ប្រតិកម្មរបស់ក្រុមអង្គការសង្គមស៊ីវិល បានកើតឡើងទៀត បន្ទាប់ពីការរារាំង ឬភាពមិនអើពើរបស់អាជ្ញាធរពាក់ព័ន្ធ ក្នុង​រយៈកាលកន្លងមកនេះ នៅក្នុងវិបត្តិដីធ្លីដែលបានកើតឡើង មិនចេះចប់មិនចេះហើយ។ ប្រជាពលរដ្ឋដែលរងគ្រោះ ដោយ​ការរំលោភយកដីធ្លី និងការបណ្តេញចេញដោយបង្ខំ នៅតែប្រកាន់យកការទាមទាតវ៉ា នូវអ្វីដែលសិទ្ធិស្របច្បាប់របស់​ពួក​គេ ជាពិសេសសិទ្ធិរស់នៅសមរម្យ សិទ្ធិមានកម្មសិទ្ធិដីធ្លីផ្ទះសម្បែង និងសិទ្ធិបញ្ចេញមតិ ដែលការពារដោយរដ្ឋធម្មនុញ្ញ។

ការដាក់ពង្រាយកងកម្លាំងសមត្ថកិច្ចរាប់សិបរយនាក់ ដើម្បីទប់ទល់នឹងការជួបជុំ របស់ពលរដ្ឋរងគ្រោះនឹងបញ្ហាដីធ្លី។ (រូបថត MONOROOM.info/ O. Vary)

រាជធានីភ្នំពេញ - ប្រជាពលរដ្ឋដែលរងគ្រោះដោយគ្មានជំរក បានមកជួបជុំគ្នានៅទីទួលយាយដូនពេញ (វត្តភ្នំ) ជាមួយ​នឹង​អង្គការសង្គមស៊ីវិលជាតិ និងអន្តរជាតិ ដើម្បីប្រារព្វទិវាសិទ្ធិលំនៅដ្ឋានពិភពលោកលើកទី២៨។ ក្នុងនោះក៏មានការចូលរួម​ពីព្រះសង្ឃប្រហែលជា៥០អង្គ និងមានប្រជាពលរដ្ឋមកពីសហគមន៍បុរីកីឡា បឹងកក់ ៣៤៧ ថ្មគោល ប្រមាណ​ជិត​មួយ​ពាន់នាក់ផងដែរ ក្នុងគោលបំណងដាក់ញ្ញតិទៅសាលារាជធានីភ្នំពេញ ដើម្បីដោះស្រាយបញ្ហាដីធ្លីដែលនៅជាប់គាំង។

ជារឿយៗ សំណូមពររបស់ពលរដ្ឋទៅអាជ្ញាធរ សុំឲ្យមាន​ដំណោះស្រាយពីបញ្ហារបស់ខ្លួន ត្រូវបានអ្នកតាមដាន​ព្រឹត្តិការណ៍​មើល​ឃើញថា ដូចជាមានភាពសោះអង្គើយ ឬមានភាព​យឺតយ៉ាវពីសំណាក់អាជ្ញាធរ ដើម្បីបានលទ្ធផលជូន​ពលរដ្ឋ​ទាំង​នោះ។ តែផ្ទុយទៅវិញ សង្គមស៊ីវិលមួយចំនួន ដែលធ្វើការតាមដានបញ្ហានេះ បានបរិហារថា មិនត្រឹមតែមិនរកដំណោះ​ស្រាយឲ្យ​ពលរដ្ឋ អាជ្ញាធរបែរជាបញ្ជូន​កងកម្លាំង​រាប់​សិបរយនាក់ មកធ្វើការរំខាននិងរារាំងការជួបជុំរបស់ពលរដ្ឋទាំងនោះ ក្រោម​លេស«សណ្ដាប់ធ្នាប់ និងមុខមាត់រាជធានី» រហូតដល់ការប៉ះទង្គិច បាន​កើតឡើងនោះផង។

លោក អំ សំអាត ប្រធានផ្នែកបច្ចេកទេសស៊ើបអង្កេត របស់អង្គការសិទ្ធិមនុស្សលីកាដូ បានធ្វើការថ្គោលទោស​ចំណាត់ការ​របស់អាជ្ញាធរថា ដែលបានធ្វើការរារាំង ទៅដល់សិទ្ធិសេរីភាពរបស់ប្រជាពលរដ្ឋ។ លោកបន្តរថា មុននឹងក្រោយ នៅតែ​ប្រជាពលរដ្ឋអាចជំនះមកបាន ហើយគាត់នៅតែចាំទទួលយញ្ញតិនោះ ហេតុអ្វីចាំបាច់ប្រើកម្លាំង ចាំបាច់រារាំង ដែលធ្វើឲ្យ​មជ្ឃដ្ឋានជាតិ និងងន្តរជាតិ មើលទៅឃើញថា កម្ពុជានៅមិនទាន់គោរពសិទ្ធិមនុស្សឲ្យបានេពេញលេញ។

អនុប្រធានស៊ើបអង្កេតសមាគមន៍ការពារសិទ្ធិមនុស្ស អាដហុក លោក ចាន់ សុវេត បានបញ្ជាក់ថា ការរារាំងនេះ បាន​បណ្តាលឲ្យមានការជ្រុលជ្រុសបន្តិចបន្តួចមែន តែទោះយ៉ាងណាខាងប្រជាពលរដ្ឋក៏មានការអត់ធ្មត់ និងខាងអាជ្ញាធរ​ក៏​មានការអត់ធ្មត់ផងដែរ។ លោកក៏បានរិះគន់ចំពោះការដាក់ពង្រាយ នូវកងកម្លាំងដ៏ច្រើន​សន្ធិកសន្ធាប់ដែលប្រដាប់​ដោយ​ដំបង និងខែល ក្នុងការតទល់ជាមួយប្រជាពលរដ្ឋក្រីក្រ ដៃទទេដែលមកត្រឹមតែសូមឲ្យមានការដោះស្រាយ នូវសិទ្ធិមាន​លំនៅដ្ឋានសមរម្យ។ លោកបានចាត់ទុកថា ការប៉ះទង្គិចគ្នានេះ ប្រជាពលរដ្ឋមិនបានប្រើនូវហិង្សានោះទេ តែជាសន្ទុះ​ផ្លូវ​ចិត្តរបស់ប្រជាពលរដ្ឋតែប៉ុណ្ណោះ។

លោកចាន់ សុវេត បានអះអាងថា អាជ្ញាធរក៏បានដឹងពីបញ្ហានេះដែរ ព្រោះប្រជាពលរដ្ឋភាគច្រើនគាត់បានដឹងពីសិទ្ធិ យល់​ដឹងពីអ្វីដែលពួកគាត់ត្រូវធ្វើ ម្យ៉ាងទៀតពួកគាត់ឈឺចាប់យូណាស់មកហើយ ពាក់ព័ន្ធនិងការទប់ស្គាត់ និងការបង្គ្រាប​ទាំង​នេះ។ «គាត់ឃើញកងកម្លាំងហើយ នៅតែព្យាយាមសម្រុកចូលទៅទៀត គាត់ដឹងថាអាជ្ញាធរនឹងមិនមាន​ប្រព្រឹត្តិនូវអំពើ​ណាមួយ ដែលធ្ងន់ធ្ងរប៉ះពាល់ដល់អាយុជីវិតនោះទេ»។

មានសេចក្ដីរាយការណ៍មកថា កងកម្លាំងអាជ្ញាធរដែលត្រូវបានបញ្ជូនមក ដើម្បីបញ្ជៀសក្រុមអ្នកជួបជុំ ពីការកកស្ទះ​ចរាចរណ៍ ដែលធ្វើឲ្យខូចសណ្ដាប់ធ្នាប់សាធារណៈ។ តែផ្ទុយទៅវិញ គឺកងកម្លាំងនេះទៅវិញទេ​ដែលមានចំនួនច្រើន​លើសលប់ ហើយដាក់ពង្រាយពេញទ្រូងផ្លូវ ដែលធ្វើឲ្យការកកស្ទះកើតឡើង ខណៈពេលដែលពលរដ្ឋគ្រាន់​តែអនុវត្ត​ពី​សិទ្ធិនៃការបញ្ចេញមតិរបស់ខ្លួនតែប៉ុណ្ណោះ៕

លោកឡៅ ម៉ុង ហៃ អ្នកវិភាគឯករាជ្យបានពន្យល់ថា ការដែលក្រុមអាជ្ញាធរដាក់កម្លាំងដ៏ច្រើនក្នុងការរារាំង ឬទប់ស្គាត់ ដើម្បីបង្គ្រាបការជួបជុំមួយដោយអហិង្សរបស់ប្រជាពលរដ្ឋនេះ ជាការបំពានច្បាប់មួយរួចជាស្រេចទៅហើយ។ «ការបិទ​ផ្លូវណាមួយក៏ដោយ ត្រូវតែជូនដំណឹងជាមុន ត្រូវមានបទបញ្ញតិគោចរ កុំបិទស្រេចតែចិត្តនឹងឃើញ ចិត្តចង់ ត្រូវបង្ហាញ​ពីមូលហេតុឲ្យបានច្បាស់លាស់ និងក៏ត្រូវមានរយៈពេលមួយច្បាស់ក្នុងការបើកផ្លូវដែរ កុំទុករហូតដល់ពលរដ្ឋមានកំហឹង ហើយចោទគេថាបំពានច្បាប់នោះ។»

លោក សៀរ ភារម្យ ប្រធានសម្ព័ន្ធក្រុមការងារសិទ្ធិលំនៅឋាន ដែលជាអ្នកដឹកនាំនៃក្រុមការងារទាមទារសិទ្ធិលំនៅដ្ឋាននេះ ក៏បានបង្ហាញនូវការហួសចិត្ត សោកស្តាយ ចំបោះទង្វើរនៃក្រុមសម្តថកិច្ចទាំងនោះ ក្នុងការទម្លាក់នូវកម្លាំងដ៏ច្រើន ដើម្បី​បង្ក្រាបប្រជាពលរដ្ឋដោយដៃទទេរ។ លោកបន្តរថា មានការវាយតប់ និងចាប់លោកសង្ឃផងដែរ។ «មិនមានអ្វីខុស​ច្បាប់​ទេ​ព្រោះការប្រារព្វទិវានេះ ជាទិវាសិទ្ធិលំនៅដ្ខានពិភពលោក ដែលគេត្រូវតែធ្វើទាំងអស់គ្នា។ (...) ដូចនៅប្រទេសថៃ ក៏មាន​ប្រជាពលរដ្ឋគេធ្វើ ដែលមានចំនួនជាងមួយពាន់នាក់ ហើយកម្លាំងសមត្ថកិច្ចរបស់គេ មិនមែនមកបង្គ្រាប​ប្រជា​ពលរដ្ឋ​នោះ​ទេ គេមកដើម្បីការពារ និងសម្រួលដល់ការជួបជុំនេះប្រកបដោយជោគជ័យ៕»

---------------------------------------------------------
ដោយៈ អ៊ុម វ៉ារី - ភ្នំពេញថ្ងៃទី១០ តុលា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ