ភ្នំពេញ៖ លោក វ៉ាង យី រដ្ឋមន្ត្រីក្រសួងការបរទេស នៃសាធារណរដ្ឋប្រជាមានិតចិន ក្នុងដំណើរទស្សនកិច្ចជាផ្លូវការ​នៅ​កម្ពុជា ក្នុងរយៈពេលបីថ្ងៃនេះ លោកមានគម្រោងជួបថ្នាក់ដឹកនាំសំខាន់ៗរបស់កម្ពុជា ដូចជា លោកនាយករដ្ឋមន្រ្តី ហ៊ុន សែន, រដ្ឋមន្រ្តីការបរទេស លោក ហោ ណាំហុង។ ដំណើរទស្សនកិច្ចនេះ លោកបានជួបជាមួយថ្នាក់ដឹកនាំ​គណបក្ស​ហ៊្វុនស៊ិនប៉ិចផងដែរ ដោយឡែក លោកពុំបានបញ្ជាក់ពីជំនួប ជាមួយនឹងគណបក្សប្រឆាំងនោះទេ ។

លោក ហា ណាំហុង (ខាងឆ្វេង) និងលោក វ៉ាង យី ចាប់ដៃគ្នា នៅសណ្ឋាគារអាំងទែកុងទីណង់តាល់។ (រូបថត MONOROOM.info/ O. Vary)

ក្នុងសន្វិសិទ្ធិកាសែតនៅសណ្ឋាគារនៅសណ្ឋាគារ អាំងទែកុងទីណង់តាល់ ក្រោយពីមានជំនួបជាមួយលោក​នាយក​រដ្ឋមន្រ្តី ហ៊ុន សែន នៅឯវិមានរដ្ឋសភា លោក វ៉ាង យី (Wang Yi) នឹងបន្តរ ជួបពិភាក្សាការងារជាមួយលោក ហោ ណាំហុង រដ្ឋមន្រ្តី​ក្រសួងការបរទេសកម្ពុជា ក្នុងគោលបំណងដើម្បីពង្រឹងទំនាក់ទំនង ជាមួយគ្នា បន្ថែមទៀត និងក៏ដើម្បីអបអរសាទរ​ខួប​ឆ្នាំទី៥៥ មិត្តភាពកម្ពុជា-ចិន។

លោក វ៉ាង យី បានមកដល់កម្ពុជា នាយប់ថ្ងៃទី២០ ខែសីហា ស្របពេលដែលស្ថានការណ៍នយោបាយនៅកម្ពុជា មាន​ភាពតានតឹង មិនទាន់ទាំងដោះស្រាយបាននៅឡើយ នោះព្រោះតែមានការពង្រាយនូវរថពាសដែក រថក្រោះ ក្នុងគោល​បំណងទប់ទល់ ចំពោះការគំរាមធ្វើមហាបាតុកម្ម ដោយប្រជាពលរដ្ឋ ក្រោមការនាំមុខដោយគណបក្សសង្រ្គោះជាតិ។ មុននឹងបញ្ចប់ទស្សនកិច្ចនៅកម្ពុជា នាថ្ងៃទី២១ ខែសីហា ខាងមុខនេះ ចំពោះការបោះឆ្នោតនៅកម្ពុជាលោក វ៉ាង យី បាន​គាំទ្រ និងសាទរនូវលទ្ធល ការបោះឆ្នោត ដែលគណបក្សប្រជាជនកម្ពុជា បានឈ្នះកៅអីភាគច្រើននៅក្នុងរដ្ឋសភា។ លោកក៏សុំឲ្យកម្ពុជា ដោះស្រាយបញ្ហាបោះឆ្នោតនេះ ដោយសន្តិវិធី តាមរយៈកិច្ចជំនួនប្រជុំពិភាក្សា ជជែក និងចរចាគ្នា រកច្រកចេញពីវិបត្តិក្រោយការបោះឆ្នោត។

លោក វ៉ាង យី បានបញ្ជាក់ថាការដឹកនាំគណៈប្រតិភូចិន មកបំពេញទស្សនកិច្ច នៅប្រទេសកម្ពុជានេះ ក្នុងគោលបំណង ពង្រឹងភាពជាដៃគូយុទ្ធសាស្ត្រគ្រប់ជ្រុងជ្រោយ នៃប្រទេសទាំងពីរ។ ជាមួយគ្នានេះ ក៏ក្នុងគោលបំនងមួយ បញ្ជាក់ថាចិន​យកចិត្តទុកដាក់ ចំពោះទំនាក់ទំនងជាមួយប្រទេសកម្ពុជា ដោយគាំទ្រ ព្រមទាំងខិតខំរក្សា និងការពារអោយ​បាននូវ​ចំណងមិត្តភាព នៃប្រទេសទាំងពីរ។ លោកបានថ្លែងទៀតថា «ជាមិត្តភ័ក្រល្អ ជាប្រទេសជិតខាងល្អ ក្រោមការដឹកនាំ​របស់​របស់ប្រមុខនៃប្រទេសទាំងពីរ។(…) បង្កើតនិងពង្រឹងនូវ ការទុកចិត្ត និងការគាំទ្រគ្នាទៅវិញទៅមក ក្នុងកិច្ច​អភិវឌ្ឍន៍។»

សូមបញ្ជាក់ថាជំនួបអាហារថ្ងៃត្រង់នៅសណ្ឋាគារ អាំងទែកុងទីណង់តាល់ រវាង លោក វ៉ាង យី រដ្ឋមន្ត្រីក្រសួងការ​បរទេស​ចិន ជាមួយនឹងលោក ហោ ណាំហុង រដ្ឋមន្ត្រីការបរទេសកម្ពុជា នឹងចេញសេចក្តីថ្លែងការណ៍រួមមួយ ក្រោយពីជជែកពិស្តារ អំពីកិច្ចសហប្រតិបត្តិការស៊ីជម្រៅរវាងប្រទេសកម្ពុជា និងចិននោះ។

សូមរម្លឹកថា កាលពីថ្ងៃទី១៩ ខែសីហានេះ ប្រទេសចិនបានចុះហត្ថលេខា ប្រគល់ម៉ាស៊ីនស្គែនកុងតឺន័រប្រភេទ MT1213LT បួនគ្រឿងដល់មកកម្ពុជា ដែលជាហិរញ្ញប្បទានឥតសំណង ក្នុងក្របខណ្ឌនៃកិច្ចសហប្រតិបត្តិការសេដ្ឋកិច្ច និង​បច្ចេកទេស រវាងប្រទេសទាំងពីរ (កម្ពុជា-ចិន) ដែលមានតម្លៃជាទឹកប្រាក់ ប្រមាណជាង៨៤លានយ័ន (ជិត១៤លាន​ដុល្លារ)។ ឆ្នំា​២០១២ កម្ពុជាបានទទួលម៉ាស៊ីនស្គែនកុងទីន័របីគ្រឿង, ប្រព័ន្ធត្រួតពិនិត្យលើខ្លួនមនុស្សចំនួនប្រាំពីរគ្រឿង, ម៉ាស៊ីន​ស្គែន​សម្ភារៈផ្ទាល់ខ្លួនខ្នាតតូចបួនគ្រឿង និងម៉ាស៊ីនស្គែនសម្ភារៈផ្ទាល់ខ្លួនខ្នាតធំបីគ្រឿង។

ក្រៅពីនេះបន្ទាប់ពីការបោះឆ្នោតនៅកម្ពុជាកាលពីថ្ងៃទី២៨ ខែកក្កដា នេះ រដ្ឋាភិបាលចិនក៏បានផ្តល់កាំភ្លើងដៃ​ចំនួនមួយ​ពាន់ដើម និងគ្រាប់ចំនួនប្រាំម៉ឺនគ្រាប់ដល់កងនគរបាលកម្ពុជា។

តាមព័ត៌មានពីក្រសួងហិរញ្ញវត្ថុកម្ពុជាឲ្យដឹងថា គិតរាប់ពីឆ្នាំ១៩៩២មក ប្រទេសចិនតែមួយ បានផ្ដល់ជំនួយដល់កម្ពុជា ក្នុង​ទំហំទឹកប្រាក់សរុប ជាង២ពាន់៨រយលានដុល្លារអាម៉េរិក ក្នុងនោះមានឥណទានសម្បទាន ជាប្រាក់ជាង២ពាន់​៤រយ​៥០លានដុល្លារ អាមេរិកដែលកម្ពុជាត្រូវសងទៅចិនវិញដែរ៕

---------------------------------------------------------
ដោយៈ អ៊ុម វ៉ារី - ភ្នំពេញថ្ងៃទី២១ សីហា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ