ភ្នំពេញ៖ ក្រុមប្រឹក្សាធម្មនុញ្ញបានបើកសវនាការលើកទីបួន និងក៏ជាលើកចុងក្រោយ សម្រាប់ពាក្យបណ្តឹង​នៅខេត្ត​កណ្តាល។ ដោយសង្កេតឃើញថា ការរៀបចំសវនាការ មានលក្ខណៈតឹងតែង រឹតត្បិត បន្ទប់តូចចង្អៀតធ្វើឲ្យតែបាន និង​មិនមានការផ្សាយជាសាធារណៈ លោក អេង ឆៃអៀង តំណាងឲ្យគណបក្សសង្គ្រោះជាតិ និងជាដើមបណ្តឹងដែរនោះ បានដើរចេញពីបន្ទប់សវនាការ ដោយបានចាត់ទុកថាសវនាការនេះ បែបនយោបាយ លោកក៏បានចាត់ទុកថា​សេចក្តី​សម្រេចចុងក្រោយនេះ ក៏ជា«សេចក្តីសម្រេចបែបបយោបាយដែរ»។

សមាជិកទាំង៩រូប របស់ក្រុមប្រឹក្សាធម្មនុញ្ញ នៅក្នុងសវនាការរបស់ខ្លួន។ (រូបថត MONOROOM.info/ O. Vary)

បន្ទាប់ពីមានការប្រកាសដោយក្រុមប្រឹក្សាធម្មនុញ្ញ បើកសវនាការជាសាធារណៈ​ លើបណ្តឹងរបស់គណបក្សសង្គ្រោះជាតិ រួមមានខេត្តក្រចេះ ខេត្តបាត់ដំបង ខេត្តសៀមរាប ក៏ត្រូវបានក្រុមប្រឹក្សាធម្មនុញ្ញ សម្រេចតម្កល់សេចក្តីសម្រេចរបស់ គ.ជ.ប ទុកជាបានការ ដោយពុំបានសង្ហាញនូវភស្តុតាងថ្មី ដែលក្រុមប្រឹក្សាធម្មនុញ្ញខ្លួនឯងបានទទួល និងស៊ើបអង្កេត​នោះទេ តែផ្ទុយទៅវិញស្ថាប័នដ៏កំពូលនេះ បានទទួលយកការបកស្រាយរបស់តំណាងគ.ជ.ប និងការច្រានចោល​នូវ​ទឡ្ហីករណ៍នានារបស់គណបក្សសង្គ្រោះជាតិ។

ការដើរចេញពីសវនាការនេះ លោក អេង ឆៃអៀង បានលើកឡើងថា សវនាការនេះនឹងមិនអាចផ្តល់យុត្តិធម៌ សម្រាប់​លោក ហើយលោកក៏គ្មានជំនឿលើការសម្រេចសេចក្តី របស់ស្ថាប័នកំពូលមួយនេះដែរ។ លោកបានបញ្ជាក់ថា «យើងក៏​ដឹងពីលទ្ធផលមុនដែរ ដូច្នេះមិនចាំបាច់នៅនាំខាតពេលវេលា ខាតប្រយោជន៍»។

ឆ្លងកាត់តាមរយៈកាផ្ទៀងផ្ទាត់កញ្ចប់សុវត្ថិភាព«ក»នៅ គ.ជ.ប រាល់បញ្ហាទាំងអស់ ត្រូវបានក្រុមប្រឹក្សាធម្មនុញ្ញ បញ្ជា​ឲ្យ​កត់ចូលក្នុងកំណត់ហេតុ ដើម្បីជជែកគ្នាក្នុងសវនាការ ជាសាធារណៈនៅក្រុមប្រឹក្សាធម្មនុញ្ញ។ ទោះយ៉ាងនេះក្តី តំណាង​រូបនេះបានចាត់ទុកថា ការជជែកគ្នានេះ«មិនមានន័យ» ដោយលោកបានសម្អាងហេតុថា បើការជជែកគ្នានេះមាន​ការ​ផ្សាយតាមវិទ្យុ និងទូរទស្សន៍ជាតិនោះ លោកនឹងនៅធ្វើការជជែកគ្នា។ លោកក៏បានបង្ហាញនូវការសោកស្តាយ ចំពោះ​នីតិវិធីរបស់ស្ថាប័នកំពូលច្បាប់មួយនេះ រួមទាំងបន្ទប់សវនាមួយដ៏តូចចង្អៀត។

លោកបានពន្យល់ថា «បើក្នុងសវនាការនេះ យើងអាចទទួលបានផលជាវិជ្ជមានណាមួយ សមរម្យដែលអាចទទួល​យកបាន ប៉ុន្តែយើងដឹងថាក្រុមប្រឹក្សាធម្មនុញ្ញ បើកសវនាកាបីខេត្តនោះ នៅតែតម្កល់ទុកសេចក្តីសម្រេចរបស់គ.ជ.ប ជាបានការដដែលនោះ។ តើយើងនឹងនៅបានប្រយោជន៍អ្វី នាំតែខាតពេល។»

លោកបានបន្តរថា ខាងគណបក្សសង្ក្រោះជាតិ បានក៏បានដឹងនូវលទ្ធផលជាមុនដែរ តែទោះជាយ៉ាងណា ត្រូវតែធ្វើ​តាម​នីតិវិធីនោះតែ ដូចជាការដាក់ពាក្យបណ្តឹងជាដើម ដើម្បីកុំឲ្យមានការចោទនានា និងក៏ដើម្បីបង្ហាញឲ្យមតិជាតិ និង​អន្តរជាតិបានដឹង បានឮពីដំណើរការក្តីនៃស្ថាបន័កំពូល ដែលលោកចាត់ទុកថាជាសេចក្តីសម្រេច «នយោបាយ» មិនមែន​ជាសេចក្តីសម្តេចផ្តល់យុត្តិធម៌ ដល់ម្ចាស់បណ្តឹងនោះទេ។

«មានតែមហាបាតុកម្មដោយអហឹង្សាស្អែក ...»

ទាក់ទិននឹងការដើចេញដោយក្តីអស់ជំនឿនេះ លោក អេង ឆៃអៀង បានបញ្ជាក់ថា គ្មានផ្លូវណាមួយដែលមានសង្ឃឹមថា និងមានយុត្តិធម៌នោះទេ តែលោកបានបន្ថែមថា មានតែមហាបាតុកម្មដោយអហឹង្សាស្អែក (ថ្ងៃទី៧ ខែកញ្ញា) នេះទេ ដែល​ជាការសម្តែងនូវឆន្ទៈ ជាការរវ៉ា ជាការបង្ហាញនូវការអស់ជំនឿទុកចិត្ត ចំពោះស្ថាប័នយុត្តិធម៌ខ្មែរ ហើយក៏ដើម្បីបង្ហាញ​នូវ​ការទាមទា ឲ្យមានការបង្កើតនូវគណកម្មាធិការចម្រុះឯករាជ្យមួយ។

ទស្សនាវដ្តីមនោរម្យព័ងអាងហ្វូមិនអាចសុំប្រតិមកម្ម ពីលោក ព្រហ្ម ញាណវិចិត្រ អ្នកនាំពាក្យក្រុមប្រឹក្សាធម្មនុញ្ញ ចំពោះ​ការដើរចេញរបស់លោក អេង ឆៃអៀង ពីសវនាការនេះបានទេ ដោយលោកមិនទទួលទូរស័ព្ទ តែកន្លងមក លោកក៏មិន​ដែលផ្តល់បទសម្ភាស ឲ្យអ្នកសារព័ត៌មានតាមទូរស័ព្ទនោះដែរ។

សម្រាប់លោក ទេព នីថា អគ្គលេខាធិការ គ.ជ.ប បានបញ្ជាក់ក្នុងសន្និសិទការសែត កាលពីព្រលប់ថ្ងៃទី៥ ខែកញ្ញានេះថា រាល់ការសម្រេចសេចក្តីរបស់ក្រុមប្រឹក្សាធម្មនុញ្ញ ឈរលើគោលការណ៍ច្បាប់ដែលមានជាធរមាន និងជាស្ថាប័ន​ច្បាប់​កំពូលបិទផ្លូវតវ៉ា។ ឯការទាមទាឲ្យមានការបង្កើត គណកម្មការចម្រុះឯករាជ្យនោះ អគ្គលេខាធិការ គ.ជ.ប រូបនេះបង្ហាញ​ថា នឹងមិនអាចទៅរួចបាននោះទេ ដែលយន្តការនៃការសើបអង្កេតនេះស្ថិតក្រោមឆត្រ័ អង្គការសហប្រជាជាតិ ឬ អង្គការ​ក្រៅ​រដ្ឋាភិបាល ដែលជាយន្តការថ្មីជម្រុញឲ្យកម្ពុជា ដើរចេញពីគន្លងនីតិរដ្ឋ៕

-------------------------------------------------
ដោយៈ អ៊ុម វ៉ារី - ភ្នំពេញថ្ងៃទី០៦ កញ្ញា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ