អ្នកវិភាគនយោបាយឯករាជ្យកម្ពុជា​បានលើកឡើងថា អ្នកនយោបាយកម្ពុជាគួរប្រើភាពវៃឆ្លាតរបស់ខ្លួន ទាញយក​ផលចំណេញ ពីវិបត្តិនយោបាយផ្ទៃក្នុងរបស់ប្រទេសថៃសម្រាប់ប្រទេសកម្ពុជា ក្នុងកាលៈទេសៈដ៏សំខាន់នេះ។ ព្រោះស្ថានការណ៍នយោបាយរបស់ប្រទេសថៃ កំពុងមានភាពរំជើបរំជួលខ្លាំង និងបានជះឥទ្ធិពលមិនល្អ​ដល់​កំណើនសេដ្ឋកិច្ចថៃ។ ហើយប្រទេសជិតខាងមួយនេះ ក៏ធ្លាប់កេងចំណេញយ៉ាងសម្បើម ពីជម្លោះផ្ទៃក្នុងរបស់​កម្ពុជាកាលពីអតីតកាលដូចគ្នាដែរ។

នាយករដ្ឋមន្ត្រីថៃ លោកស្រី យីងឡាក់ ស៊ីណាវ៉ាត្រា ថ្លែងនៅមុខព្រះមហាក្សត្រ នៅថ្ងៃបុណ្យចម្រើនព្រះជន្ម ទី៥ខែធ្នូឆ្នាំ២០១៣។ (រូបថត Indranil Mukherjee/AFP)

នយោបាយកម្ពុជា - លោក សុខ ទូច ជាអ្នកវិភាគនយោបាយឯករាជ្យកម្ពុជា បានអត្ថាធិប្បាយប្រាប់​ទស្សនាវដ្តី​មនោរម្យ.អាំងហ្វូ នៅថ្ងៃទី៣ ខែកុម្ភៈ ឆ្នាំ២០១៤ នេះថា កាលពីកម្ពុជាមានសង្រ្គាមស៊ីវិលជ្រាលជ្រៅ និងការស្វះ​ស្វែងរកសន្តិភាព ប្រទេសថៃបានប្រើប្រាស់យុទ្ធសាស្រ្តគ្រប់រូបភាព ដើម្បីកេងចំណេញពីការ​បង្ហូរឈាមរវាង​ភាគី​ខ្មែរនិងខ្មែរ។ ដូច្នេះ ក្នុងកាលៈទេសៈបច្ចុប្បន្ន អ្នកនយោបាយកម្ពុជា គួរប្រើភាពវៃឆ្លាត ដោយដោះស្រាយវិបត្តិ​នយោបាយផ្ទៃក្នុងរបស់កម្ពុជាឲ្យបានឆាប់ ដើម្បីអាចឲ្យប្រទេសកម្ពុជាដំណើរការទៅមុខជាប្រក្រតី។

លោក សុខ ទូច បញ្ជាក់ថា៖ «នៅពេលយើងឈ្លោះគ្នា យើមិនអាចទាញផលចំណេញបានទេ។ តែបើយើងអត់​ឈ្លោះ យើងអាចទាញផលចំណេញបានច្រើន។ នៅពេលប្រទេសជិតខាងមានជម្លោះ គេសម្លឹងឃើញ ច្រើន ទាំង​ខាងសង្គម នយោបាយ ខាងសេដ្ឋកិច្ច វិនិយោគ និងនយោបាយការបរទេស។ អ្នកវិនិយោគ គេមិនចង់វិនិយោគ នៅប្រទេសណាដែលមានបញ្ហាច្រើននោះទេ។ ប្រទេសថៃមានវិបត្តិ៣ គឺទី១. វិបត្តិគ្រោះធម្មជាតិញឹកញាប់ ទី២. ​វិបត្តិនយោបាយ និងទី៣.វិបត្តិរាជវាំង។ ញ្ចឹងបញ្ហាទាំងនេះហើយ ដែលនាំឲ្យកម្ពុជាចំណេញ។»

គួរកត់សម្គាល់ថា នៅថ្ងៃទី២ ខែកុម្ភៈ ឆ្នាំ២០១៤ នេះ ប្រទេសថៃបានរៀបចំបោះឆ្នោតមុនអាណត្តិ ដើម្បីបិទបញ្ចប់​វិបត្តិនយោបាយរវាងក្រុមប្រឆាំងអ៊ាវលឿង និងក្រុមគាំទ្ររដ្ឋាភិបាលអ៊ាវក្រហម។ ដំណើរការបោះឆ្នោត​ដ៏ប្រទាំង​ប្រទើស បានជម្រុញឲ្យមជ្ឈដ្ឋានជាតិថៃ និងអន្តរជាតិ មើលឃើញថា វិបត្តិនយោបាយផ្ទៃក្នុង របស់ថៃ ដែលបាន​អូសបន្លាយតាំងពីក្រោយការធ្វើរដ្ឋប្រហារយោធា ក្នុងឆ្នាំ២០០៦ ទម្លាក់អតីតនាយករដ្ឋមន្រ្តីថៃ លោក ថាក់ស៊ីន ស៊ីណាវ៉ាត្រា ទំនងជាមិនអាចបិទបញ្ចប់ដោយងាយៗ តាមរយៈការបោះឆ្នោត ក្រោមបរិយាកាសអាប់អួនេះ បាន​ទេ។

រីឯវិបត្តិនយោបាយនៅកម្ពុជា រហូតមកដល់ពេលនេះ បើទោះជាសញ្ញាណនៃការចរចាឡើងវិញ រវាងគណបក្ស​ទាំងពីរ ស្ថិតនៅក្នុងភាពស្រពិចស្រពិលក៏ពិតមែនក្តី ក៏អ្នកតាមដានស្ថានការណ៍នយោបាយកម្ពុជា និងអ្នក​វិភាគ​ឯករាជ្យកម្ពុជា មានជំនឿចិត្តថា គណបក្សទាំងពីរ ទំនងជាវិលទៅរកតុចរចាវិញក្នុងពេលឆាប់ៗខាងមុខ នេះ ព្រោះ​មានសម្ភាធពីមជ្ឈដ្ឋានជាតិ និងអន្តរជាតិកាន់តែខ្លាំងឡើងៗ ស្របពេលគណបក្សទាំងពីរក៏ថមថយ ឥទ្ធិលដូចគ្នា។

ចំពោះវិបត្តិនយោបាយកម្ពុជាដែលបានអូសបន្លាយពេលជាង៦ខែ គិតពីក្រោយការបោះឆ្នោតជាតិខែកក្កដា ឆ្នាំ​២០១៣ ត្រូវបានលោក សុខ ទូច បញ្ជាក់ថា៖ «បញ្ហានេះអាចដោះស្រាយទៅរួច តែឥឡូវខ្ញុំមិនទាន់លំអិតនោះទេ វានៅក្រោយវាំងនន។ យើងនឹងសុំឲ្យអ្នកនយោបាយគ្រប់ភាគី ដោះស្រាយបញ្ហានេះជាមួយគ្នា។ មានដំណោះ​ស្រាយ មិនអត់ទេ យើងតម្កល់ផលប្រយោជន៍ជាតិជាធំ តែបើប្រើនយោបាយឈ្នះចាញ់មិនអាចទៅរួចទេ យើង​ឃើញហើយកន្លងមក យើងមិនអាចរកដំណោះស្រាយបានទេ៕»

--------------------------------------
ដោយ អ៊ុំ បូរី (ទំនាក់ទំនង៖ [email protected]) - ភ្នំពេញ ថ្ងៃទី៣ ខែកុម្ភៈ ឆ្នាំ២០១៤