ក្រុមកាំភ្លើងធំអាសិណល (Arsenal) បានឈ្នះក្នុងការប្រជែងយកដំណែងលេខ៤ ក្នុងក្របខ័ណ្ឌព្រីមែលីក (Premier League) បន្ទាប់ពីបានយកឈ្នះ ១-០ លើក្រុមញូកាស្សល (Newcastle)។ ចំណែកឯការបញ្ចប់អាជីពរបស់លោក អាឡិច ហ្វឺកឺសិន (Alex Ferguson) មានសភាពក្រៀមក្រំបន្តិចបន្ទាប់ពីក្រុមម៉ែនឆេស្ទើយូណៃ ធីត (Manchester United) ប្រកួត​ចុងក្រោយបានត្រឹមស្មើ ៥-៥ ជាមួយក្រុមវែសប្រូមវិច អាល់បៀន (West Bromwich) កាលពីយប់មិញ។

ក្រុមអាសិណល សប្បាយដោយបានឈ្នះក្រុមញូកាស្សល។

ក្រុមរបស់លោកអាសិង វ៉ិងកឺ (Arsene Wenger) ត្រូវការឈ្នះ៣ពិន្ទុ ដើម្បីមានសិទ្ធទៅលេងក្នុងក្រមខ័ណ្ឌឆែមពានលីក (Champions League) និងដើម្បីឈ្នះក្រុមទទិនហេម (Tottenham) ដែលមានគម្លាតពីគ្នាត្រឹមតែ១ពិន្ទុនោះ។ ហើយគ្រាប់​បាល់របស់ខ្សែការពារ ឡរ៉ិន ឃូស្ស៊ែនី (Laurent Koscielny) នៅវគ្គទី២ ក៏បានជួយឲ្យពួកគេបានសម្រេចដូចបំណង។

គ្រាប់បាល់បញ្ចូលទីរបស់ឃូស្ស៊ែនី មានន័យថាក្រុមទទិនហេម បានត្រឹមតែដំណែងទៅលេងក្នុងក្របខ័ណ្ឌអ៊ឺរ៉ូផាលីក (Europa League) តែប៉ុណ្ណោះ ព្រោះបញ្ចប់ត្រឹមចំណាត់ថ្នាក់លេខ៥ បើទោះជាឈ្នះ ១-០ លើក្រុមសាន់ដឺឡែន (Sunderland) ក៏ដោយ។

លោកវ៉ិងកឺ (គ្រូបង្វឹកក្រុមអាសិណល) បាននិយាយថា «កីឡាកររបស់យើងទាំងអស់ ពិតជាពិសេសខ្លាំងណាស់ ព្រោះ​ពួកគេធ្វើបានយ៉ាងល្អ និងធ្វើតាមអ្វីដែលខ្ញុំបានប្រាប់។»

លោក អេនដ្រេ វីឡាសបូអាស (Andre Villas-Boas) គ្រូបង្វឹកក្រុមទទិនហេម បាននិយាយថា «វាពិតជាពិបាក​ទទួល​យក​ណាស់។ នៅទីបញ្ចប់យើងបានធ្វើអ្វី ដែលយើងគួរធ្វើអស់ហើយ ប៉ុន្តែអាសិណល ក៏ធ្វើបានល្អដូចគ្នា។ យើងពិតជាសោក​ស្តាយ។»

ចំណែកលោកហ្វឺកឺសិន ដែលនឹងត្រូវបញ្ចប់អាជីព ក្នុងការប្រកួតលើកទី១៥០០លើក របស់គាត់នោះ គិតថាម្ចាស់ជើងឯក​ព្រីមែលីក ម៉ែនឆេស្ទើ យូណៃធីត អាចទទួលបានជ័យជំនះទៅហើយបន្ទាប់ពីក្រុមរបស់លោកបាននាំមុខ ៥-២ នៅចុង​វគ្គ​ទី២ ទៅលើក្រុមវែសប្រូម។

ប៉ុន្តែក្រុមវែសប្រូម អាចរកគ្រាប់បាល់បញ្ចូលទីវិញបាន៣គ្រាប់ ត្រឹមតែ៩នាទីប៉ុណ្ណោះ ដែលធ្វើឲ្យលោកហ្វឺកឺសិន ស្ទើរតែ​មិនជឿនឹងភ្នែក និងធ្វើអ្នកគាំទ្រក្រុមបីសាចក្រហម ដែលធ្លាប់តែលោតហ៊ោរកញ្ច្រាវនោះ ត្រូវបាត់មាត់បាត់កឈឹង ខណៈ​នោះដែរ។

កីឡាករខ្សែការពារកណ្តាលក្រុមបីសាចក្រហម រីយ៉ូ ហ្វឺឌីណាន់ (Rio Ferdinand) បាននិយាយបន្ទាប់ពីការប្រកួតចប់ថា «៥-៥ ជាការប្រកួតមួយដែលល្អមើល ព្រោះលោកគ្រូ (ហ្វឺកឺសិន) មិនចាកចេញទៅ ជាមួយនឹងការប្រកួតគួរឲ្យធុញទ្រាន់ (០-០) នោះទេ។»

គួរបញ្ជាក់ថា នៅការប្រកួតចប់លោកហ្វឺកឺសិន ក៏បានលើកដៃគោរព និងជម្រាបលារដល់អ្នកគាំទ្រក្រុមម៉ែនឆេស្ទើ យូណៃធីតទាំងអស់ ដែលជាថ្ងៃចុងក្រោយរបស់គាត់។ ហើយគាត់ក៏បានបដិសេដជាមួយនឹងក្រុមអ្នកកាសែត ដែលចង់​ធ្វើបទសម្ភាសន៏គាត់ដែរ ព្រោះគាត់ចង់ចាកចេញទៅ ដោយសេចក្តីស្ងប់ស្ងាត់ ទាំងអារម្មណ៏ក្តុកក្តួល៕

----------------------------------------------------
ដោយ៖ វិន ជីវ័ន្ត - ភ្នំពេញ ថ្ងៃទី២០ ខែឧសភា ឆ្នាំ២០១៣
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ