«សូម្បីតែថ្ងៃបុណ្យទានក៏មិនលើកលែងដែរ នេះឬជាថ្ងៃនៃក្តីស្រលាញ់ តើរដ្ឋាភិបាលមានថ្ងៃនេះទេ?» ការជាលើក​ឡើងរបស់ក្រុមអ្នកប្រើប្រាស់បណ្ដាញសង្គមហ្វេសប៊ុក ខណៈពួកគាត់កំពុងនាំគ្នាជជែកដេញដោល ពី«អំណោយ​»​ថ្ងៃបុណ្យ​មាឃបូជា និងបុណ្យនៃសេចក្តីស្រលាញ់ ដែលអាជ្ញាធរអោយពលរដ្ឋរងគ្រោះពីការរំលោភដីធ្លី ក្នុងការ​បង្រ្កាបយ៉ាងចាស់ដៃ។

ស្ត្រីម្នាក់ពីក្នុងស្ត្រីផ្សេងទៀត ដែលត្រូវបានវាយឲ្យរបួសនៅបូរីកីឡា ថ្ងៃទី១៤ ខែកុម្ភះ ឆ្នាំ២០១៤។ (រូបថត MONOROOM.info/ O. Vary)

អំណោយគាប់ចិត្ត - នៅថ្ងៃទិវានៃក្តីស្រឡាញ់១៤ កុម្ភៈ ដែលវាមានដើមកំណើត និងសាច់រឿងរបស់បរទេស ត្រូវ​បានប្រជាជនខ្មែរ ជាពិសេសយុវជននាំគ្នាប្រារព្ធធីធីបុណ្យ។ នៅថ្ងៃនេះកូនជូនអំណាយទៅកាន់ឪពុកម្តាយ ដើម្បី​បញ្ជាក់ភាពស្រលាញ់ទៅកាន់ពួកគាត់។ រីឯយុវវ័យដែលមានគូរភាគច្រើន​ គេជូនផ្កាកុលាបដែល​បញ្ជាក់ក្តីស្រលាញ់ របស់ពួកគេទៅកាន់នរណាមួយ ដែលពួកគេគិតថាពិសេស។ ថ្ងៃនេះដែរ ក៏ជាថ្ងៃប្រារព្ធពិធីបុណ្យមាឃបូជា ខណៈ​ពេល​ប្រជាជន​ដែលកាន់ពុទ្ធសាសនា បាននាំគ្នាធ្វើចង្ហាន់ទៅវត្ត បំបាត់កេលេស មិនធ្វើអំពើបាប និងមិនសំលាប់​សត្វ ដើម្បីទទួលមគ្គផល។

តែអ្វីដែលចម្លែក និងពិសេសនោះ នៅព្រឹកព្រលឹមថ្ងៃដដែលនេះដែរ កងកម្លាំងរបស់អាជ្ញាធរ បានបង្កើត​ភាព​ភ្ញាក់​ផ្អើលមួយ ដែលមតិរិះគន់នានានិយាយរិះគន់ទាំងហួសចិត្តថា «ជា"កាដូ"ថ្ងៃមាឃបូជា និងថ្ងៃនៃសេចក្តី​ស្រលាញ់» ពីសមត្ថកិច្ចខ័ណ្ឌ៧មករា ជូនទៅកាន់ប្រជាពលរដ្ឋនៅតំបន់បូរីកីឡា។ «កាដូ ឬអំណោយពិសេស» នៃយុទ្ធនាការ​បង្រ្កាប បានធ្វើអោយ ធ្វើអោយមនុស្ស៤នាក់រងរបួស ក្នុងនោះមាន​ស្រ្តី​មានផ្ទៃពោះ៨ខែផងដែរ។ អ្វីដែលមិនគួ​ឲ្យ​ជឿទៀតនោះ តង់ដែលប្រជាពលរដ្ឋ បោះនៅបណ្តោះអាសន្ន​លើ​គំនរ​សំរាម ក៏ត្រូវបានសមត្ថកិច្ចដុតកំទេចចោល។

អំណោយថ្ងៃបុណ្យទាន ដែលសមត្ថកិច្ចផ្តល់អោយប្រជាពលរដ្ឋនៅបូរីកីឡានេះ ធ្វើអោយប្រជាជននៅទីនោះ​ស្រក់​ទឹកភ្នែក ដែលការស្រក់ទឹកភ្នែកនេះ ដែលមិនមែនដោយសារការរំភើបត្រេកអរនោះទេ តែជាការស្រក់ដោយក្តី​ឈឺ​ចាប់ ហើយបង្កឲ្យក្រុមអ្នកប្រើប្រាស់បណ្ដាញសង្គម ធ្វើប្រតិកម្មកក្រើកពិភពអាំងធើណែត។

អមជាមួយរូបថត នៃការបង្រ្កាបរបស់កម្លាំងសមត្ថកិច្ចទៅលើប្រជាសហគមន៍បូរីកីឡានៅថ្ងៃសីល ១៥កើត ខែមាឃ ត្រូវនឹងថ្ងៃទី១៤ ខែកុម្ភៈ ឆ្នាំ២០១៤ នេះ មានអ្នកបញ្ចេញយោបល់ជាច្រើនដែលបានអះអាងថា កាដូនេះ​វាសហាវ​ពេកហើយ ដែលមិនត្រូវជូននៅថ្ងៃគេធ្វើបុណ្យទាន និងប្រារព្ធទិវាក្តីស្រលាញ់នោះទេ។

អ្នកប្រើប្រាស់ហ្វេស៊ុកមួយរូប ដាក់ឈ្មោះគណនីរបស់ខ្លួនថា Chanthorn Roeun បានបញ្ចេញយោបល់ថា «ថ្ងៃនេះ​គឺជាថ្ងៃទិវានៃក្តីស្រលាញ់ ដែលពិភពលោកទទួលស្គាល់គ្រប់គ្នា ព្រមទាំងជូនកាដូ វត្ថុអនុស្សាវរីយ៍ ដល់មិត្តភ័ក្ត​បងប្អូន ក្រុមគ្រួសារ ដើម្បីបញ្ជាក់ពីសក្ខីភាពនៃកាស្រលាញ់របស់ពួកគេ។ តែសម្រាប់រដ្ឋាភិបាលខ្មែរ ថ្ងៃនេះបាន​ជូន​កាដូ​ដល់​បងប្អូនប្រជាពលរដ្ឋនៅបុរីកីឡា ខុសពីគេដែលមិនធ្លាប់មាន គឺគាត់ជូនកាដូជាឈាម ដល់ប្រជាជនដ៏កំសត់​របស់គាត់ អស្ចារ្យណាស់ប្រទេសមហាអច្ឆរិយ:របស់ខ្ញុំ។»

Chet Tra ដែលចូលរួមបញ្ចេញមតិនៅលើរូបភាពនោះដែរ បានរិះគន់ថា «ថ្ងៃនេះជាថ្ងៃដែលបងប្អូនជនជាតិខ្មែរ​យើង​ធ្វើបុណ្យ កាន់សីល ចំណែករដ្ឋាភិបាលខ្មែរនាំគ្នាសាងតែអំពើបាបអំពើដែលសង្គមខ្មែរស្អប់ខ្ពើម»។ រីឯ Sophea Anusa បាន​លើឡើងផងដែរថា «ចំណងដៃឈាម ដែលសម្តេច ជូនជាអនុស្សាវរីយ៍ នៅថ្ងៃនៃក្តីស្រលាញ់​សម្តេច​នឹង​បន្តជូនកាដូនេះបន្តទៀតគ្រប់ៗ អាណត្តិ អោយតែសម្តេចនៅតែឈ្នះឆ្នោត។» មិនខុសគ្នាដែរ ម្ចាស់ទំព័រឈ្មោះថា ចិត្ត ខ្ញុំ បានបន្តថា «ថ្ងៃក្តីស្រលាញ់សំរាប់មនុស្សលោកទូទៅនៅលើលោក តែបែរមកប្រទេសខ្មែរ មានការបង្រាប​ប្រជាពលរដ្ឋទៅវិញ»។

ប៉ុន្តែសម្រាប់អ្នកប្រើប្រាស់ហ្វេសប៊ុកឈ្មោះ Sinath Soem ដែលមានជំហរគាំទ្រកងកម្លាំងវិញ បានចោទជា​សំនួរ​នៅ​លើវីដេអូមួយ ផ្សាយលើទំព័រហ្វេសប៊ុក របស់ទស្សនាវដ្ដីមនោរម្យ.អាំងហ្វូ ថា «បើគេជេម្ដាយអ្នក បើគេ​យក​សារ៉ុង​វាយក្បាលអ្នក បើគេយកដុំថ្មគប់អ្នក តើអ្នកធ្វើយ៉ាងណាចំពោះគេ?»

តែការលើកឡើងរបស់អ្នកគាំទ្រកងកម្លាំងអាជ្ញាធរ ជារឿយៗ តែងទទួលការតបតរវិញយ៉ាងជូរចត់ ទាក់ទងនឹង​បរិបទច្បាប់ និងការអនុវត្តច្បាប់របស់អាជ្ញាធរខ្លួនឯង។ ដូចជាគណនីមួយដាក់ឈ្មោះ សាន់ សឿង បានលើក​ឡើង​ដូច្នេះថា «សម្រាប់អាជ្ញាធរ ដែលខ្លួនតំណាងឲ្យច្បាប់ជាធរមាន ត្រូវមាននីតិវិធី និងការតបតរការពារខ្លួន ដោយ​ច្បាប់។ មិនមែនគេយកសារ៉ុងគ្របក្បាលត្រឹមនេះ ទៅវាយគេបែកក្បាលវិញនោះទេ។ ហើយទៅ​វាយ​នោះទៀត​សោត ត្រូវនិយាយពីតួនាទី។ ពួកជនបិទមុខប៉ុន្មាននាក់នេះ មានសិទ្ធិបែបនេះឬ? ម៉េចទៅយល់ទេ ជនល្ងង់? តាំង​ខ្លួនជាអាជ្ញាធរ ត្រូវនិយាយពីច្បាប់ មិនមែនម៉ាំងទៅ ម៉ាំងមក ប្រើអំពើរពាលតបវិញនោះទេ៕»

-----------------------------------------------
ដោយ ក. ចាន់នីតា (ទំនាក់ទំនង៖ [email protected] ) - ភ្នំពេញ ថ្ងៃទី ១៤ ខែកុម្ភៈ ឆ្នាំ២០១៤