បក្សសង្គ្រោះជាតិ និងបក្សប្រជាជន យកត្រូវរៀងខ្លួនចំពោះអំពើហិង្សា
ក្នុងពេលដែលមានកម្មករយ៉ាងតិច៥នាក់បានស្លាប់ និងរបួសច្រើននាក់ ក្រោយការប៉ះទង្គិចគ្នាដោយហិង្សារវាងកម្លាំងសមត្ថកិច្ច និងកម្មករ នៅផ្លូវវ៉េងស្រេង សង្កាត់មានជ័យ ខណ្ឌមានជ័យ គណបក្សប្រជាជនកម្ពុជាដែលជាគណបក្សគ្រប់គ្រងអំណាច និងគណបក្សសង្រ្កោះជាតិ ដែលជាគណបក្សជំទាស់ បានទម្លាក់កំហុសដាក់គ្នាទៅវិញទៅមកចំពោះអំពើហិង្សានេះ ហើយឆ្លើយយកត្រូវតែរៀងៗខ្លួន។ តែក្រុមអ្នកវិភាគ បានថ្លែងថា ចង់មិនចង់ គណបក្សទាំងពីរដែលទទួលឆ្នោតពីរាស្ត្រ ត្រូវតែជាតួអង្គសំខាន់ ក្នុងការទទួលខុសត្រូវចំពោះបញ្ហានេះ។
មួកមានរូបសញ្ញាគណបក្សនយោបាយធំពីរ នៅប្រទេសកម្ពុជា។
នយោបាយកម្ពុជា - តាមរយៈសេចក្តីថ្លែងការណ៍របស់ខ្លួន គណបក្សសង្គ្រោះជាតិ នៅថ្ងៃទី៣ ខែមករា ឆ្នាំ២០១៤នេះ បាន ស្នើឲ្យគណបក្សប្រជាជនកម្ពុជា ដែលដឹកនាំដោយលោកនាយករដ្ឋមន្ត្រី ហ៊ុន សែន បញ្ឈប់ការបង្រ្កាបជាបន្ទាន់ និងធ្វើការថ្កោលទោសយ៉ាងដាច់អហិង្សា ចំពោះការប្រើអំពើហិង្សារបស់កងកម្លាំងប្រដាប់អាវុធ បាញ់បង្ក្រាបលើកម្មករដែល បណ្តាលឲ្យមានមនុស្សស្លាប់ និងរបួស។
ក្នុងសេចក្តីថ្លែងការណ៍ដដែល គណៈបក្សជំទាស់លើកឡើងថា ប្រជាពលរដ្ឋខ្មែរ សហគមជាតិ និងអន្តរជាតិ មិនបានឈរអោបដៃមើលការបង្រ្កាបយ៉ាងព្រៃផ្សៃ របស់រដ្ឋាភិបាលបច្ចុប្បន្នលើប្រជាពលរដ្ឋកម្ពុជានោះទេ ខណៈពួកគេជាប្រជាពលរដ្ឋស្លូតត្រង់ គ្រាន់តែតវ៉ាដោយសន្តិវិធី ដើម្បីទទួលបានការតម្លើងប្រាក់ឈ្នួលសមរម្យ សម្រាប់ចិញ្ចឹមជីវិត។
រីឯរដ្ឋាភិបាលគ្រប់គ្រង់ដោយគណបក្សប្រជាជនកម្ពុជា តាមរយៈសេចក្តីប្រកាសព័ត៌មាន របស់ក្រសួងការងារ ចុះថ្ងៃទី៣ ខែ មករា ឆ្នាំ២០១៤ បានសម្តែការសោកស្តាយ ចំពោះអំពើហិង្សាដែលបានកើតឡើង និងបានចាត់ទុកសកម្មភាពទាមទាររបស់សហជីពមួយចំនួន និងកម្មករថាជាអំពើខុសច្បាប់ ហើយបានបង្កផលប៉ះពាល់ដល់សណ្តាប់ធ្នាប់សាធារណៈ ដែលធ្វើឲ្យប៉ះពាល់បរិយាកាសវិនិយោគនៅកម្ពុជា។
សេចក្តីប្រកាសព័ត៌មានដដែលនេះ បានលើកឡើងថា អំពើហិង្សាដែលបានកើតឡើង គឺជាការញុះញង់របស់គណបក្សសង្រ្គោះជាតិ និងសហជីពមួយចំនួននោះ។ ហេតុដូច្នេះ គណបក្សសង្រ្គោះជាតិ និងសហជីពទាំងនោះ គួរបញ្ឈប់សកម្មភាពជាបន្ទាន់ ហើយងាកមកសហការជាមួយ អាជ្ញាធរមានសមត្ថកិច្ច ដើម្បីដោះស្រាយបញ្ហាជាមួយគ្នា។
ជាមួយគ្នានេះ លោក ស ខេង ជាមន្រ្តីជាន់ខ្ពស់របស់គណបក្សប្រជាជនកម្ពុជា នៅថ្ងៃទី៣ ខែ មករា ឆ្នាំ២០១៤ នេះ ក្នុងកិច្ចសម្ភាសជាមួយប្រព័ន្ធផ្សព្វផ្សាយក្នុងស្រុក បានសម្តែង ការសោកស្តាយចំពោះអំពើហិង្សាដែលបានកើតឡើងរវាសមត្ថកិច្ច និងកម្មករ។ លោក ស ខេង បានលើកឡើងថា គណបក្សប្រជាជនកម្ពុជារបស់លោក ក៏ដូចជារដ្ឋាភិបាល មិនមានវិធានការណ៍ណាមួយបង្រ្កាបទៅលើកម្មករនោះទេ។ លោក ស ខេង បានទម្លាក់ការទទួលខុសត្រូវរហូតមានស្លាប់មនុស្សនេះ ថាបានកើតចេញពីការញុះញង់ របស់គណបក្សសង្រ្គោះជាតិ និងក្រុមសហជីព ដែលបានជម្រុញកម្មករ ឲ្យទាមទារប្រាក់ឈ្នួលគោល១៦០ដុល្លារអាមេរិក។
សូមរម្លឹកថា ការប៉ះទង្គិចគ្នារវាងកម្មករ និងកងកម្លាំងសមត្ថកិច្ច ដែលបណ្តាលឲ្យមានអ្នកស្លាប់ របួស ចាប់ខ្លួន ជាបន្តបន្ទាប់ ត្រូវបានអ្នកតាមដានស្ថានការណ៍សង្គមកម្ពុជា កត់សម្គាល់ឃើញថា កើតឡើងក្រោយពីរដ្ឋាភិបាលព្រមាន និងបង្ខំសហជីពចំនួន៦ និងកម្មករឲ្យទទួលយកប្រាក់ឈ្នួលគោល១០០ដុល្លារក្នុងមួយខែ ខណៈពួកគេបដិសេធ ហើយបន្តការទាមទារឲ្យបាន១៦០ដុល្លារ តាំងពីចុងឆ្នាំ២០១៣ រហូតមកដល់ការប៉ះទង្គិច ក្នុងដើមឆ្នាំ២០១៤នេះ។
ដោយឡែក អ្នកវិភាគនយោបាយឯករាជ្យបីរូប លោកបណ្ឌិត ឡៅ ម៉ុងហៃ លោកបណ្ឌិត សុខ ទូច និងលោកបណ្ឌិត កែម ឡី នៅថ្ងៃទី០៣ខែមករានេះ បានថ្វាយលិខិតយាងព្រះមហាក្សត្រ ព្រះបាទព្រះបរមនាថ នរោត្តម សីហមុនី ដើម្បីទ្រង់កោះអញ្ជើញថ្នាក់ដឹកនាំជាន់ខ្ពស់គណបក្សជាប់ឆ្នោតទាំងពីរ ជួបចរចាក្នុងពេលឆាប់បំផុត ដើម្បីដោះស្រាយស្ថានភាពចលាចលចំពោះមុខ។ លិខិតដែលចុះហត្ថលេខា ដោយបណ្ឌិតទាំងបីរូប បានសរសេរជាអាថ៌ថា ព្រឹត្តិការណ៍ហិង្សារវាងកម្មករ និងកងកម្លាំងប្រដាប់អាវុធ បានបណ្តាលឲ្យជនស៊ីវិលស្លាប់ និងរបួសជាច្រើននាក់ នៅថ្ងៃសុក្រនេះ គឺកើតឡើងភ្លាមៗ ដោយសារតែគណបក្សប្រជាជនកម្ពុជា និងគណបក្សសង្គ្រោះជាតិ មិនអាចដោះស្រាយបញ្ហានយោបាយបានតាមរយៈការចរចាទ្វេភាគី៕
--------------------------------------
ដោយ៖ អ៊ុំ បូរី - ភ្នំពេញ ថ្ងៃទី០៣ ខែមករា ឆ្នាំ២០១៤
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ