ខ្សែប្រយុទ្ធអន្តរជាតិអង់គ្លេស វ៉ែន រ៉ូនី (Wayne Rooney) បានខឹងច្រឡោតយ៉ាងខ្លាំង ខណៈដែលលឺសម្តីរបស់​គ្រូបង្វឹក​ម៉ែនឆេស្ទើ យូណៃធីត(Manchester United) ថ្មី និយាយថា គាត់អាចជាជម្រើសដ៏ល្អមួយ បន្ទាប់ពីខ្សែប្រយុទ្ធ រ៉ូបីន វ៉ាន់ផឺស៊ី (Robin van Persie) នៅក្នុងរដូវកាលនេះ។

ខ្សែប្រយុទ្ធអន្តរជាតិអង់គ្លេស វ៉ែន រ៉ូនី មិនសូវសប្បាយចិត្តនៅម៉ែនឆេស្ទើ យូណៃធីត។

ស្ថានីយទូរទស្សន៏ស្កាយស្ពត (Sky Sports) បានដកស្រង់ផ្សាយ កាលពីថ្ងៃអង្គារ៏ថា រ៉ូនី «ខឹងច្រឡោត និងច្រឡំ» ពេល​លឺ​សម្តីរបស់គ្រូបង្វឹករបស់គាត់ លោកដេវីដ ម៉យ (David Moyes) បាននិយាយនៅក្នុងសន្និសិតកាសែតមួយ។

ទោះបីជាយ៉ាងណា អតីតគ្រូបង្វឹកក្រុមអេវើតុន (Everton) បាននិយាយរួចហើយថា ខ្សែប្រយុទ្ធរូបនេះ មិនមែន​សម្រាប់​លក់នោះទេ។ ប៉ុន្តែគាត់បាននិយាយធ្លាយចំណុចខ្សោយមួយ ដែលធ្វើឲ្យរ៉ូនី ខឹងនិងអន់ចិត្តយ៉ាងខ្លាំង នៅពេលគ្រូ​បង្វឹក​រូបនោះនិយាយថា ខ្សែប្រយុទ្ធវ័យ២៧ឆ្នាំ (រ៉ូនី) អាចជាជម្រើសមួយដ៏ល្អ នៅពេលដែលវ៉ាន់ផឺស៊ី មានបញ្ហា។

ដេវីដ ម៉យ បាននិយាយនៅកំឡុងពេលត្រៀមប្រកួតជាមួយក្រុមប្រទេសអូស្ត្រាលីថា៖ «សម្រាប់ការគិតរបស់ខ្ញុំទៅលើ រ៉ូនី៖ បើមានកាលៈទេសៈណា វ៉ាន់ផឺស៊ី រងរបួស យើងនឹងត្រូវការគាត់ (រ៉ូនី)។»

ទោះបីជាយ៉ាងណា គ្រូបង្វឹករូបនេះ ក៏បានបន្ថែមទៀតដែរថា៖ «ខ្ញុំអាចនឹងឲ្យពួកគេ (រ៉ូនី និងវ៉ាន់ផឺស៊ី) លេងទាំង២នាក់​រួមគ្នា ហើយខ្ញុំក៏នៅតែត្រូវការខ្សែប្រយុទ្ធ ដេនី វ៊ែលប៊ែក (Danny Welbeck) និងចាវីយើ ហឺណាន់ដេស (Javier Hernandez) ដែរ។ ខ្ញុំចង់មានជម្រើសច្រើន តាមដែលអាចធ្វើទៅបាន។»

ប្រភពស្កាយស្ពតដដែល បានលើកឡើងថា រ៉ូនីមានអារម្មណ៏ថា គាត់ប្រហែលជាគ្មានអនាគតល្អទៀតទេ ជាមួយ​ក្រុម​បីសាចក្រហម បន្ទាប់ពីចំណាយពេល៩ឆ្នាំ ជាមួយនឹងក្លិបនេះរួចមក ហើយគាត់អាចនឹងចាកចេញទៅរកក្រុមថ្មី ដើម្បី​បាន​លេងជាជម្រើស១១នាក់ដំបូងបានទៀងទាត់។

ខណៈដែល វ៉ាន់ផឺស៊ី រកគ្រាប់បាល់បញ្ចូលទីបាន៣០គ្រាប់ កាលពីរដូវកាលមុន និងក្លាយជាកីឡាករទាត់បញ្ចូលទី​បាន​ច្រើនជាងគេ (top scorer) ជាលើកទី២ នៅក្នុងក្របខ័ណ្ឌព្រីមែលីក (Premier League) ទៀតនោះ រ៉ូនីអាចរកគ្រាប់បាល់​បញ្ចូលទីបានតែ១២គ្រាប់ប៉ុណ្ណោះ។

មិនត្រឹមតែប៉ុណ្ណោះ រ៉ូនីក៏បានធ្លាក់ដំណែងទៅជាកីឡាករបម្រុងក្នុងការប្រកួតសំខាន់ៗមួយចំនួន ក្រោមការដឹកនាំ​របស់​លោក អាឡិច ហ្វឺកឺសិន (Alex Ferguson) ផងដែរកាលពីរដូវកាលមុន ដូចជាការប្រកួតជើងទី២ ឆែមពានលីក (Champions League) ជាមួយនឹងក្រុមរៀលម៉ាឌ្រីដ (Real Madrid) ជាដើម ដែលធ្វើឲ្យគាត់មានការអាក់អន់ចិត្ត ចាប់តាំងពីពេលនោះមក៕

----------------------------------------------------
ដោយ៖ វិន ជីវ័ន្ត - ភ្នំពេញ ថ្ងៃទី១៧ ខែកក្កដា ឆ្នាំ២០១៣
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ