ថ្ងៃសុក្រទី០៧ខែមិថុនានេះ រដ្ឋសភានឹងបើកកិច្ចប្រជុំវិសាមញ្ញមួយ ដើម្បីអនុម័តលើសេចក្តីស្នើច្បាប់ ស្តីពី«ការប្រឆាំងការ​មិនទទួលស្គាល់ឧក្រិដ្ឋកម្ម ដែលបានប្រព្រឹត្តិឡើង ក្នុងរយៈកាលនៃកម្ពុជាប្រជាធិបតេយ្យ» ដោយគ្មានវត្តមានរបស់​គណបក្សប្រឆាំង។ នេះបើតាមសេចក្តីថ្លែងការណ៍ ចុះថ្ងៃទី០៦ ខែមិថុនា របស់ក្រុមតំណាងរាស្រ្តគណបក្សសម រង្សី និង​គណបក្សសិទ្ធិមនុស្ស ដែលបានចាត់ទុកថា «រដ្ឋសភាខ្មែរបានបាត់បង់សុពលភាព» អស់ទៅហើយ។

រដ្ឋសភាជាតិ នៃព្រះរាជាណាចក្រកម្ពុជា។ MONOROOM.info photo/ O.Vary។

សេចក្តីថ្លែងការណ៍នេះបានចាត់ទុកថា រដ្ឋសភា ដែលគ្មានសម្លេងគណបក្សប្រឆាំងនេះ នឹងត្រូវបានរំលាយចោល ដោយ​គណកម្មាធិការអចិន្ត្រៃនៃរដ្ឋសភា ហើយនាំដល់ការរំលាយរដ្ឋសភាមុននីតិកាល។ រដ្ឋសភានេះមិនអាចមានសុពលភាព ឬសិទ្ធិអំណាច ដើម្បីធ្វើការប្រជុំអនុម័តច្បាប់ ឬសម្រេចអ្វីក្នុងនាមស្ថាប័ននីតិបញ្ញត្តិបានតទៅទៀតទេ។

បញ្ជាក់លើករណីនេះ លោក ញ៉ែម ថាវី អ្នកនាំពាក្យរដ្ឋសភា បានប្រាប់មនោរម្យព័ងអាំងហ្វូថា នឹងមានការអញ្ជើញ​ឲ្យ​ចូលរួម ពីសមាជិកភាពរបស់គណបក្ស ដែលមានអសនៈក្នុងរដ្ឋសភា។ តែបើសមាជិកណា បានលាលែងចេញ​ពី​គណបក្ស ដែលមានអសនៈក្នុងរដ្ឋសភា (គណបក្សប្រជាជនកម្ពុជា សម រង្សី សិទ្ធិមនុស្ស នរោត្តមរណឬទ្ធិ និង​ហ្វុនស៊ីនប៉ិច) នោះមានន័យថាលែងជាសមាជិកភាព នៃរដ្ឋសភាទៀតហើយ និងក៏គ្មានការអញ្ជើញឲ្យចូលរួមដែរ ព្រោះពួកគាត់ មិនមែនជាអ្នកតំណាងរាស្រ្តទៀតទេ។

លោកបន្តថា ការផ្តាច់ខ្លួនពីគណបក្ស ដែលមានអសនៈនៅក្នុងរដ្ឋសភា ទៅគណបក្សមួយផ្សេងទៀត នាំឲ្យមានការ​បាត់បង់នូវសមាជិកភាពនៃរដ្ឋសភា។ ថ្ងៃស្អែក នឹងមានការបកស្រាយលើច្បាប់បង្អែកប្រាំ ដែលនិយាយពីការបាត់បង់​សមាជិកភាព សិទ្ធិជាតំណាងរាស្រ្តនេះ។

នៅក្នុងសេចក្ដីថ្លែងការណ៍ដដែល របស់ក្រុមតំណាងរាស្ត្រគណបក្សប្រឆាំង បានបញ្ជាក់ទៀតថា ការផាត់ចេញមិន​អញ្ជើញតំណាងរាស្ត្រ មកពីគណបក្សសម រង្សី ចំនួនម្ភៃប្រាំរូប និងគណបក្សសិទ្ធិមនុស្សចំនួនបីរូប ឲ្យចូលរួម​ក្នុង​កិច្ច​ប្រជុំវិសាមញ្ញនៃរដ្ឋសភានាថ្ងៃស្អែកនេះ  បានធ្វើឲ្យសមាជិករដ្ឋសភា មកពីគណបក្សប្រជាជនមានចំនួនតែ៩៥ រូបតែ​ប៉ុណ្ណោះ និងនាំទៅដល់ចំនួនមិនគ្រប់១២០រូបតាមរដ្ឋធម្មនុញ្ញ ដើម្បីក្លាយជារដ្ឋសភាមួយបាន។

អ្នកវិភាគឯករាជ្យ ពីបញ្ហាសង្គម និងនយោបាយ លោក ឡៅ ម៉ុងហៃ បានបញ្ជាក់ថា ទោះជាយ៉ាងនេះក្តីច្បាប់ មួយដែល​មានសុពលភាព អាចអនុវត្តទៅបាននោះ មិនសំដៅលើសមាជិក១២០រូបនេះទេ។ លោកបន្តថា ចំនួន១២០រូបនេះ គ្រាន់​តែជាការកំណត់ នូវចំនួនសមាជិកសភា ដែលត្រូវមានក្នុងសភាប៉ុណ្ណោះ មិនមែនជាចំនួននៃការកំណត់ ក្នុងកិច្ចប្រជុំ​ធ្វើ​ច្បាប់ឡើយ។  តាមរដ្ឋធម្មនុញ្ញត្រង់មាត្រា៨៨ បានកំណត់ថា «ការប្រជុំរដ្ឋសភានឹងយកជាការបាន លុះត្រាតែមានកូរ៉ុម ប្រាំបីភាគដប់ នៃសមាជិករដ្ឋសភាទាំងមូល» ហើយគណបក្សប្រជាជនសព្វថ្ងៃ នេះមាន«កូរ៉ុមគ្រប់គ្រាន់» ក្នុងការអនុម័ត​ច្បាប់ហើយ។

ឯលោកញ៉ែម ថាវី បន្ថែមថា សម្រាប់ការប្រជុំវិសាមញ្ញនៃរដ្ឋសភាស្អែកនេះ សមាជិកភាពដែលនឹងត្រូវចូលរួម​មកពី​គណបក្សចំនួនប្រាំ ក្នុងនោះមានសមាជិកភាពគណបក្សប្រជាជនចំនួន៩០នាក់ នឹងចូលរួម ប្រសិនបើពួក​គេមិន​មាន​ជាប់បំពេញបេសកម្មអ្វីនោះទេ។ ឯសមាជិកភាព ក្រៅពីនេះ មកពីគណបក្សសម រង្សី សិទ្ធិមនុស្ស ហ្វុនស៊ីនប៉ិច និង​នរោត្តមរណឬទ្ធិដែលមិនបានលាលែង ឬបាត់បង់ជាសមាជិកភាពនៃរដ្ឋសភា ក៏ត្រូវបានអញ្ជើញឲ្យចូលរូមដែរ។

ក្នុងថ្ងៃព្រហស្បត្តិ៍នេះ គណបក្សប្រឆាំងក៏បានស្នើរសុំឲ្យរដ្ឋសភា ធ្វើការពន្យាពេលនៃកិច្ចប្រជុំពិភាក្សា និងអនុម័ត​លើ​សេចក្តីស្នើច្បាប់នេះ រហូតដល់ក្រោយការបោះឆ្នោត ជ្រើសតាំងតំណាងរាស្ត្រខាងមុខ ដើម្បីឲ្យរដ្ឋសភាអាច​ធ្វើច្បាប់​មួយនេះឲ្យល្អ និងត្រឹមត្រូវ។ តែរហូតមកដល់ល្ងាចនេះ នៅមិនទាន់មានការឆ្លើយតប ពីប្រធានរដ្ឋសភានៅឡើយទេ ។

សូមរម្លឹកថា តាមសេចក្តីប្រកាសព័ត៌មានកាលពីថ្ងៃទី៥ ខែមិថុនា របស់អគ្គលេខាធិការដ្ឋានរដ្ឋសភា បានបញ្ជាក់ថា​គណៈកម្មាធិការអចិន្ត្រៃយ៍រដ្ឋសភាធ្វើការពិភាក្សា និងអនុម័តលើរបៀបវារៈចំនួនប្រាំមួយ ក្នុងនោះក៏មានសេចក្តីស្នើ​ច្បាប់ស្តីពីការប្រឆាំងការមិនទទួលស្គាល់ឧក្រិដ្ឋកម្ម ដែលប្រព្រឹត្តឡើងក្នុងរយៈកាលនៃកម្ពុជាប្រជាធិបតេយ្យផងដែរ។ សេចក្តីស្នើច្បាប់នេះមានប្រាំមាត្រា ត្រូវផ្តន្ទាទោសដាក់ពន្ធនាគារពីប្រាំមួយខែ ទៅពីរឆ្នាំ និងពិន័យជាប្រាក់ពីមួយ​លាន​រៀល ទៅបួនលានរៀល ទៅលើអ្នកដែលមិនទទួលស្គាល់របបខ្មែរក្រហម៕

---------------------------------------------------------
ដោយៈ អ៊ុម វ៉ារី - ភ្នំពេញថ្ងៃទី០៦ មិថុនា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ