គល់ បញ្ញា៖ រដ្ឋាភិបាលគួរនៅអព្យាក្រិត្យ ចំពោះការបន្លំឯកសារស្ទង់មតិរបស់ IRI
![គល់ បញ្ញា៖ រដ្ឋាភិបាលគួរនៅអព្យាក្រិត្យ ចំពោះការបន្លំឯកសារស្ទង់មតិរបស់ IRI](http://monoroom.info/uploads/2013/06/election_cambodge2.jpg)
នៅព្រឹកថ្ងៃទី១៧ខែកក្កដានេះ លោកកែវ រ៉េមី ជាអនុប្រធាន អង្គភាពព័ត៌មាន និងប្រតិកម្មរហ័ស របស់ទីស្តីការគណៈរដ្ឋមន្ត្រី បានថ្លែងពន្យល់ពីសេចក្តីថ្លែងការណ៍ របស់រដ្ឋាភិបាលទៅកាន់អ្នកសារព័ត៌មាន នៅទីស្តីការគណៈរដ្ឋមន្រ្តីថា៖ «ការក្លែងបន្លំនេះ វាគឺជាទង្វើដ៏ថោកទាបបំផុត របស់ក្រុមទុច្ចរិទ្ធ ដោយអំពើនេះកំពុងបំផ្លាញ នូវដំណើរការបោះឆ្នោតមួយ ដែលត្រូវមានសេរីភាព តម្លាភាព និងជាពិសេសភាពត្រឹមត្រូវនិងយុត្តិធម៌»។
សេចក្តីថ្លែងការណ៍ ចុះថ្ងៃដដែល របស់រដ្ឋាភិបាល បានកំណត់ការក្លែងឯកសារនេះ ថាជាទង្វើសកម្មជនរបស់គណបក្សនយោបាយមួយ ហើយសេចក្ដីថ្លែងការណ៍ ក៏បានបញ្ជារឲ្យសមត្ថកិច្ចតាមចាប់ខ្លួនជនទាំងនោះ និងបញ្ជូនទៅតុលាការជាបន្ទាន់នោះដែរ។
លោកកែវ រ៉េមី បានចាត់ទុកសកម្មភាពនេះ ធ្វើឲ្យប៉ះពាល់ដល់ស្ថេរភាពសង្គម សា្ថនភាពសេដ្ឋកិច្ចនិងហិរញ្ញវត្ថុ ដែលកំពុងមានភាពល្អប្រសើរឡើង ហើយអាចបង្កឲ្យមានចលាចលដល់សង្គម។
ថ្លែងប្រាប់ទស្សនាវដ្ដីមនោរម្យ.អាំងហ្វូ តាមទូរស័ព្ទ លោក គល់ បញ្ញា នាយកប្រតិបត្តិនៃគណៈកម្មាធិការ ដើម្បីការបោះឆ្នោតដោយសេរី និងយុត្តិធម៌នៅកម្ពុជា ហៅកាត់ថា ខុមហ្រ្វែល (COMFREL) បានពន្យល់ថា៖ «រដ្ឋាភិបាលគួរនៅអព្យាក្រិត្យ នៅក្នុងដំណាក់កាលនេះ រឿនេះជារឿងរបស់IRI និងគណបក្សនយោបាយ ដែលមានផលប៉ះពាល់ទើបមានសិទ្ធិប្រតិកម្ម»។ លោកបន្តថា៖ «រដ្ឋាភិបាល មិនត្រូវចាប់ខ្លួនពួកគេនោះទេ ពីព្រោះពួកគេមានសិទ្ធិបញ្ចេញមតិ បើពួកគេបញ្ចេញមតិខុស វាជាការអស់តម្លៃរបស់ពួកគេ»។
លោកគល់ បញ្ញា អះអាង ថាច្បាប់បានហាមឃាត់ការស្ទាបស្ទង់មតិ រយៈពេលប្រាំថ្ងៃ មុនថ្ងៃបោះឆ្នោត ខណៈពេលនេះមានរយៈពេលដប់ថ្ងៃទៀតទើបដល់ថ្ងៃបោះឆ្នោត។ ផ្ទុយទៅវិញ ប្រទេសមួយចំនួនផ្សេងទៀត គេមានសិទ្ធិធ្វើការស្ទង់មតិនេះ រហូតដល់ថ្ងៃបោះឆ្នោត។
សូមរម្លឹកថា ថ្មីៗនេះ មានមនុស្សមួយក្រុមបានចេញផ្សាយ និងឃោសនា នូវឯកសារមួយអំពីលទ្ធផលស្ទង់មតិ ប៉ាន់ស្មានអំពីចំនួនអាសនៈ ដែលគណបក្សនយោបាយនីមួយៗបានឈ្នះ តាមបណ្តារាជធានី ខេត្ត ក្រុងនានា។ ឯកសារ ដែលត្រូវបានគេបង្ហោះ តាមហ្វេសប៊ុកនោះ បានបង្ហាញថាគណបក្សសង្គ្រោះជាតិ នឹងទទួលបានសំឡេងគាំទ្រចំនួន៥៤ភាគរយ ស្មើនឹង៦៤អាសនៈ។ ចំណែកឯគណបក្សប្រជាជនកម្ពុជាវិញ បានទទួលសម្លេងចាញ់ ដោយទទួលបានតែ៤៦ភាគរយ ស្មើនឹង៥៩អាសនៈប៉ុណ្ណោះ។
ទាក់ទងនឹងបញ្ហានេះ សេចក្ដីថ្លែងការណ៍របស់រដ្ឋាភិបាល បានបញ្ជាក់ថា ប្រធានវិទ្យាសា្ថនសាធារណរដ្ឋអន្តរជាតិ លោកស្រី ជេស៊ីកា ឃីជែន (Jessica Keegan) បានធ្វើការបដិសេធជាផ្លូវការ ពីឯកសារក្លែងបន្លំនេះ តាមរយៈសារអេឡិកត្រូនិច ចុះថ្ងៃទី ១៥ ខែកក្កដា ឆ្នាំ២០១៣ ផ្ញើរមកទីស្តីការគណៈរដ្ឋមន្ត្រី។ តែការផ្សាយមួយ របស់គេហទំព័រនៃវិទ្យុសម្លេងប្រជាធិបតេយ្យក្នុងថ្ងៃដដែល បានរាយការណ៍ថា លោកស្រី ជេស៊ីកា ឃីជែន បានបដិសេធ ថា«មិនបានសរសេរ» ទៅកាន់ទីស្ដីការគណៈរដ្ឋមន្ត្រីអ្វីទាំងអស់ ហើយផ្ទុយទាំងស្រុងនឹងការនិយាយយោង របស់សេចក្ដីថ្លែងការណ៍ខាងលើ៕