បេក្ខជនតំណាងរាស្ត្រជាប់ឆ្នោត របស់គណបក្សសង្គ្រោះជាតិ យ៉ាងហោចបីរូប ត្រូវបានចាប់ខ្លួន ក្រោយពីមានជួប​ប្រតាយ​ប្រតប់គ្នា រវាងក្រុមបាតុករដែលដឹកនាំដោយលោកស្រី មួរ សុខហួរ និងកងកំលាំងអាជ្ញាធរ កាលពីព្រឹក​ម៉ិញ​នេះ។ រហូតមកដល់ពេលនេះ បេក្ខជនតំណាងរាស្ត្រជាប់ឆ្នោត ពីររូបទៀត ក៏ត្រូវបាននគរបាលធ្វើការឃាត់ខ្លួនដែរ បន្ទាប់ពីពួកគេបានចូលទៅបំភ្លឺ នៅស្នងការនគរបាលរាជធានី។

លោកស្រី មូរ សុខហួរ និងបេក្ខជនតំណាងរាស្ត្រជាប់ឆ្នោត របស់គណបក្សសង្គ្រោះជាតិពីររូបទៀត នៅមុខទីលាន ប្រជាធិបតេយ្យ ព្រឹកថ្ងៃទី១៥ ខែមិថុនា ឆ្នាំ២០១៤។ (រូបថត MONOROOM.info/ C. Nita)

ហិង្សា - បេក្ខជនតំណាងរាស្ត្រជាប់ឆ្នោត របស់គណបក្សសង្គ្រោះជាតិ ដែលត្រូវបានសមត្ថកិច្ចចាប់ខ្លួន ​ក្រោយពេល​មាន​ការ​វាយប្រតប់គ្នារវាងក្រុមបាតុករ និងកងកំលាំងប្រដាប់អាវុធក្នុងនោះ រួមមាន លោកស្រី មួរ សុខហួរ បេក្ខជន​តំណាង​រាស្រ្តជាប់ឆ្នោតខេត្ត បាត់ដំបង លោក ម៉ែន សុថាវរិន្ទ្រ បេក្ខជនតំណាងរាស្រ្តជាប់ឆ្នោតខេត្ត កំពង់ធំ និង​លោក លោក កែវ ភារម្យ បេក្ខជនតំណាងរាស្រ្តជាប់ឆ្នោតខេត្ត ក្រចេះ។

ការចាប់ខ្លួនក្រុមបេក្ខជន តំណាងរាស្ត្រជាប់ឆ្នោតទាំងនេះ ត្រូវបានធ្វើឡើងកាលពីព្រឹកម៉ិញ នៅក្នុងបាតុកម្មមួយ របស់គណៈបក្សសង្រោះជាតិ  ដែលចង់ទាមទារឲ្យមានការដករនាំងដែក ចេញ​ពីទីលានប្រជាធិបតេយ្យ ដែល​បានបាំងមិនឲ្យបាតុករចូលទៅធ្វើបាតុកម្ម ឫប្រមូលផ្តុំគ្នាអស់រយៈពេលជាច្រើន​ខែ​កន្លង​មកហើយ។ ប៉ុន្តែបាតុកម្ម​នោះ បានប្រែក្លាយជាការប្រឈមមុខ រហូតឈានទៅដល់ការវាយតប់ដ៏ខ្លាំងក្លា។

ខុសប្លែកពីការធ្វើបាតុកម្មលើកមុនៗ ដែលក្រុមបាតុករតែងតែ​រងរបួស ប៉ុន្តែបាតុកម្មតវ៉ាកាលពីព្រឹកម៉ិញនេះ បែរជា​ក្រុមសន្ដិសុខ ដែលកន្លងមកជាអ្នកវាយទៅលើបាតុករនោះ រងនូវការវាយតប់ពីសំណាក់បាតុករវិញ បណ្ដាល​ឲ្យ​របួសយ៉ាងហោច២០នាក់។

មន្ត្រីឃ្លាំមើលសិទ្ធិមនុស្ស មកពីសមគមការពារសិទ្ធិមនុស្ស អាដហុក លោក អំ សំអាត បានថ្លែងថា ស្ថានភាព​បាតុកម្ម​កាលពី​ព្រឹកនេះ មានលក្ខណៈតឹងតែងយ៉ាងខ្លាំង ដែលពិបាកនឹងគ្រប់គ្រងបាន។  លោកបាននិយាយថា៖ «ទាំង​សន្តិសុខក្តី ទាំង​ក្រុមអ្នកដែលមកតវ៉ានេះក្តី គឺស្ថិតក្នុងស្ថានភាពមួយ បែបញុះដែលមិនអាចគ្រប់គ្រងបាន​»។

បន្ទាប់មកទៀត លោក ហូរ វ៉ាន់ និងលោក រៀល ខេមរិន្ទ្រ តំណាងរាស្រ្តជាប់ឆ្នោតមណ្ឌលភ្នំពេញ របស់គណបក្ស សង្គ្រោះជាតិដដែល ក៏បានចូលទៅបំភ្លឺពីករណីហឹង្សានេះ នៅស្នងការនគរបាលរាជធានីភ្នំពេញ ប៉ុន្តែមកទល់នឹង​ម៉ោងបួនរសៀលនេះ អ្នកទាំងពីរត្រូវបានឃាត់ខ្លួននៅទីនោះនៅឡើយ។ គេនៅមិនទាន់ដឹងថា តើក្រុមអ្នកតំណាង​រាស្រ្ត​​ទាំងប្រាំ​រូបនេះ អាចនឹងត្រូវក្រុមអាជ្ញាធរបញ្ជូនខ្លួន ទៅតុលាការដើម្បីធ្វើការចោទប្រកាន់ ឬយ៉ាងណានោះទេ។

លោក កឹម សុខា ប្រធានស្តីទីនៃគណៈបក្សសង្រោះជាតិ និងសមាជិកព្រឹទ្ធសភាមួយចំនួន មកពីគណបក្ស សម រង្ស៊ី បានស្នើ​សុំឲ្យមានចរចា​ជាមួយនឹងអាជ្ញាធរ និងចូលទៅជួបអ្នកត្រូវជាប់ឃុំខ្លួន នៅស្នងការ​នគរ​បាល​រាជធានីភ្នំពេញ តែ​ត្រូវ​បានបដិសេធ។ មន្រ្តីស្នងការនគរបាលរាជធានីមួយរូប មិនបញ្ចេញ​ឈ្មោះ​បាន​បញ្ជាក់ថា បើមន្ត្រី​គណបក្ស​ប្រឆាំងណា ចចេសរឹងរូសចង់ចូលក្នុងស្នងការនគរបាល ដោយគ្មានការ​អនុញ្ញាត នោះតាមបញ្ជា​«ថ្នាក់»​លើ​ ឲ្យ​ធ្វើ​ការចាប់ខ្លួនជាបន្ទាន់។

គួរបញ្ជាក់ដែរថា ដងវិថីនៅមុខស្នងការនគរបាលរាជធានីភ្នំពេញ ត្រូវបានបិទទាំងស្រុង នាវេលាម៉ោងជាង៣ រសៀល​ ​ថ្ងៃ​ទី១៥ ខែកក្កដានេះ ដោយអាជ្ញាធរបានពង្រាយកងកម្លាំងចម្រុះ ប្រមាណជាង២០០០នាក់ នៅជុំវិញ​តំបន់​នោះ៕