ស្រ្តី១នាក់បានស្លាប់ (មានសាក្សីថាអ្នកស្លាប់មាន២នាក់) និងច្រើននាក់ត្រូវរបួសក្រោយការប៉ះទង្គិច រវាងសមត្ថកិច្ចចម្រុះ គ្រប់គ្រងដោយរដ្ឋាភិបាលនៃសភា​ឯកបក្ស​អាណត្តិទីប្រាំ ជាមួយប្រជាពលរដ្ឋដែលជាក្រុមកម្មកររោងចក្រ។ ក្រៅពីនេះនៅ​មានការ​ចាប់​ខ្លួនប្រជាពលរដ្ឋ ជាច្រើននាក់ទៀត ក្នុងនោះក៏មាន ព្រះសង្ឃចំនួន១១អង្គ និងនេនតូចព្រះជន្ម​ប្រហែលជា​១៣វស្សាមួយអង្គដែរ។ នេនតូចនេះ មុននឹងការចាប់ខ្លួន ត្រូវក្រុមសមត្ថកិច្ចទាត់ចំនួនពីរជើងយ៉ាងដំណំ ឯបុរស្សម្នាក់​ទៀត​ដែលគេដឹងថា មាន​សតិមិនគ្រប់គ្រាន់ស្នាក់នៅក្នុងវត្តនោះ ក៏ត្រូវបានចាប់យកទៅដែរ។

គ្រាប់កាំភ្លើងដែលគេឃើញកងកម្លាំងបាញ់ចេញពីកាំភ្លើងរបស់សមត្ថកិច្ច។ (រូបថត MONOROOMinfo/ O. Vary)

សម្ភាសពីវត្តស្ទឹងមានជ័យ - អំពើហិង្សា រហូតមានការបាញ់បោះដោយគ្រាប់កាំភ្លើងពិត បានក្លាយជាយុទ្ធសាស្ត្រ និង​ជំនាញមួយយ៉ាងពិសេស ដែលសមត្ថកិច្ចដែលតែងយកមកអនុវត្ត ដើម្បីបង្គ្រាបរាល់ការជួបជុំរបស់ប្រជាពលរដ្ឋ អង្គការ​សង្គស៊ីវិល ក្រុមកម្មករ ក្រុមគ្រូបង្រៀន បើគ្រាន់តែពួកគេទាមទាឲ្យមានការគោរពច្បាប់ សិទ្ធិមនុស្ស និងសិទ្ធិសេរីភាព​ប៉ុណ្ណោះ។ ទាមទារតវ៉ា ដោយសារតែកត្តា​ជីវភាព ទំនិញលើទីផ្សាថ្លៃ ប្រាក់ខែទាប និងមិនបានបើកជាច្រើនខែទៀតនោះ ជាមួយនឹងរឿង​រ៉ាំរ៉ៃ​ច្រើនឆ្នាំមកហើយ និងគ្មានដំណោះស្រាយណាមួយសមស្របពីរដ្ឋាភិបាល ក៏ដូចជាថៅកែរោងចក្រ។

ការប៉ះទង្គិចយ៉ាងចាស់ដៃ រវាងកម្មកររោងចក្រអេស អិល ជាមួយក្រុមសមត្ថកិច្ចចម្រុះរបស់រាជរដ្ឋាភិបាលក្នុងថ្ងៃទី១២ ខែវិច្ឆិកា ២០១៣នេះ ជាភស្ដុតាងថ្មីមួយទៀត បង្ហាញថាការអនុវត្តន៍ផ្ទាល់កន្លែង នូវយុទ្ធសាស្ត្រ និងជំនាញរបស់ក្រុម​សមត្ថកិច្ចពិតជាបានប្រព្រឹត្តិទៅ ប្រកបដោយប្រសិទ្ធភាពមែន។ ការប៉ះទង្គិច ដែលឈានទៅដល់ការបាញ់កាំភ្លើង សំដៅ​ហ្វូងបាតុករ និងបានបណ្ដាលឲ្យស្រ្តីម្នាក់ លក់បាយតាមបណ្តោយផ្លូវ មុខវត្តស្ទឹងមានជ័យ ឈ្មោះអេង សុខុម អាយុ៤៩ឆ្នាំ និង (អាចមាន) ស្រ្តីវ័យក្មេងម្នាក់ទៀតជាកម្មការីនីអ៊ិសអិល ក៏ត្រូវបានស្លាប់នៅពេលទៅដល់មន្ទីពេទ្យ។ នេះបើតាមការ​អះអាង របស់គ្រួសារជនរងគ្រោះ និងប្រជាពលរដ្ឋម្នាក់ដែលនៅក្នុងវត្តស្ទឹមមានជ័យ។

កញ្ញា វង្ស វល័ក្ខ អាយុ២៣ឆ្នាំ ជាកូនជនរងគ្រោះដែលបានស្លាប់ឈ្មោះអេង សុខុម បានបញ្ជាក់​ប្រាប់​អ្នក​សារព័ត៌មាន​ទាំង​ទឹកភ្នែកថា ម្តាយកញ្ញាកំពុងឈរលក់បាយព្រឹកម៉ោងជាងប្រាំបួន នៅយ៉ាងងជ្រៅ អែបទៅនឹង​របងថ្ម​របស់​សាលារៀន បានត្រូវគ្រាប់កាំភ្លើងមួយគ្រាប់ចំទ្រូង ក្រោមដោះ។ កញ្ញាបានរៀបរាប់ថា ពេលនោះម្ដាយរបស់នាងមិនទាន់​បាន​ស្លាប់​ភ្លាមៗនោះទេ គាត់នៅបើកភ្នែកនៅឡើយ ហើយក៏ដឹកយកទៅពេទ្យ តែគេមិនទទួល គាត់ក៏បានស្លាប់​តែ​ម្តងទៅ។ ឥឡូវ​សពត្រូវបានដឹក មកធ្វើបុណ្យនៅផ្ទះហើយ។

រង្ស រល័ក្ខ បានចោទជាសំនួរថា «តើករណីនេះអ្នកណាជាអ្នកទទួលខុសត្រូវ។ យើងនិយាយមិនឈ្នះគេទេ ឯការដាក់​ពាក្យ​បណ្តឹងក៏ឥតប្រយោជន៍ដែរ។ (...) ស្លាប់ម្តាយមួយទាំងមូលហើយ ត្រូវក្រុមសមត្ថកិច្ចទាំងនោះមកគំរាមកំហែងថា ជាអ្នក​ចូលរួមធ្វើបាតុកម្មថែមទៀត និងថែមទាំងវាយអីវ៉ាន់លក់ដូរខ្ទេចខ្ទីអស់ទៀត»។ (...) ពុកខ្ញុំនៅពេទ្យ ចាំគាត់មកដល់ស៊ឹម​គិតទៀត។»

តាមសាក្សីនៅផ្ទាល់កន្លែង បាននិយាយឲ្យដឹងថា មនុស្សស្លាប់អាចមានចំនួនម្នាក់ថែមទៀត ដែលជាកម្មការិនីវ័យក្មេង​ម្នាក់ របស់រោងចក្រ អេសអ៊ិល។ សាក្សីបាននិយាយថា នារីវ័យក្មេងនោះ បានស្លាប់ នៅវេលាម៉ោង ១២ថ្ងៃត្រង់ ថ្ងៃទី១២ខែ​វិច្ឆិកា បន្ទាប់ពី​នារី​នោះ បានត្រូវគ្រាប់កាំភ្លើងចំកណ្ដាលពោះ ហើយដឹកទៅដល់មន្ទីរពេទ្យនោះ។ ប៉ុន្តែដំណឹងមរណភាព​​មួយ​ទៀតនេះ នៅ​មិនទាន់មានប្រភព ដែលគួរឲ្យទុកចិត្តបានណាផ្សេង អាចបញ្ជាក់បាននៅឡើយ។

តាមការពណ៌នារបស់លោក ទិត្យ ប្រជាពលរដ្ឋដែលបាននៅកន្លែងកើតហេត្តនោះ បានតំណាលថា ដំបូងឡើយក្រុម​កម្មករដែលមានគ្នាប្រហែលជាជិតពីររយនាក់ បាននាំគ្នាធ្វើការដង្ហែរជាក្បួនទៅកាន់ក្រសួងការងារ ដើម្បីជួយជំរុញ​ឲ្យ​មានការដោះស្រាយបញ្ហា ដែលនៅសេសសល់ និងជាចំណុចសំខាន់នោះឲ្យបានឆាប់រហ័យ។

លោកបន្តរថា ពួកគេបានធ្វើដំណើតាមផ្លូវទំនប់ថ្មី(៣៧១)ដែលជាផ្លូវជិត តែត្រូវបានរាំស្ទះដោយកម្លាំងសមត្ថកិច្ចជាង​បីរយនាក់ប្រដាប់ដោយខែល ដំបងឆក់ និងឡានទឹក។ ក្រុមកម្មករ ក៏បានបង្វែទិសដៅមកតាមផ្លួវវេងស្រេង(២១៧) តាម​មុខវត្តស្ទឹងមានជ័យវិញ។ ពេលមកដល់ត្រង់ចំណុចក្បាលស្ពាន ក៏ត្រូវបានរារាំងដោយកម្លាំងសមត្ថកិច្ចដដែល។ លោក​បន្ថែមថា ដោយការជំនះ ទៅមុខឲ្យខានតែបានរបស់ក្រុមកម្មករនោះ ក៏បាននាំគ្នាបុកទម្លាយរនាំងខែល ដែលកាន់​ដោយ​ក្រុមសមត្ថកិច្ចទាំងនោះ។ ឃើញសភាពការមិនអាចទប់ទសល់បាន សមត្ថកិច្ចក៏បានប្រើឡានទឹក និងគ្រាប់បែងផ្សែង​បាញ់»បំបែក។ ពេលនោះក៏បណ្តាលឲ្យក្រុមកម្មករមានកំហឹង ក៏បានប្រើនូវដុំថ្មជាការតបតទៅវិញ។

ប្រជាពលរដ្ឋម្នាក់ទៀត ដែលសុំមិនបញ្ចេញឈ្មោះ និងជាជនរងគ្រោះម្នាក់ដែរនោះបានបញ្ជាក់ថា លោកជាអ្នកដំណើរ មិន​មែនជាក្រុមបាតុករនោះទេ តែដោយផ្លូវស្ទះពេក ក៏សម្រេចចិត្តជិះផ្លូវកាត់ និងបានចូលទៅតាមវត្តស្ទឹងមានជ័យ។ គាប់ជួន​ជាមួយគ្នានោះ លោកបានឃើញវត្តមានសមត្ថកិច្ចជាច្រើននាក់បានចូលពេញក្នុងវត្ត និងបានធ្វើការវាយ​ទៅលើ​លោកសង្ឃ និស្សិតស្នាក់ក្នុងវត្ត និងប្រជាពលរដ្ឋមួយចំនួនទៀតមិនរើសមុខ។ លោកបន្តរថា ឲ្យតែអ្នកនៅទើសមុខ ត្រូវ​បាន​គេ​ចោទ​ប្រកាន់ថាជាក្រុមបាតុករ និងវាយទាត់ធាក់ ចាប់ខ្លួនសឹងតែទាំងអស់។ «ខ្ញុំសំណាងហើយ​ដែលរត់គេចទាន់​នោះ។ ស្មាន​តែ​ដីគោកខំលោតគេចខ្លួន តែត្រូវផុងនឹងប្រឡាយទឹកស្អុយជាប់ខ្លួនត្រឹមដើមទ្រូង ក៏លាក់ខ្លួនក្នុងនោះ​តែម្តង​ទៅទើមបាន​រួច​ខ្លួន។ (...) បុរសម្នាក់ដែលមានសតិមិនគ្រប់គ្រាន់ ក៏ត្រូវបានចាប់យកទៅជាមួយដែរ»។

មតិមហាជនបានធ្វើការកត់សម្គាល់ថា វិបត្តិ ឬភាពជាប់គាំងនយោបាយ ក្រោយការបោះឆ្នោតថ្ងៃទី២៨ ខែក្កដានេះ គេ​មើលឃើញថាសមត្ថកិច្ច ឬថ្នាក់ដឹកនាំក្បាលម៉ាស៊ីនដោយឯកបក្ស ហាក់បីដូចជាមានការខ្លាចរអា​ចំពោះការ​សម្តែង​មតិ​របស់ប្រជាពលរដ្ឋ។ ឲ្យតែមានការជួបជុំរបស់ប្រជាពលរដ្ឋ ទោះស្ថិតក្នុងកិច្ចការណាមួយ«ជាក់លាក់»ក៏ដោយក្រុម​កង​កម្លាំងសមត្ថកិច្ច តែងតែបញ្ជូនកម្លាំងយ៉ាងច្រើនសន្ធឹកសន្ធាប់ប្រដាប់ដោយ ខែល ដំបង ដំបងឆក់ គ្រាប់បែកផ្សែង និង​ឡានទឹកជាដើម ដែលពួកគាត់(សមត្ថកិច្ច) យល់ថាជាដំណោះស្រាយមួយដែលប្រសើរ និងមានប្រសិទ្ធិភាពជាង​ការ​ជួប​ចចារ ឬទទួលយកការដោះស្រាយដោយសន្តិវិធីជុនប្រជាពលរដ្ឋនោះ៕

---------------------------------------------------------
ដោយៈ អ៊ុម វ៉ារី - ភ្នំពេញថ្ងៃទី១២ វិច្ឆិកា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ