បើទោះបីជា​មាន​ការ​ធ្វើបាតុកម្មស្ទើរគ្រប់រោងចក្រទាំងអស់នៅក្នុងប្រទេសកម្ពុជា ពីសំណាក់ក្រុមបាតុករ ដើម្បី​ទាមទារប្រាក់ខែគោល ១៦០ ដុល្លារយ៉ាងណាក៏ដោយ ក៏តំណាងថៅកែរោងចក្រកាត់ដេរជាច្រើននៅកម្ពុជា នៅតែ​អះអាងថា ពួកគេ​មិន​អាចតម្លើងប្រាក់ខែជូនកម្មករនិយោជិក ១៦០ ដុល្លារបានឡើយ ពីព្រោះហួសពីលទ្ធភាព​របស់​ពួកគេ។

សន្និបាតប្រចាំឆ្នាំរបស់សមាគមរោងចក្រកាត់ដេរនិងស្បែកជើងនៅកម្ពុជា កាលពីខែមិនាឆ្នាំ២០១៣។ (រូបថត gmac-cambodia.org)

វិស័យកាត់ដេរ - កម្មករស្ទើរគ្រប់រោងចក្រទាំងអស់នៃប្រទេសកម្ពុជា បានចេញដើរដង្ហែក្បួន​តាម​ដងផ្លូវជាច្រើន​ នៅថ្ងៃព្រហស្បតិ៍នេះ ពាសពេញរាជធានីភ្នំពេញតែម្តង ដើម្បីប្រឆាំងទៅនឹងសេចក្តីសម្រេច របស់ក្រុមប្រឹក្សា​ការងារកាលពីថ្ងៃអង្គារទី ២៤ ខែធ្នូកន្លងទៅ ដែលសម្រេចផ្តល់ប្រាក់ឈ្នួលអប្បបរិមាសម្រាប់កម្មករត្រឹមតែ ៩៥ ដុល្លាក្នុងមួយខែប៉ុណ្ណោះ។ យ៉ាងណាក៏ដោយ​បើទោះបីជា មានការទាមទាររបស់ក្រុមកម្មករ ឲ្យថៅកែរោងចក្រ​តម្លើងប្រាក់ខែជូនកម្មករ ១៦០ ដុល្លារបែបនេះក្តី ក៏ភាគីនិយោជកនៅតែអះអាង ពី«អលទ្ធភាព»របស់​ខ្លួនក្នុង​ការ​តម្លើងជូនកម្មករ ១៦០ ដុល្លារជាដាច់ខាត។

លោក ជាតិ ខេមរា មន្រ្តីជាន់ខ្ពស់សមាគម (ថៅកែ) រោងចក្រកាត់ដេរ និងស្បែកជើងនៅកម្ពុជា ឬហៅកាត់តាម​ភាសា​អង់គ្លេសថា ជីម៉ាក (GMAC) បានថ្លែងថា ការទាមទាររបស់កម្មករដែលចង់បានប្រាក់ខែរហូតដល់ ១៦០ ដុល្លារក្នុងមួយខែនោះ គឺជា​ការទាមទារច្រើនហួសប្រមាណ ដែលខាងនិយោជកមិនអាចទទួលយកបាននោះទេ។ លោកថា សម្រាប់បរិបទ​ប្រទេសកម្ពុជានាពេលបច្ចុប្បន្ននេះខាងថៅកែរោងចក្រ គ្មានលទ្ធភាពផ្តល់ជូនកម្មករដល់​ទៅ ១៦០ ដុល្លារជា​ដាច់ខាត។

តំណាងថៅកែរោងចក្ររូបនេះបន្តថា ការធ្វើកូដកម្ម ឬបាតុកម្ម ទាមទាររបស់ក្រុមកម្មករ គឺជាសិទ្ធិរបស់ពួកគេ។ ក៏ប៉ុន្តែថៅកែមិនអាចបំពេញបំណងបានឡើយ ពីព្រោះថា នៅកម្ពុជាភាគច្រើនអ្នក​វិនយោគ ក្នុងវិស័យកាត់ដេរ​គឺ​សុទ្ធ​សឹងតែជាជនជាតិបរទេស ដែលមានរហូតទៅដល់ ៩៥ ភាគរយឯណោះ។ ម្យ៉ាងទៀត នៅកម្ពុជាខាងថៅកែ​រោងចក្រ មិនសូវបានចំណេញដូចជានៅប្រទេសចិន វៀតណាម និងថៃឡើយ ពោលគឺគេទទួលបានចំណេញ​តិច​តួចណាស់។ ម្លោះហើយ ប្រសិនបើភាគីខាងថៅកែរោងចក្រ តម្លើងជូនដល់កម្មករចំនួន ១៦០ ដុល្លារភ្លាមៗនោះ ពួកគេពិតជាមិនអាចធ្វើទៅរួចឡើយ។

យ៉ាងណាក៏ដោយជុំវិញបញ្ហានេះ ក្រុមសហជីពមួយចំនួនបានអះអាងថា បច្ចុប្បន្ននេះរដ្ឋាភិបាល និងភាគីខាង​ថៅកែ​រោងចក្រ ពិតជាមានសមត្ថភាពអាចតម្លើងប្រាក់ខែជូនកម្មករបានយ៉ាងហោចណាស់ចំនួន ១៦០ ដុល្លារ​ក្នុង​មួយខែយ៉ាងពិតប្រាកដ ប្រសិនបើពួកគេមានឆន្ទៈក្នុងការដោះស្រាយ ដោយរដ្ឋាភិបាលគ្រាន់តែលុបបំបាត់ អំពើ​ពុកលុយ យកលុយហុចតាមក្រោមតុ នៅក្នុងវិស័យវាយនភ័ណ្ឌនេះឲ្យមានប្រសិទ្ធភាពតែប៉ុណ្ណោះ។

ក្រុមអ្នកសិក្សាស្រាវជ្រាវបានរកឃើញថា សម្រាប់បរិបទប្រទេសកម្ពុជាសព្វថ្ងៃ កម្មករនិយោជិតគួរ​ទទួលបាន​ប្រាក់​បៀវត្សរ៍ប្រមាណពី ១៦០ ទៅ១៧០ ដុល្លារទើបពួកគេអាចទ្រទ្រង់ជីវភាពរស់នៅប្រឆាំងថ្ងៃបាន។ ប្រសិនបើពួកគេ​ទទួលបានប្រាក់ខែអប្បបរិមា មិនដល់ ១៦០ ដុល្លារក្នុងមួយខែ ពួកគេនឹងប្រឈមមុខនឹងការខ្វះខាតគ្រប់បែបយ៉ាង នៅក្នុងការចិញ្ចឹមជីវិតប្រចាំថ្ងៃ ពីព្រោះថា តម្លៃទំនិញលក់នៅលើទីផ្សារ មានតម្លៃខ្ពស់មិនសមមាត្រ​នឹងប្រាក់ខែ​របស់ពួកគេឡើយ៕

---------------------------------------------------------
ដោយ៖ ជា ធីរិទ្ធ - ភ្នំពេញ ថ្ងៃទី២៦ ខែធ្នូ ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ