ប្រធានសមាគមគ្រូបង្រ្គៀនកម្ពុជាឯករាជ្យ បានលើកឡើងថា លោកនាយករដ្ឋមន្រ្តី ហ៊ុន សែន គ្មានសមត្ថភាព​ក្នុង​ការដឹកនាំ និងអនុវត្តការសន្យារបស់ខ្លួននោះទេ។ ការលើកឡើងដូច្នេះ គឺបន្ទាប់ពីនាយករដ្ឋមន្រ្តីក្នុងតំណែងតាំងពី​ជិត៣០ឆ្នាំមកនេះ បានរិះគន់មន្រ្តីជាន់ខ្ពស់ក្រោមឱវាទរបស់ខ្លួន និងជំរុញឲ្យមាន​យន្តការពន្លឿន​ការបើកប្រាក់​បៀវត្សន៍ដល់មន្រ្តីរាជការ ឲ្យបានទៀងទាត់។

លោកនាយករដ្ឋមន្ត្រី ហ៊ុន សែន នៃរដ្ឋាភិបាលកម្ពុជា។

កំណែទម្រង់ - លោក រ៉ុង ឈុន ប្រធានសមាគមគ្រូបង្រៀនកម្ពុជាឯករាជ្យ បានអត្ថាធិប្បាយប្រាប់ទស្សនាវដ្តី​មនោរម្យ.អាំងហ្វូ នៅថ្ងៃទី១៨ ខែកុម្ភៈ នេះថា លោក ហ៊ុន សែន បាននិយាយ និងសន្យាច្រើនឆ្នាំមកហើយ​ចំពោះ​គោលនយោបាយដឹកនាំរបស់ខ្លួន ស្ទើរគ្រប់វិស័យ តែបញ្ហាក៏ចេះតែបន្តមាន ហើយការដោះស្រាយ​បានតិច​តួច​បំផុត។

ប្រធានសមាគមគ្រូបង្រៀនកម្ពុជាឯករាជ្យរូបនេះបានបន្តថា ក្នុងនាមនាយករដ្ឋមន្រ្តី លោក ហ៊ុន សែន គួរតាម​ដាន​នូវអ្វីដែលខ្លួនដាក់បញ្ជាឲ្យថ្នាក់ក្រោមអនុវត្ត ថាវាទទួលបានលទ្ធផលកម្រិតណា ហើយនាយករដ្ឋមន្រ្តី​ផ្ទាល់ក៏​គួរ​ពិនិត្យមើលកំហុសខ្លួនឯងផងដែរ មិនមែនមានបញ្ហាអ្វីកើតឡើង កាន់ក្បាលមេក្រូ រុញកំហុសដាក់ថ្នាក់​ក្រោម​នោះ​ទេ។ លោក រ៉ុង ឈុន បញ្ជាក់ថា៖ «ការបើកប្រាក់បៀវត្យយឺតហ្នឹង គឺឆ្លុះបញ្ចាំងថា លោក ហ៊ុន សែន គ្មានសមត្ថភាព​ដឹកនាំគ្រប់គ្រង បើសូម្បីតែប្រាក់ខែបើកមិនទៀងទាត់ផងធ្វើអីកើត»។

ការថ្លែងរបស់លោក រ៉ុង ឈុន នៅពេលនេះ បានកើតឡើងបន្ទាប់ពីនាយករដ្ឋមន្ត្រីកម្ពុជា លោក ហ៊ុន សែន ក្នុងពិធី​មួយ នៅថ្ងៃទី១៧ ខែកុម្ភៈ បានអំពាវនាវ ក៏ដូចជាជំរុញឲ្យមន្ត្រីរាជការ ធ្វើការចុះផ្សាយតាមកាសែត ចំពោះការយឺត​យ៉ាវ​នៃប្រាក់ខែ ប្រសិនណាបើដាច់ខែហើយ ប្រាក់ខែនៅមិនទាន់បានបើក។ ជាមួយគ្នានេះដែរ លោកនាយករដ្ឋមន្ត្រី​ដ៏​​ចាស់​វស្សារបស់កម្ពុជា បានក្រើនរំលឹកដល់រដ្ឋមន្ត្រីគ្រប់ក្រសួង ថាត្រូវយកចិត្តទុកដាក់លើបញ្ហាប្រាក់បៀវត្សន៍​មន្ត្រី​រាជការ ឲ្យបានខ្ជាប់ខ្ជួនជាទីបំផុត។

លោក ហ៊ុន សែន បានបញ្ជាក់ថា៖ «បើឃើញមិត្តភក្តិធ្វើខុស យើងត្រូវហ៊ានបញ្ចេញមតិ។ កុំគិតតែត្រូវទាំង​អស់គ្នា។ បើមិនអញ្ចឹង ធ្លាក់ទឹកទាំងអស់គ្នា។ ត្រូវហ៊ានតស៊ូទប់ស្កាត់ចំណុចអសកម្មទាំងឡាយណា ដែលមេ​ដឹក​នាំធ្វើខុស។ ហើយអ្នកដែលត្រូវគេផ្តល់គំនិតត្រូវ សូមកុំកំណាញ់នឹងទទួលយកមតិទាំងនោះ។ យើងមិនដែលចេះ​ទាំងអស់​នោះ​ទេ។»

ជុំវិញករណីនេះ អ្នកវិភាគឯករាជ្យ និងអ្នកច្បាប់បានលើកឡើងថា ដំណោះស្រាយមួយល្អ ទទួលបានប្រសិទ្ធភាព និងធានាបានភាពយូរអង្វែងក្នុងការដោះស្រាយ ចំពោះបញ្ហាដែលកើតឡើងជាប្រចាំក្នុងសង្គម គេមិនត្រូវ​ពឹង​អាស្រ័យលើតែ«អនុសាសន៍ដ៏ខ្ពង់ខ្ពស់» ហើយរំលងការអនុវត្តច្បាប់ឲ្យមានប្រសិទ្ធិភាពនោះទេ។

ប្រទេសអភិវឌ្ឍន៍ និងមានភាពស៊ីវិល័យ គេមិនដែលប្រើពាក្យ «អនុសាសន៍ដ៏ខ្ពង់ខ្ពស់»ញឹកញាប់​ជ្រុល​ដូចនៅ​កម្ពុជានោះទេ តែប្រទេសទាំងនោះ មានយន្ដការត្រួតពិនិត្យយ៉ាងមានប្រសិទ្ធិភាព និងទទួលបាន​លទ្ធផល​ខ្ពស់ ក្នុងការដោះស្រាយគ្រប់បញ្ហាកើតឡើងក្នុងសង្គម ដោយផ្អែកលើកច្បាប់ និងជាពិសេស​ការដាក់ទណ្ឌកម្មតឹងតែង ទៅលើមន្ត្រីខិលខូច ដែលនៅក្រោមបង្គាប់ខ្លួនជាមេដឹកនាំ។ ជាឧទាហរណ៍ ដូចជាករណីរបស់អតីតអភិបាលក្រុង​បាវិត លោក ឈូក បណ្ឌិត ជាដើម តើលោក ហ៊ុន សែន អនុវត្តន៍ដល់ណាហើយ? នេះបើតាមការលើកឡើង របស់​ក្រុម​អ្នកតាមដានសភាពការណ៍នយោបាយកម្ពុជា៕

--------------------------------------
ដោយ អ៊ុំ បូរី (ទំនាក់ទំនង៖ [email protected]) - ភ្នំពេញ ថ្ងៃទី១៨ ខែកុម្ភៈ ឆ្នាំ២០១៤