (World Vision) យ៉ាងចាស់វស្សាមួយរូប។ រយៈពេលជាង២៥ឆ្នាំ ដែលលោកនៅជាមួយអង្គការនេះ លោកមិនបានពេញចិត្តនឹងការងាររបស់ខ្លួន ជាអ្នកបោះពុម្ពផ្សាយលិខិតស្នាមផេ្សងៗ ប្រចាំអង្គការពិភពលោក​មួយ​នេះឡើយ។

ម្យ៉ាងទៀត ដោយសារតែអង្គការនេះ មានទំនោរទៅរកសាសនាគ្រឹស្ត៍ ផ្ទុយពីរូបលោកដែលជាអ្នក​កាន់​សាសនា​ព្រះពុទ្ធនោះ ទើបធ្វើឲ្យលោក ព្រហ្ម វិចិត្រ សំរេចចិត្តលះបង់ការងារនេះ ហើយងាកមករកអាជីពដើម ដែលរូប​លោក​ស្រឡាញ់ពីកំណើតនោះវិញ។ មិនត្រឹមតែប៉ុណ្ណោះ វិចិត្រកររូបនេះ នៅបន្តបង្ហូញើសឈាមផ្ទាល់ខ្លួនជាច្រើន ដើម្បី​បង្កើតអង្គការវិចិត្រករខែ្មរដើម្បីកុមារ មួយឲ្យចេញជារូបរាង និងបានចុះបញ្ជីនៅក្រសួងមហាផ្ទៃតាំងពីថៃ្ងទី២០ ខែ​មិថុនា ឆ្នាំ២០១៣នោះថែមទៀត។

សម្បុរស្រអែម ពាក់វ៉ែនតាធំៗ លោក ព្រហ្ម វិចិត្រ និងជានាយកប្រតិបត្តិរបស់អង្គការលោក បានរំលឹកឡើងវិញថា ការបង្កើតអង្គការវិចិត្រករខែ្មរដើម្បីកុមារ ទទួលបានផលជាផ្លែផ្កានេះ ក៏ដោយសារតែលោក មានកិច្ចសហការ​ជ្រោមជ្រែងពីវិចិត្រករជើងចាស់ ជើងថ្មីប្រមាណជា១០០នាក់ និងមានមួយចំនួនជាគ្រូបង្រៀនផ្នែកគំនូរផង បន្ទាប់​ពីមានការតាំងពិពណ៌គំនូរ ប្រចាំប្រទេសកម្ពុជា មុនគេបង្អស់មួយនៅឆ្នាំ២០០០។ ហើយបុព្វហេតុធំបំផុត​នៃអង្គការ​របស់លោក គឺការចែករំលែកចំណេះដឹងផ្នែកសិល្បៈគំនូរ ទៅដល់មនុស្សជំនាន់ក្រោយ ជាពិសេសកុមារ។

លោក ព្រហ្ម វិចិត្រ បានថ្លែងដោយមោទនភាពថា មិនថាក្មេងឬចាស់អោយមានតែឆន្ទៈចង់ចេះគូររូបចម្លាក់ គឺលោក​អាចបង្រៀនដូចគ្នាបានទាំងអស់។ ប៉ុន្តែសំរាប់ការពន្យល់វិញមានភាពខុសគ្នា ចំពោះកុមារអាចចាប់បច្ចេកទេស​គូរ​បាន៥នាទី ឯមនុស្សចាស់ ចាប់បានរហូតដល់១៥នាទី។ រីឯមូលដ្ឋានគ្រឹះនៃការគូររូបវិញ លោកបញ្ជាក់ថា ត្រូវស្គាល់​ពីប្រភេទខ្មៅដៃ ជ័រលុប ឬក្រដាស រប្រៀបគូរដូចដែលយើងរៀនគណិតវិទ្យា ត្រូវចេះបែងចែក វាស់ក្រលា ឬគុណ​ចែកលេខអោយស្មើទំហំក្រដាស អោយសាកសមជាមួយគំនូរដែលយើងគូរ។

វិចិត្រករវ័យចំណាស់ បានណែនាំឲ្យស្គាល់ និងជួបសម្ភាសជាមួយកូនសិស្សរបស់លោកម្នាក់ ឈ្មោះ ទួន សុភ័ក្រ្ត ដែលបានរៀនចប់ថ្នាក់បរិញ្ញាប័ត្រអក្សរសាស្រ្តអង់គ្លេស តែនៅកំពុងបន្តសិក្សាជំនាញជាអ្នក​គំនូរនេះ​បន្ថែម​ទៀត។ យុវសិស្សវ័យ២៧ឆ្នាំ បានថ្លែងថា «ខ្ញុំមានទំនោរចូលចិត្តសិល្បៈគំនូរចម្លាក់ ព្រោះតែយល់ថា គំនូរមួយយ៉ាងតែបង្កប់​តំលៃ និង អត្ថន័យច្រើន»។

លោក ព្រហ្ម វិចិត្រ បានរៀបរាប់បន្តដោយក្ដីសង្ឃឹមថា សិល្បៈគំនូររបស់អង្គការរបស់លោក នឹងអាចរក្សាកេរមរតក នៃសិល្បៈគំនូរ និងចម្លាក់ខែ្មរ អោយគង់វង្សល្បីល្បាញជុំវិញពិភពលោក។ តែទោះជាយ៉ាងណាក៏ដោយ ឧត្ដមគតិ​និងបុព្វហេតុដែលវិចិត្រករវ័យចំណាស់ បានបង្កើតឡើង ហើយរក្សាទុកក្នុងបេះដូង និងធ្វើសម្រេចជាលទ្ធផលនេះ មិនបានធ្វើជីវភាពគ្រួសាររបស់លោក ផ្លាស់ប្ដូរទៅរកភាពមានបាននោះទេ។ ប្រភពហិរញ្ញាវត្ថុនៃអង្គការរបស់លោក ដែលបានមកពីម្ចាស់ជំនួយ សប្បុរសជន ឬក៍បានមកពីចំណូលមួយចំនួន នៃការបង្រៀនរៀងរាល់ថ្ងៃសៅរ៍ និងថ្ងៃ​អាទិត្យនោះ ត្រូវចំណាយទៅវិញ នឹងការទិញសម្ភារៈគំនូរ និងជូនប្រាក់ខែទៅដល់គ្រូបង្រៀន។

ភរិយារបស់វិចិត្រករ អ្នកស្រី ភួង សូម៉ាលី ដែលអង្គុយនៅក្បែរនោះ បានសារភាពថា អ្នកស្រីធ្លាប់ខឹងស្វាមីអ្នកស្រី ដែលចេះតែប្រឹងរកលុយដើម្បីកុមារ។ តែទីបំផុតទៅ ស្ត្រីវ័យ ៤៩ឆ្នាំរូបនេះ បានយល់ និងទទួលស្គាល់ពី​ទឹកចិត្ត​របស់​ស្វាមីអ្នកស្រី ដែលលង់លុះតែនឹងអាជីពជាសិល្បៈករគំនូរ។ អ្នកស្រីបានបញ្ជាក់ថា «ខ្ញុំមានតែជួយជោមជ្រែង និង​លើកទឹកចិត្ត ហើយបើស្លាប់ទៅ គួរមានកេរិ័្តឈ្មោះស្រលាញ់ជាតិ ស្រលាញ់ក្មេង»៕


កុមារនិងគ្រូបង្រៀន នៅអង្គការវិចិត្រករខែ្មរដើម្បីកុមារ។


ការបង្រៀនកុមារពីក្បាច់ចម្លាក់។


អ្នកស្រី ភួង សូម៉ាលី ភរិយារបស់វិចិត្រករ។


យុវនិស្សិត ទួន សុភ័ក្រ។

-------------------------------------
ដោយ ក. ស៊ន សុខឃៀង (ទំនាក់ទំនង៖ [email protected]) - ភ្នំពេញ ថ្ងៃទី២៩ ខែមករា ឆ្នាំ២០១៤

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...