ខ្សែប្រយុទ្ធ អេឌីនសិន កាវ៉ានី (Edinson Cavani) របស់ក្រុម ប៉ារីស ហ្សិនជឺម៉ិន (Paris Saint-Germain) ជឿថា ក្លិប​ហង្សក្រហម លីវើភូល (Liverpool) កំពុងតែដាក់គំនាបមិនយុត្តិធម៌ ទៅលើខ្សែប្រយុទ្ធ ល្វីស ស្វារែស (Luis Suarez) ដោយរារាំងមិត្តរួមក្រុមជម្រើសជាតិអ៊ុយរ៉ាហ្គាយរបស់គាត់ មិនឲ្យចាកចេញពីក្លិប។

កីឡាករមិត្តភ័ក្រទាំងពីរ សប្បាយចិត្តនៅពេលលេងជុំគ្នា ក្នុងក្រុមជម្រើសជាតិអ៊ុយរ៉ាហ្គាយ។ (រូបថត Reuters)

គ្រូបង្វឹកក្រុមលីវើភូល លោកប្រិនដេន រ៉ដចឺស (Brendan Rodgers) បាននិយាយយ៉ាងច្បាស់ហើយថា គាត់មិនអាច​អនុញ្ញាតឲ្យកីឡាករដែលទាត់បញ្ចូលទីបានច្រើនជាងគេនៅក្នុងក្រុម ចាកចេញពីក្លិប នៅក្នុងរដូវក្តៅនេះនោះទេ បើ​ទោះ​បីជាអតីតកីឡាករក្រុម អាស្សាក (Ajax) បានលើកឡើងថា វាជាការបំពានកិច្ចសន្យារបស់គាត់ ជាមួយនឹងក្លិបក៏ដោយ។

បន្ទាប់ពីផ្ទេរពីក្រុមណាប៉ូលី (Napoli) ទៅកាន់ក្រុមប៉ារីស ក្នុងតម្លៃថ្លៃជាងគេ នៅប្រទេសបារាំងកាលពីពេលថ្មីៗ កាវ៉ានី បានប្រាប់ដល់កាសែត ដៀលីម៉ែល (Daily Mail) ថា ក្លិបហង្សក្រហមមិនគួរណា ចង់រក្សារទុកកីឡាករ ដែលមិន​ចង់​ផ្តល់​អ្វីៗគ្រប់បែបយ៉ាងជូនដល់ក្លិបទៀតនោះទេ។

កីឡាករអន្តរជាតិអ៊ុយរ៉ាហ្គាយ បានពន្យល់ថា៖ «គ្រូបង្វឹកលីវើភូល អាចនិយាយពីភក្តីភាព ឬការមិនគោរព ប៉ុន្តែប្រហែល​ជាគាត់ត្រូវតែមើលពីអត្ថន័យឡើងវិញ។ ស្វារែស គាត់មានឱកាសទៅកាន់ក្លិបធំដូចជា ជូវីនទូស (Juventus) ដែលឈ្នះ​លីកអ៊ីតាលី កាលពីឆ្នាំមុន។ ប៉ុន្តែផ្ទុយទៅវិញ គាត់នៅជាមួយលីវើភូល១រដូវកាលទៀត ហើយនោះជាអ្វីដែលអ្នក​និយាយ​ថា ភក្តីភាព។»

ខ្សែប្រយុទ្ធវ័យ ២៦ឆ្នាំបានបន្ថែមថា៖ «ខ្ញុំបានដឹងពីកិច្ចព្រមព្រៀងរបស់គាត់ ជាមួយនឹងក្រុមលីវើភូល ហើយខ្ញុំយល់ថា គាត់សាកសម្យនឹងចាកចេញ បើពួកគេមិនបានលេងក្នុងក្របខ័ណ្ឌ ឆែមពានលីក (Champions League)។»

ចំណែកឯគ្រូបង្វឹកក្រុម ឃ្វីនផាក រ៉ែងចឺ (Queens Park Rangers) លោក ហារី រ៉ែដណេប (Harry Redknapp) បាន​លើក​ឡើងថា ស្វារែសគាត់មិនខ្វល់ពីនរណាទាំងអស់ ឲ្យតែគាត់បានចាកចេញពីក្លិប។

គ្រូបង្វឹកវ័យ៦៦ឆ្នាំរូបនេះ បាននិយាយថា៖ «គាត់ (ស្វារែស) មិនខ្វល់ពីគ្រូបង្វឹក មិត្តរួមក្រុម និងអ្នកគាំទ្រទាំងអស់ ដែល​តែងតែជួយការពារ និងគាំទ្រគាត់ នៅពេលដែលគាត់មានរឿងរ៉ាវជាមួយនឹងអ្នកដទៃនោះទេ។ ជាក់ស្តែងគាត់មិនខ្វល់ពី​ក្លិបបាល់ទាត់លីវើភូលអ្វីទាំងអស់ ពោលគឺគាត់ខ្វល់តែខ្លួនគាត់តែប៉ុណ្ណោះ។»

ខណៈដែលក្របខ័ណ្ឌបាល់ទាត់ ព្រីមែលីកជិតនឹងបើករដូវកាល មិនដល់ពេល១អាទិត្យទៀតនោះ អតីតកីឡាករ​ក្រុម​ហង្សក្រហម លោក ជេមី រ៉េដណេប (Jamie Redknapp) បានផ្តល់ដំបូន្មានដល់លោក រ៉ដចឺសថា ឲ្យលក់ស្វារែសចេញទៅ មុនពេលដែលទីផ្សារទិញដូរកីឡាករត្រូវបានបិទ កុំឲ្យមានរឿងរ៉ាវវែងឆ្ងាយនៅលើទីលានទៅថ្ងៃក្រោយទៀត។

លោក រ៉េដណេប ដែលបច្ចុប្បន្នជាអ្នកវិភាគបាល់ទាត់នៅកាសែត ដៀលីម៉ែល បានពន្យល់ថា៖ «ការប្រកួតបាល់ទាត់​នៅក្នុងសម័យទំនើបនេះ វាពិតជាពិបាកណាស់ ដែលយើងចង់រក្សារកីឡាករ ដែលមិនរីករាយជាមួយក្រុម ឲ្យនៅលេង​ជាបន្ត។ បើលីវើភូល នៅតែរក្សារទុកស្វារែស ពួកគេ នឹងនៅតែមានរឿងរ៉ាវរកាំរកូសជាបន្តទៀត៕»

----------------------------------------------------
ដោយ៖ វិន ជីវ័ន្ត - ភ្នំពេញ ថ្ងៃទី១២ ខែសីហា ឆ្នាំ២០១៣
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ