រដ្ឋាករទឹកស្វយ័តក្រុងភ្នំពេញ (រ.ទ.ស.ភ) បានទទួលនូវពានរង្វាន់ ដឺម៉ាជេសស្ទីក ហ្វាយ ខនធីនិន អឹវឺត ហ្វស៍ គ្វ័រលីធី អេន អិចសឺលែន (The Majestic Five Continents Award For Quality and Excellence) ជាលើកទីប្រាំមួយ ដែល​ជា​ពានរង្វាន់​លំដាប់អន្តរជាតិ នៃការគ្រប់គ្រង និងផ្តល់ទឹកស្អាតនៅរាជធានី ភ្នំពេញ ដែលបានផ្តល់ឲ្យដោយ​គណកម្មាធិការជ្រើសរើស​របស់សមាគមមួយ ហៅថា Assosiation Otherways Management and Consulting - France (OMAC) នៃប្រទេសបារាំង។

ទឹកស្អាតប្រើប្រាស់ និងអាចទទួលទាន ចេញពីបំពង់ទឹក។ (រូបថត europe1.fr)

រដ្ឋាករទឹកស្អាត - ក្នុងសន្និសិទសារព័ត៌មាន នាទីស្តីការរដ្ឋាករទឹកស្វយ័តក្រុងភ្នំពេញ លោក ស៊ឹម ស៊ីថា អគ្គនាយក​រដ្ឋាករ​ទឹកស្វយ័តភ្នំពេញ បានលើកឡើងថា ការទទួលពានរង្វាន់ក្នុងឆ្នាំ២០១៣នេះ ជាការសម្រេចដោយផ្អែកលើ​លក្ខណៈវិនិច្ឆ័យ នៃការគ្រប់គ្រងគុណភាពសរុប (Total Quality Managemant “TQM” ) និងគុណភាពនៃការបំរើ​អតិថិជន ការប្តេជ្ញាចិត្ត ការដឹកនាំ ការកែលំអ ទៅតាមសកម្មភាពនានាដោយផ្អែកលើការពិត។

មេដឹកនាំរដ្ឋាករទឹកស្វយ័តរូបនេះ បានបន្តរថា ការប្រកួតប្រជែងទទួលនូវពានរង្វាន់នេះមាន ក្រុមហ៊ុនចំនួន ៧៥០០ មកពី​១៦០ ប្រទេស ក្នុងនោះមានតែក្រុមហ៊ុនចំនួន៥២ មកពីប្រទេសចំនួន៤០ ប៉ុណ្ណោះដែលទទួលបាននូវជ័យ​លាភី​​នេះ​រួម​ទាំងកម្ពុជាផង។

ទាក់ទងនឹងចំណាត់ថ្នាក់នៃជ័យលាភី ក្នុងការទទួលបាននូវពានរង្វាន់នេះ លោកបានបន្ថែមថា ដោយផ្អែកទៅលើ​យន្តការ​​បីចំណុច ក្នុងការជ្រើសរើសរបស់ OMAC រួមមាន៖ ទីមួយ​ ការជ្រើសរើស​បញ្ចូលជាអង្គភាពបេក្ខជន តាម​រយៈព័ត៌មាន​នានាទីពីរ ការវាយតម្លៃដំបូងនៃសមាជិកសមាគម OMAC និងទីបី ការជ្រើសរើសផ្តាច់ព្រ័ត្ត តាមរយៈ​ការបោះឆ្នោតពី​គណកម្មាធិការ​ពិសេសរបស់ OMAC។

ជាមួយគ្នានេះលោកក៏បានបង្ហាញនូវមោទនៈភាពថា «ភាពប្រាដកនិយមរបស់រដ្ឋាករទឹកស្វយ័តក្រុងភ្នំពេញ ដែល​បាន​ក្រោកចេញពីឱនភាព ឈានឆ្ពោះទៅរកភាពរុងរឿងនៃការគ្រប់គ្រង និងបន្តរការអភិវឌ្ឍន៍ប្រកបដោយស្ថេរភាព តាម​ទិសដៅ​នឹងយុត្តិសាស្រ្តចតុកោណរបស់រាជរដ្ឋាភិបាល ក្នុងការរក្សានូវស្ថេភាពនិងការផ្គត់ផ្គង់ទឹកស្អាត ស្រប​តាមតម្រូវការ​របស់ប្រជាពលរដ្ឋក្នុងរាជធានីភ្នំពេញ»។

ទោះជាយ៉ាងណានេះក៏ដោយ ថ្មីៗនេះរដ្ឋាករទឹកស្វយ័តក្រុងភ្នំពេញ ក៏ទទួលនូវការរិះគន់ពីសំណាក់អតិថិជន​របស់​ខ្លួន ក្នុងការគ្រប់គ្រង«គុណភាព»ទឹកស្អាត និងតម្លៃរបស់សេវានៃការប្រើប្រាស់។ ក្នុងរយៈកាលពីរទៅបីសប្តាហ៍​មុននេះ គ្រប់​អតិថិជនទាងអស់ដែលរស់នៅក្នុងប្លុកបឹងកក់ បានបើកប្រើប្រាស់ទឹកស្អាតនោះ បែរជាមានក្លិន«ស្អុយ និងពណ៌ខ្មៅ រាង​ខាប់អន្ធិល» ដែលបណ្តាលឲ្យខាតបង់ពេលវេលាក្នុងការសំអាតអាង ឬពាង និងខកខានការ ប្រើប្រាស់ទឹកក្នុងរយៈពេល​មួយខ្លីដែលមិនបានត្រៀមទុកជាមុន និងបញ្ហាមួយទៀតគឺ ជានិច្ចកាលទឹក​នោះតែងតែ​មានធំខ្លិនថ្នាំជាដើម។

ប្រជាពលរដ្ឋម្នាក់ ដែលជាអ្នកបម្រើរាជការរស់នៅទីក្រុងភ្នំពេញ លោក ស្រុន អេង បានបញ្ចេញនូវមតិថា លោក​ទទួល​ស្គាល់ ក្នុងរយៈកាលកន្លងមក ឃើញថាការផ្គត់ផ្គង់ទឹកស្អាតនៅភ្នំពេញមានលក្ខណៈប្រសើរ ដែលអាចទទួល​យកបាន ទាំង«កម្លាំងទឹក គុណភាព និងតម្លៃ»។ លោកបានបន្តរថា ក្នុងរយៈកាលថ្មីៗនេះ ក្រោយពីមានការរីកចំរើន​ផ្នែកសំណង់​អាគារ បានធ្វើឲ្យកម្លាំងទឹក ក៏ដូចជាការផ្គត់ផ្គង់ទឹក មានការថយចុះ ពិសេសលើគុណភាព ដែលជាកត្តា​ចាំបាច់ ក្នុងការ​រក្សា​នូវសុខភាពរបស់ប្រជាពលរដ្ឋទូទាំងរាជធានីភ្នំពេញ។

«ទឹកមានការធំក្លិន រាងខាប់ និងមានពណ៌ខ្មៅដូចជាទឹកសម្អុយ»

ទាក់ទងនឹងតម្លែវិញ លោក ស្រុន អេង បានបន្តរថាទឹកក្នុងរាជធានីភ្នំពេញមានតម្លៃថ្លៃនៅឡើយ បើធៀបទៅនឹង​ប្រាក់ខែ​​សម្រាប់មន្រ្តីរាជការ។ លោកបានអំពាវនាវដល់រដ្ឋាភិបាល ត្រូវតែគិតគូពីបញ្ហាប្រាក់ខែមន្រ្តីរាជការ ដោយ​ធៀបទៅនឹង​តម្លៃទំនិញ​លើទីផ្សារ។ «នៅប្រទេសគេ ប្រើទឹកច្រើនរដ្ឋបញ្ចុះតម្លៃ ដោយឡែកនៅស្រុកខ្មែរប្រើ​ទឹក​ច្រើន បែរជា​តម្លើងថ្លៃ​ទៅវិញ ខ្ញុំដូចជាមិនយល់?»។

លោក ស្រុន អេង បានថ្លែងត្អូញត្អែរពីករណី «ទឹកមានការធំក្លិន រាងខាប់ និងមានពណ៌ខ្មៅដូចជា​ទឹក​សម្អុយ» យ៉ាង​ដូច្នេះ ថាទឹកជាអាយុជីវិតមនុស្ស បើមិនស្អាត មិនមានអនាម័យអាចនឹងប៉ះពាល់ ដល់សុខភាពប្រជាពលរដ្ឋ​រាប់ម៉ឺន​នាក់​ក្នុង​ទីក្រុងភ្នំពេញ។ ដូច្នេះបើសិនជាមានករណី មិនប្រក្រតីណាមួយ រដ្ឋាករទឹកគួរធ្វើសេចក្តីជូនដំណឹង​ពីបញ្ហា​នេះ ដើម្បី​ប្រជា​ពលរដ្ឋបានដឹង នឹងត្រៀមខ្លួនជាមុន។

ទាក់ទងបញ្ហាទឹកខ្មៅដែលបានកើតឡើង តាំងពីប៉ុន្មានសប្តាហ៍កន្លងមកនេះ មន្រ្តីនៃ​រដ្ឋាកទឹកមួយរូប ក្នុងលក្ខខណ្ឌ​មិន​​បញ្ចេញឈ្មោះ បានថ្លែងប្រាប់ទស្សនាវដ្ដីមនោរម្យព័ងអាំងហ្វូថា «ដោយសារ​តែនៅរដ្ឋាករទឹកបាន​ដាច់​ភ្លើង ពេល​នោះម៉ាស៊ីនដែលកំពុងតែបូមទឹកស្អាតឡើង បានធ្វើឲ្យវាច្រាលមកវិញ ដោយនាំ​ទាំង​កាកសំណល់មក​ជា​មួយ»។ មន្ត្រីរូបនោះ បានថ្លែងអះអាងទៀតថា៖ «រដ្ឋាករទឹកមិនអាចប្រើប្រាស់នូវ​ម៉ាស៊ីនភ្លើងផ្ទាល់​ខ្លួន​ដូច​សណ្ឋាគារ​បាន​ទេ នេះជាការកំណត់របស់ថ្នាក់លើ ត្រូវតែប្រើប្រាស់នូវភ្លើងរដ្ឋ។»

សូមរម្លឹកថា ពានរង្វាន់ដែលរដ្ឋាករទឹកស្វយ័តក្រុងភ្នំពេញទទួលបាននេះជា ពានរង្វាន់លើកទីប្រាំមួយ នៃការទទួល​ស្គាល់​ពីភាពជឿនលឿននៃអង្គភាពមួយនេះ ពីបណ្តាស្ថាប័នអន្តរជាតិ។ ពិធីប្រគល់រង្វាន់លំដាប់ពិភពលោកនេះ បាន​រៀបចំធ្វើ កាលពីថ្ងៃទី១៨ ខែវិច្ឆិកា ឆ្នាំ២០១៣ កន្លងម​ក នៅទីក្រុងហ្សឺណែវ ប្រទេសស្វីស៕

រូបភាពមួយចំនួនទៀត ស្ដីពីពានរង្វាន់ ដែលរដ្ឋាករទឹកទទួលបាន៖

---------------------------------------------------------
ដោយៈ អ៊ុម វ៉ារី - ភ្នំពេញថ្ងៃទី២៦ វិច្ឆិកា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ