«គណបក្សសង្គ្រោះជាតិ នឹងប្រារព្ធពិធីអបអរសាទរ នៃការបង្កើតគណបក្សលើកទី៤  ដែលនឹងប្រព្រឹត្តិទៅ នៅ​ថ្ងៃទី១៨ ខែកក្កដា ឆ្នាំ២០១៦ វេលាម៉ោង៨ព្រឹក នៅទីស្នាក់ការកណ្ដាល» នេះជាអ្វី ដែលគេអាចអានបាន នៅ​ក្នុង​សេចក្ដី​ប្រកាសព័ត៌មានមួយ របស់គណបក្សសង្គ្រោះជាតិ ដែលទើបនឹងចេញផ្សាយ ក្នុងពេលមុននេះ និង​ដែល​ទស្សនាវដ្ដី​មនោរម្យ.អាំងហ្វូ ទទួលបានមួយច្បាប់។

ពិធីអបអរសាទរខួប នៃការបង្កើតគណបក្សនេះ នឹងមានការចូលរួម ពីសំណាក់សមាជិក សមាជិក ក្រុមប្រឹក្សា​ឃុំ-សង្កាត់ ក្រុង-ស្រុក-ខណ្ឌ និងរាជធានី-ខេត្ត ព្រមទាំងថ្នាក់ដឹកនាំគណបក្ស គ្រប់លំដាប់ថ្នាក់។ ក្រុមមន្ត្រី​ជិត​ឆ្ងាយ​ទាំង​នេះ របស់គណបក្សប្រឆាំង នឹង​មក​ជួបជុំ​គ្នា នៅទីស្នាក់ការកណ្ដាលគណបក្ស ក្នុងសង្កាត់​ចាក់​អង្រែ​លើ ខណ្ឌ​មានជ័យ រាជធានីភ្នំពេញ។

ជាការរំលឹកឡើងវិញ គណបក្សសង្គ្រោះជាតិ​​ត្រូវបាន​បង្កើតឡើងជាផ្លូវការ នៅថ្ងៃទី១៧ ខែកក្កដា ឆ្នាំ២០១២ នារដ្ឋធានីម៉ានីល ប្រទេសហ្វីលីពីន ក្រោមការច្របាច់បញ្ចូលគ្នា រវាងគណបក្សសម រង្ស៊ី ដែលដឹកនាំដោយ​លោក កឹម សុខា និងគណបក្សសិទ្ធិមនុស្ស ដែលដឹកនាំដោយលោក កឹម សុខា។ បើដូច្នោះ ហេតុអ្វីក៏​គណបក្ស​នេះ រៀបចំ​ធ្វើបុណ្យខួបនៅថ្ងៃទី១៨ ខែកក្កដា ក្រោយថ្ងៃខួបមួយថ្ងៃទៅវិញ?

នេះជាចម្លើយ ដែលសេចក្ដីប្រកាសព័ត៌មាននោះ បានបញ្ជាក់ដោយខ្លួនឯង៖ ដោយសារតែថ្ងៃទី១៧ ខែ​កក្កដា ជាថ្ងៃ​ដង្ហែ​សព​លោក កែម ឡី ដែលត្រូវយកទៅបញ្ចុះ នៅភូមិអង្គតាកុប ឃុំលាយបូរ ស្រុកត្រាំកក់ ខត្តតាកែវ ហើយ​ថ្នាក់​ដឹកនាំ​គណបក្ស គ្រប់លំដាប់ថ្នាក់ នឹងចូលរួមក្នុងពិធីដង្ហែនេះ៕