ក្រោយការប៉ះទង្គិចគ្នារវាងក្រុមសន្តិសុខ និងក្រុមអ្នកតវ៉ា នៅព្រឹកថ្ងៃទី១៥ ខែមិថុនានេះ មនុស្សយ៉ាងតិច​២០​នាក់ បានរងរបួសធ្ងន់ និងស្រាល ក្នុងខណៈពេល ដែលក្រុមបេក្ខជនតំណាងរាស្រ្ត ជាប់ឆ្នោតរបស់គណបក្ស​សង្រ្គោះ​ជាតិ​ដឹកនាំការតវ៉ា ដើម្បីសង្រ្គោះទីលានប្រជាធិបតេយ្យ ពីការហ៊ំព័ទ្ធបន្លាលួស។

សន្ដិសុខបែកក្បាល កំពុងទទួលការលាបប្រេងកូឡា។ (រូបថត MONOROOM.Info/ C. Nita)

អំពើហិង្សា - ក្រុមសន្តិសុខការពារសណ្តាប់ និងមានជំនាញខាងបង្រ្កាបកុបកម្ម នៅព្រឹកថ្ងៃទី១៥ ខែមិថុនា ឆ្នាំ​២០១៤​នេះ បានប៉ះទង្គិចគ្នាម្តងទៀត ជាមួយក្រុមអ្នកតវ៉ារបស់គណបក្សសង្រ្គោះជាតិ ដែលបណ្តាលឱ្យមាន​មនុស្ស​រងរបួសជាច្រើននាក់។ ព្រឹត្តិការណ៍នៃការទង្គិចដោយហិង្សាដាក់គ្នានេះ កាន់តែតានតឹងឡើង បន្ទាប់ពីសមត្ថកិច្ច​ចម្រុះ បានបាញ់គ្រាប់បែកផ្សែង ដើម្បីបង្ក្រាបបាតុករ ដែលដឹកនាំដោយក្រុមបេក្ខជនតំណាងរាស្រ្ត ជាប់ឆ្នោត​របស់​គណបក្រសង្រ្គោះជាតិ នៅក្បែរស្ពាននាគ ដើម្បីទាមទារឱ្យដោះលែងទីលានប្រជាធិបតេយ្យមកវិញ។

ខណៈពេលដែលហេតុការណ៍ កំពុងតានតឹងនៅឡើយ ក្រុមបាតុករដែលមានការខឹងសម្បារ ជាមួយក្រុមសន្តិសុខ​ជាយូហើយនោះ បានសងសឹកទៅវិញ ដោយវាយបកទៅលើក្រុមសន្តិសុខវិញយ៉ាងចាស់ដៃ។ ក្រោយសង្រ្គាម​រវាង​ក្រុមអ្នកតវ៉ា និងសន្តិសុខ យ៉ាងហោចណាស់សន្តិសុខជាង២០នាក់នាក់រងរបួសធ្ងន់ និងស្រាល និងក្រុមបាតុករ​យ៉ាងតិច៤នាក់ត្រូវរងរបួស។

ប្រធានក្រុមស៊ើបអង្កេត នៃសមាគមការពារសិទ្ធិមនុស្សអាដហុក លោក នី ចរិយា បានលើកឡើងថា មូលហេតុដែល​បានបង្ក ឱ្យមានការការប៉ះទង្គិចហិង្សាដាក់គ្នានៅថ្ងៃនេះ គឺដោយការមិនបើកទីលានប្រជាធិបតេយ្យ។ លោកបាន​បន្តថា៖ «អាមិនបើកហ្នឹងហើយ ដែលបង្កឱ្យមានអំពើហិង្សា ហើយអំពើហិង្សាវាទទួលផលអញ្ចឹង ធ្វើឱ្យមនុស្ស​រង​គ្រោះអញ្ចឹង ហើយនៅពេលរងគ្រោះវាកើតជាកំហឹងបុគ្គល ហើយកំហឹងបុគ្គលវាធ្វើរំលោភសិទ្ធិមនុស្ស ដូច្នេះយើង​ត្រូវផ្តាច់កំហឹងបុគ្គល»។ លោកថ្លែងបន្ថែមថា ដើម្បីផ្តាច់កំហឹងបុគ្គល មានតែបើទីលានប្រជាធិបតេយ្យឡើងវិញ ឱ្យប្រជាពលរដ្ឋធ្វើការតវ៉ាដោយសន្តិវិធី។

លោក អំ សំអាត ប្រធានផ្នែកបច្ចេកទេសស៊ើបអង្កេត របស់អង្គការលីកាដូ បានថ្លែងយ៉ាងដូច្នេះដែរថា៖ «យើងមាន​ការសោកស្តាយណាស់ ចំពោះព្រឹត្តិការណ៍នៃការបង្រ្កាបនេះ ហើយនេះជាព្រឹត្តិការណ៍ដ៏ហិង្សាមួយទៀត បន្ទាប់ពី​ព្រឹត្តិការណ៍បង្រ្កាបជាបន្តបន្ទាប់នៅទីលានប្រជាធិបតេយ្យ»។ លោកអះអាងបន្តថា នេះបណ្តាលមកពីការ​បណ្តុះ​គំនិត ចងអាឃាតសងសឹកគ្នាទៅវិញទៅមក ដែលនៅមានពេលមានការជួបជុំមានការបង្រ្កាប។

ឆ្លើយតបនឹងសំនួរ ថាតើអ្នកណាខ្លះ ជាអ្នកទទួលខុសត្រូវចំពោះហេតុការណ៍ការនេះ? លោកអំ សំអាត បាន​ពន្យល់​ថា អ្នកដែលទទួលខុសត្រូវចំពោះបញ្ហានេះ គឺទាំងរដ្ឋាភិបាល និងអ្នកនយោបាយទាំងអស់ មិនអាចចោទប្រកាន់​ទៅ​ខាងណាមួយទេ ព្រោះបញ្ហានេះ គឺបណ្តាលមកពីភាពជាប់គាំងខាងនយោបាយ ទើបបង្កឱ្យមានរឿងរ៉ាវរហូតដល់​ពេលនេះ៕