គ្រូបង្វឹកក្រុមបីសាចក្រហម ម៉ែនឆេស្ទើ យូណៃធីត (Manchester United) លោកដេវីដ ម៉យ (David Moyes) បាននិយាយ​ថា វ៉ែន រ៉ូនី (Wayne Rooney) អាចនឹងចូលលេងក្នុងការប្រកួតព្រីមែលីក (Premier League) ខណៈដែលម៉ែនញូ នឹងប៉ះ​ក្រុម​ឆែលស៊ី (Chelsea) នៅថ្ងៃច័ន្ទ បើទោះបីជា ក្លិបតោខៀវ កំពុងតែចង់ទិញខ្សែប្រយុទ្ធអន្តរជាតិអង់គ្លេសរូបនេះក៏ដោយ។

កីឡាករ វែន រ៉ូនី អង្គុយនៅរោងកីឡាករបម្រុង។ (រូបថត Michael Steele/Getty Images)

រ៉ូនី វ័យ២៧ឆ្នាំ បានចូលលេងបានកន្លះម៉ោង ក្នុងការប្រកួតបើកឆាករដូវកាលឈ្នះក្រុមស្វានស៊ី (Swansea) ៤-១ កាលពី​​ចុងសប្តាហ៏មុន បន្ទាប់ពីវិលត្រឡប់ពីរបួសស្មាររួចមក។

ប៉ុន្តែគាត់ជាគោលដៅមួយសម្រាប់ក្រុមឆែលស៊ី ខណៈដែលក្លិបដែលមានមូលដ្ឋាននៅក្នុងទីក្រុងឡុងដ៏ បានដេញថ្លៃចំនួន​២លើករួចមកហើយ ហើយពួកគេនឹងដេញថ្លៃលើកទី៣បន្តទៀត បន្ទាប់ពីការប្រកួតជំនួបគ្នា (ម៉ែនញូប៉ះឆែលស៊ី) នៅថ្ងៃ​ច័ន្ទ។

លោកដេវីដ ម៉យ បាននិយាយថា៖ «វ៉ែន រ៉ូនី បានជាសាសស្បើយពីរបួសអស់ហើយ ហើយគាត់មានឱកាសល្អ ក្នុងការ​ចាប់់​ផ្តើមចូលលេងបាន។»

រ៉ូនី ដែលធ្លាប់លេងក្រោមការដឹកនាំរបស់លោកដេវីដ ម៉យនៅក្រុមអេវើតុន (Everton) កំពុងតែចង់ចាកចេញពីកីឡាដ្ឋាន អូលត្រាហ្វដ (Old Trafford) ប៉ុន្តែគ្រូបង្វឹកសញ្ជាតិស្កុតឡែន បាននិយាយថា ខ្សែប្រយុទ្ធរូបនេះ មិនមែនសម្រាប់​លក់​នោះ​ទេ។

អតីតគ្រូបង្វឹកក្រុមអេវើតុន ក៏បាននិយាយដែរ កាលពីថ្ងៃសុក្រកន្លងទៅ ដោយគាត់និយាយថា គាត់ត្រូវការទិញ​កីឡាករ​ថ្មី​បន្ថែមទៀត ប៉ុន្តែមិនមានសម្ពាធក្នុងទីផ្សារដោះដូរកីឡាករ ដែលនឹងជិតបិទ នៅថ្ងៃទី០២ ខែកញ្ញានេះទេ។

លោកម៉យ មិនទាន់បានទិញចូលកីឡាករណាមួយសំខាន់នៅឡើយទេ បន្ទាប់ពីបរាជ័យក្នុងការដេញថ្លៃ​សម្រាប់កីឡាករ​បាសេឡូណា (Barcelona) ទីយ៉ាហ្គូ អាល់ខាន់តារ៉ា (Thiago Alcantara) និងកីឡាករសែស ហ្វាប្រេហ្គាស (Cesc Fabregas) ខណៈដែលកីឡាករ ឡៃតុន បែន (Leighton Baines) និងកីឡាករម៉ារ៉ូណេ ហ្វេឡៃនី (Marouane Fellaini) ក៏ត្រូវបាន​ក្រុម​អេវើតុន ធ្វើការបដិសេធ មិនព្រមលក់ថែមទៀត៕

----------------------------------------------------
ដោយ៖ វិន ជីវ័ន្ត - ភ្នំពេញ ថ្ងៃទី២៤ ខែសីហា ឆ្នាំ២០១៣
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ