បន្ទាប់ពីការធ្វើទស្សនកិច្ចរយៈពេលប្រាំថ្ងៃនៅកម្ពុជា ដោយគ្មានការជូនដំណឹងជាមុន អនុគណៈកម្មការបង្កាអំពើ​ទារុណកម្ម នៃអង្គការសហប្រជាជាតិ តាមរយៈសេចក្តីប្រកាសព័ត៌មានមួយចុះថ្ងៃទី១៦ ខែធ្នូ ឆ្នាំ២០១៣ បាន​សម្តែងការព្រួយបារម្ភ និងជម្រុញកម្ពុជា ឲ្យបង្កើតស្ថាប័នជាតិឯករាជ្យ ដើម្បីតាមដាន និងឃ្លាំមើល លើការ​គ្រប់​គ្រងអ្នកជាប់ឃុំឲ្យស្របតាមខ្លឹមសារនៃអនុសញ្ញាស្ដីពីការប្រឆាំងការធ្វើទារុណកម្ម និងពិធីសារបន្ថែមដែលកម្ពុជា​ជារដ្ឋហត្ថលេខីដែរនោះ។

ពន្ធនាគារនៅខេត្តកណ្ដាល។ (រូបថត MONOROOM.info/ D.KEO)

ក្នុងបំណងលើកកម្ពស់ការប្រព្រឹត្តទៅលើ អ្នកជាប់ឃុំក្នុងប្រទេសកម្ពុជា ឲ្យកាន់តែប្រសើរឡើងថែមទៀត អនុគណៈកម្មការបង្កាអំពើទារុណកម្ម នៃអង្គការសហប្រជាជាតិ ក៏បានលើកឡើងដែរថា ក្រោយដំណើរទស្សកិច្ច​នៅឆ្នាំ២០១៣នេះ គណៈប្រតិភូក្រុមការងារបង្កាអំពើទារុណកម្ម បានបង្ហាញពីការសង្កេត​បណ្ដោះអាសន្ន ទៅកាន់​អាជ្ញាធរកម្ពុជា ជាសម្ងាត់។ ហើយការរកឃើញទាំងប៉ុន្មាន នៅក្នុងដំណើរទស្សនកិច្ចលើកនេះ នឹងត្រូវរក្សាជា​ការ​សម្ងាត់ រហូតដល់ពេលដែលរដ្ឋាភិបាលកម្ពុជា សម្រេចចិត្តបង្ហាញបញ្ហានេះជាសាធារណៈ។

សូមបញ្ជាក់ថា សមាជិកនៃអនុគណៈកម្មការបង្កាអំពើទារុណកម្មរបស់អង្គការសហប្រជាតិ បានធ្វើដំណើរ​ទស្សនកិច្ចមកកម្ពុជាដោយគ្មានការជូនដំណឹងជាមុន រយៈពេល៥ថ្ងៃ គឺពីថ្ងៃទី៩ ដល់ថ្ងៃទី១៣ធ្នូ ឆ្នាំ២០១៣។ ក្នុងដំណើរទស្សនកិច្ចនេះ ក្រុមមន្រ្តីរបស់អង្គការសហប្រជាជាតិបានទៅកាន់កន្លែងឃុំឃាំងនានានៅកម្ពុជា ក្នុង​នោះរួមមានពន្ធនាគារ ប៉ុស្តិ៍ប៉ូលីស មជ្ឈមណ្ឌលស្ដារនីតិសម្បទា និងកន្លែងបន្សាបសារធាតុញៀនជាដើម។

ជុំវិញបញ្ហានេះ លោក គឹម សារិន ជាប្រធាននាយកដ្ឋានអប់រំកែប្រែ ក្នុងកិច្ចសម្ភាសជាមួយ​ទស្សនាវដ្តី​មនោរម្យព័ងអាំងហ្វូនៅថ្ងៃទី១៧ ខែធ្នូ ឆ្នាំ២០១៣ បានលើកជាចម្ងល់ថា តើមន្រ្តីអង្គការសហប្រជាជាតិ​ទាំង​នោះអាចរកឃើញបញ្ហាធ្វើទារុណកម្មក្នុងប្រទេសកម្ពុជានៅកន្លែងណា? ហើយមន្រ្តីមួយណាជាអ្នក​ធ្វើជា​ទារុណកម្ម?។ ប្រធានាយកដ្ឋានដដែលនេះលើកឡើងថា គ្នានទេការធ្វើទារុណកម្មនៅក្នុងពន្ធនាគារកម្ពុជា ព្រោះកម្ពុជាមានច្បាប់ មានយន្តការ មានគណៈកម្មការច្បាស់លាស់ និងការសហការជាមួយអង្គការជាដៃគូរ សម្រាប់ត្រួតពិនិត្យ និងកែប្រែបញ្ហាទាំងនេះ។

លោក គឹម សារិន បញ្ជាក់ថា៖ «មកដល់ពេលនេះ យើងនៅតែថែរក្សាជនជាប់ឃុំ មិនឲ្យមានបញ្ហាអ្វីទាំងអស់ តែបើមានមានតិចតួចបំផុត ហើយជាបញ្ហារវាងជនជាប់ឃុំ និងជនជាប់ឃុំ។ ពួកគេជាមនុស្សខុសគ្នា តែត្រូវរស់​នៅជាមួយគ្នាមួយបន្ទប់ពី២០ទៅ៣០នាក់ យើងរស់នៅពីរនាក់ប្តីប្រពន្ធគង់ឈ្លោះគ្នាតិចតួច ចុះទម្រាំពួកគាត់? គ្មានទេមន្រ្តីធ្វើទារុណកម្មលើអ្នកទោស»។

គួររម្លឹកថា រដ្ឋាភិបាលកម្ពុជា តាមរយៈក្រសួងមហាផ្ទៃ កាលពីពេលថ្មីៗនេះ ក្នុងបំណងធ្វើឲ្យប្រសើរឡើង​ចំពោះ​បញ្ហាជនជាប់ឃុំ គ្រោងនឹងប្តូរឈ្នោះពីពន្ធនាគារទៅជាមន្ទីរអប់រំកែប្រែ។ ហើយនឹងផ្តល់ការអប់រំ នូវជំនាញ និង​ការស្តារនីតិសម្បទាផ្សេងៗទៀត ឲ្យកាន់តែប្រសើរឡើងដល់ជនជាប់ជាប់ឃុំទាំងនោះ ដើម្បីឲ្យពួកគេមាន​លទ្ធភាព​ធ្វើសមាហរណកម្មចូលទៅក្នុងសង្គមវិញ ក្រោយការអនុវត្តទោសត្រូវបានបញ្ចប់៕

---------------------------------------
ដោយ៖ អ៊ុំ បូរី - ភ្នំពេញ ថ្ងៃទី១៧ ខែធ្នូ ឆ្នាំ២០១៣
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ