៥នាក់ស្លាប់ ជាង២០នាក់របួស ក្នុងការបង្ក្រាបពួក«អនាធិបតេយ្យ»?
មានមនុស្សយ៉ាងហោច ៥នាក់ស្លាប់ និងជាង២០នាក់រងរបួស ព្រមទាំង១១នាក់ផ្សេងទៀត ត្រូវបានចាប់ខ្លួន។ នេះជាតុល្យភាពបណ្ដោះអាសន្ន នៃការបង្ក្រាបទៅលើក្រុមកម្មករ ដែលធ្វើបាតុកម្មអហិង្សានៅលើផ្លូវវ៉េងស្រេង។ កងកម្លាំងអាជ្ញាធរបានបើកប្រតិបត្តិការយ៉ាងចាស់ដៃមួយ ដោយការប្រើប្រាស់អាវុធ និងគ្រាប់កាំភ្លើងពិតៗ ទៅលើបាតុករដៃទទេរ នៅថ្ងៃសុក្រទី០៣ ខែមករានេះ ដើម្បីជាការស្វាគមន៍ឆ្នាំថ្មីឆ្នាំ២០១៤។ ប្រតិបត្តិការបានបញ្ចប់ទៅហើយ នៅវេលាម៉ោងប្រមាណជាបីរសៀល តែភាពធ្ងន់ធ្ងរនៃតុល្យភាពនេះ នៅតែបន្តកើនឡើងនៅឡើយ។
អ្នករងរបួសត្រូវបានគ្នីគ្នារបស់ពួកគេសែងចេញទៅ។ (រូបថត MONOROOM.info/ O.Vary)
វិបត្តិការងារ - ប្រភពផ្សេងៗ របស់ប្រព័ន្ឋផ្សព្វផ្សាយពត៌មាននានា មិនបានបង្ហាញពីទិន្នន័យ ឬពីតុល្យភាព នៃចំនួនអ្នកស្លាប់ពិតប្រាកដដែលកើតចេញពីការបង្ក្រាបនេះនៅឡើយ។ ដោយហេតុថារហូតមកដល់ពេលនេះ ចំនួននៃអ្នកស្លាប់ចេះតែមានភាពកើនឡើងជាលំដាប់។ តាមរបាយការណ៍មួយ របស់វិទ្យុសម្លេងប្រជាធិបតេយ្យ បានឲ្យដឹងថា «កម្មករ៤នាក់ស្លាប់ ៣០នាក់រងរបួសធ្ងន់ស្រាល និង១១នាក់ទៀត ត្រូវបានបញ្ជូនខ្លួនទៅបញ្ជាការដ្ឋានកងរាជអាវុធហត្ថ រាជធានីភ្នំពេញ»។
សាកសួរសុំសម្ភាសដោយ ទស្សនាវដ្ដីមនោរម្យព័ងអាំងហ្វូ លោក ខេង ពីតូ អ្នកនាំពាក្យកងរាជអាវុធហត្ថលើផ្ទៃប្រទេស បាននិយាយថា ខាងរាជអាវុធហត្ថ មិនមានទិន្នន័យនៃអ្នករងរបួស ឬអ្នកស្លាប់ទេ ប៉ុន្តែចំពោះជនចាប់ខ្លួនវិញ លោកបានបញ្ជាក់ថាមានគ្នា១១នាក់។
ដោយឡែក ប្រធានក្រុមស៊ើបអង្កេត របស់អង្គការសិទ្ធិមនុស្សអាដហុក លោក ចាន់ សូវ៉េត បានប្រាប់ទស្សនាវដ្តីថា បើតាមពត៌មានដែលលោកទទួលបាន ពីអាជ្ញាធរមានសមត្តកិច្ចនោះ យ៉ាងហោចណាស់មានមនុស្សស្លាប់បានកើនដល់៥នាក់ អ្នកចាប់ខ្លួនប្រហែលជា១៥នាក់ និងអ្នករងរបួសច្រើនជាងម្ភៃនាក់។
អ្នកនាំពាក្យកងរាជអាវុធហត្ថ លោក ខេង ទីតូ បានហៅប្រតិបត្តិការនេះថា ជាការបង្ក្រាប«ពួកអនាធិបតេយ្យខុសច្បាប់ មិនមែនបង្ក្រាបក្រុមកម្មករ»ឡើយ។ លោក ខេង ទីតូ បានបន្ថែមទៀតថា នាពេលនេះ ខាងកងកម្លាំងសមត្ថកិច្ច កំពុងតែរៀបចំដើម្បីបញ្ជូនក្រុមជនដែលចាប់ខ្លួនបានទាំងនោះ ទៅតុលាការនៅពេលបញ្ចប់សំណុំរឿងហើយ តែនៅមិនទាន់ដឹងថា នៅពេលណានឹងងបញ្ចូនពួកគេទាំងនោះ នៅឡើយ។
ប៉ុន្តែមន្ត្រីសិទ្ធិមនុស្ស លោក ចាន់ សូវេត បានចាត់ទុកថា ការបង្ក្រាបពីកងរាជអាវុធហត្ថនេះ ជាការរំលោភសិទ្ធិមនុស្សដ៏ធ្ងន់ធ្ងរ និងគួរតែយកជនល្មើស ដែលបានប្រព្រឹត្តិអំពើបាញ់បោះបែបនេះទៅវិញទេ មកកាត់ទោសតាមផ្លូវច្បាប់។
លោក នី ចរិយា មន្ត្រីផ្នែកស៊ើបអង្កេតមួយរូប ពីអង្គការការពារសិទ្ធិមនុស្ស អាដហុក ធ្លាប់បានផ្ដល់កិច្ចសំភាសន៏ ឲ្យទស្សនាវដ្ដីមនោរម្យព័ងអាំងហ្វូ ស្តីពីសិទ្ធិសេរីភាពនៃការធ្វើបាតុកម្ម ឈានទៅដល់ការបិទផ្លូវនេះ ដោយលោកបានបញ្ជាក់ថា បើវាមិនបានបង្កផលប៉ះពាល់ ដល់អាយុជីវិតរបស់អ្នកណាម្នាក់នោះ មិនមែនជាការខុសច្បាប់ឡើយ។ មន្ត្រីសិទ្ធិមនុស្សរូបនេះ បានបញ្ជាក់ពីមូលហេតុថា ដោយសារតែបាតុកម្ម ធ្វើឡើងក្នុងន័យស្វែងរកសិទ្ធិណាមួយ ដែលខាងបុគ្គលសាធារណៈ (រដ្ឋាភិបាល ឬលោក ហ៊ុន សែន ជាដើម) ខកខាន មិនបានបំពេញតួនាទីផ្ដល់ជូនប្រជាពលរដ្ឋតែប៉ុណ្ណោះ៕
-----------------------------------------------
ដោយ៖ ក. សេងហុង - ភ្នំពេញ ថ្ងៃ០៣ ខែមករា ឆ្នាំ ២០១៤
រក្សាសិទ្ឋដោយ៖ ទស្សនាវដ្តីមនោរម្យព័រអាំងហ្វូ