ភាពយន្ដ - លោក សុន ដារ៉ា បុគ្គលិកមជ្ឈមណ្ឌលបណ្តុះបណ្តាលភាពយន្តកម្ពុជា បានថ្លែងប្រាប់អ្នក​សារ​ព័ត៌​មាន​ក្នុងស្រុកថា លោក រិទ្ធី ប៉ាន កំពុងឋិតនៅសហរដ្ឋអាមេរិក ហើយលោកនឹងធ្វើដំណើរ​កាន់ទីក្រុង​ឡូសអេនជឺ​លេស (LA) សហរដ្ឋអាមេរិក នៅថ្ងៃទី០២ខែកុម្ភៈ ខាងមុខនេះ ដើម្បីចូលរួមនៅក្នុងការប្រកួតប្រជែង និងរង​ចាំ​ស្តាប់​លទ្ធផលនៃ​ការជ្រើសរើស សម្រាប់ទទួលពានរង្វាន់អូស្កា «អ្នកផលិតភាពយន្តល្អ» ។ លោក សុន ដារ៉ា ឲ្យ​ដឹងទៀតថា ពិធីចែក​ពានរង្វាន់អូស្កា ដល់អ្នកផលិតភាពយន្តល្អ នឹងធ្វើឡើងនៅថ្ងៃ០៣ ខែមីនា ឆ្នាំ២០១៤។

ខែ្សភាពយន្ត «The Missing Picture - L'image manquante - រូបភាពឈឺផ្សារ» ផលិតដោយ​លោក រិទ្ធី ប៉ាន បាន​បង្កឲ្យមានការចាប់អារម្មណ៍ខ្លាំង បន្ទាប់ពីភាពយន្ដនេះត្រូវបានបញ្ចាំងនៅតាមកញ្ចក់ទូរទស្សន៍បារាំង ឬនៅ​តាម​រោងភាពយន្ដនានានៅបស្ចឹមប្រទេស ក្នុងមហោស្រពអន្តរជាតិផ្សេងៗនៅអឺរ៉ុប និងនៅក្នុង​ពិធី​បុណ្យ​មហោ​ស្រព​ភាពយន្តអន្តរជាតិ កម្ពុជា លើកទីពីរកាលពីថៃ្ង១៤ ខែធ្នូ ឆ្នាំ២០១៣ នារាជធានីភ្នំពេញ។ ខ្សែ​ភាពយន្ដដែល​និយាយ​​តំណាលឡើងវិញ ពីរបបខែ្មរក្រហមនេះ បានធ្វើឲ្យ​ទស្សនិកជន​មានការភ្ញាក់ផ្អើលយ៉ាងខ្លាំង ជាមួយ​តួ​អង្គ​​សម្តែង​តុក្តតាពីដីឥដ្ឋ សូនរូបជំនួសមនុស្សពិត ព្រមទាំង​មានការបញ្ចូលសម្លេងពីទិដ្ឋភាព​ឈឺចាប់​នៃ​ ការ​បាត់​បង់​​សាច់​ញាតិក្នុងរបបអាវខ្មៅ រូបភាពនៃការសម្លាប់រង្គៀល និងការរំលោភសិទ្ធិមនុស្សយ៉ាងធ្ងន់ធ្ងរ នៅ​សម័យ​នោះ​​ផងដែរ។

ជាទស្សនៈរបស់ទស្សនិកជននៅក្នុងស្រុកវិញ កញ្ញា ភោគ ស្រីពេជ្រ អាយុ២៤ឆ្នាំ បន្ទាប់ពីបានទស្សនាភាពយន្ដ​ខាង​​លើ នៅរោងភាពយន្ដ Legend Cinema កាលពីឆ្នាំ២០១៣ រួចនោះ បានថ្លែងប្រាប់ទស្សនាវដ្តី មនោរម្យ.អាំងហ្វូ​ ថា៖ «រឿងនេះពិតជាល្អមើល និងបង្កប់ដោយអត្ថន័យច្រើនជាមួយការយក រូបតុក្តតាសូនរូបមក​សម្តែង​អោយ​​មាន​ភាព​រស់រវើក ធ្វើអោយខ្ញុំមានអារម្មណ៍ស្លុងជាប់ក្នុងសាច់រឿង ទៅនឹងភាពឈឺចាប់របស់ពលរដ្ឋ​នា​សម័យ​នោះ»។ កញ្ញា​បានថ្លែងដោយក្ដីសង្ឃឹមថា ភាពយន្ដនេះមានលទ្ធភាពអាចជាប់ពានរង្វាន់​អូស្តារនៅ​សហរដ្ឋ​អាមេរិក ដែលជា​មោទនភាពមួយសម្រាប់ប្រទេសកម្ពុជា។

គួរបញ្ជាក់ដែរថា ខ្សែភាពយន្ដ«រូបភាពឈឺផ្សារ»នេះ ជាការរៀបរាប់ឡើងវិញ នូវខ្សែជីវិតដ៏ខ្លោចផ្សារ ដែលលោក រិទ្ធី ប៉ាន ខ្លួនលោក ក៏ដូចជាពលរដ្ឋកម្ពុជាទូទៅបានឆ្លងកាត់ នៅក្នុងរបបអាវខ្មៅ បីឆ្នាំ ៨ខែ ២០ថ្ងៃ។ ផលិតករ​ភាពយន្ដ​រូបនេះ មានស្រុកកំណើតនៅ ទីក្រុងភ្នំពេញ ដោយ​មានឪពុកជាគ្រូបង្រៀន និងជា​អ្នកត្រួត​ពិនិត្យម្នាក់​នៅ​សាលា​បឋមសិក្សា។ គ្រួសាររបស់គាត់ព្រមទាំងប្រជាជនដទៃទៀត ត្រូវបានគេបណ្ដេញ​ចេញពី​រាជធានី​ដោយ​​ពួកខ្មែរ​ក្រហម នៅក្នុងឆ្នាំ១៩៧៥ ។ បន្ទាប់ពីលោកបានឃើញឪពុកម្តាយ បងប្អូន សាច់ញាតិ​ផ្សេងៗ​បាន​ស្លាប់ លោក រិទ្ធី ប៉ាន់ បានភៀសខ្លួនទៅកាន់ជំរំជនភៀសខ្លួនមួយនៅ ម៉ៃរុត ក្នុងប្រទេសថៃ មុននឹងបានធ្វើដំណើរ​មកដល់ប្រទេស​បារាំង។ លោកបានបញ្ចប់​ការសិក្សាពី វិទ្យាស្ថានជំនាញជាន់ខ្ពស់ខាងភាពយន្តនៅទីក្រុងប៉ារីស ប្រទេស​បារាំង និង​បានត្រលប់មក​មាតុភូមិ​កំណើតវិញ​នៅ​ឆ្នាំ១៩៩០៕

សូមទស្សនាការដកស្រង់នូវវគ្គមួយ ពីភាពយន្ដ«រូបភាពដ៏រន្ធត់»ដូចតទៅ៖

----------------------------------
ដោយ ក. ស៊ន សុខឃៀង (ទំនាក់ទំនង៖ [email protected]) - ភ្នំពេញ ថ្ងៃទី០១ ខែកុម្ភៈ ឆ្នាំ២០១៤