ភ្នំពេញ៖ គណបក្សសង្គ្រោះជាតិ បានចេញសេចក្តីប្រកាសព័ត៌មានក្នុងថ្ងៃទី១ ខែសីហា នេះដោយអះអាងថាទទួលបាន​កៅអី​យ៉ាងតិច៦៣។ ការអះអាងនោះ ដោយយោងតាមការបូកសរុបលទ្ធផល នៃការបោះឆ្នោតពីគ្រប់ឃុំសង្កាត់ទូទាំង​ប្រទេស ហើយមិនគិតពីភាពមិនប្រក្រតីកើតមានមុន និងអំឡុងថ្ងៃបោះឆ្នោតនោះទេ។

នៅពេលចាំផ្ដើមរាប់សន្លឹកឆ្នោត ដែលបោះឆ្នោតហើយនៅម៉ោង៣រសៀល ថ្ងៃទី២៨ខែកក្កដា ឆ្នាំ២០១៣ នៅមណ្ឌលវត្តវង្គត្តបូរី។ (រូបថត MONOROOM.info/ U.Bory)

តាមតួលេខដែលបានផ្សាយចេញ ដោយគណបក្សសង្គ្រោះជាតិ មានចំនួន៦៣អាសនៈនេះ បញ្ច្រាសគ្នានឹងតួលេខ​ដែល​លោក ខៀវ កាញារិទ្ធ រដ្ឋមន្រ្តីក្រសួងព័ត៌មាន បានសរសេរក្នុងទំព័រហ្វេសប៊ូក របស់លោកកាលពីយប់ថ្ងៃទី២៨ ខែ​កក្កដាថា គណបក្សប្រជាជនកម្ពុជាទទួលបាន៦៨អាសនៈ ចំណែកគណបក្សសង្រ្គោះជាតិទទួលបាន៥៥អាសនៈ នៃ​ចំនួន​អាសនៈ​១២៣ក្នុងរដ្ឋសភា។ ចំណែកអង្គការខុមហ្វ្រែលក៏បានប្រកាសថា ស្រដៀងទៅនឹងការបង្ហាញរបស់លោក ខៀវ កាញារិទ្ធ ដែរ ដោយគណបក្សប្រជាជនកម្ពុជាបាន៦៧អាសនៈ និងគណបក្សសង្គ្រោះជាតិបាន៥៦អាសនៈ។

ជាមួយគ្នានេះគណៈកម្មាធិការជាតិរៀបចំការបោះឆ្នោត(គ.ជ.ប) ក្នុងសេចក្តីប្រកាស ចុះថ្ងៃទី៣១ ខែកក្កដា ឆ្នាំ២០១៣ បានផ្សាយនូវសេចក្តីបំភ្លឺអំពីការផ្សព្វផ្សាយលទ្ធផលបឋមនៃការបោះឆ្នោត ដោយមិនទាន់បានធ្វើការកំណត់​បែងចែក​ចំនួនអាសនៈនៅឡើយនោះទេ ដោយរង់ចាំបន្ទាប់ពីដោះស្រាយបណ្តឹងដែលទទួលបានចប់ជាស្ថាពរសិន។

សេចក្តីប្រកាសរបស់គ.ជ.ប ដដែលក៏បានបង្ហាញពីតារាងលទ្ធផល បឋម នៃការរាប់សន្លឹកឆ្នោត​របស់អ្នកបោះឆ្នោត​ដែល​មានឈ្មោះក្នុងបញ្ជីបោះឆ្នោតចំនួនសរុប ៩.៦៧៥.៤៥៣នាក់ និងចំនួនវត្តមាននៃអ្នកបោះឆ្នោតឲ្យ​គណបក្សទាំងប្រាំបី​មានចំនួន ៦.៦១៦.១១០នាក់។

សម្រាប់គណបក្សប្រគួតប្រជែងគ្នាធំៗពីរ គណបក្សប្រជាជនកម្ពុជាបាន៣.២២៧.៧២៩សម្លេង និងគណបក្ស​សង្គ្រោះ​ជាតិបាន ២.៩៤១.១៣៣សម្លេង។ ក្រៅពីនោះបានទៅគណបក្សហ្វ៊ុនស៊ិនប៉ិច បាន ២៤១.៨៦៦សម្លេង, សម្ព័ន្ធដើម្បី​ប្រជាធិបតេយ្យ ៦៩.៦៦៧សម្លេង, ខ្មែរឈប់ក្រ ៤៣.៣១២សម្លេង, សញ្ជាតិកម្ពុជាបាន៣៧.៩៦៣ សម្លេង, សាធារណរដ្ឋ​ប្រជាធិបតេយ្យបាន ៣៤.៥៦៩សម្លេង, និងខ្មែរអភិវឌ្ឍន៍សេដ្ឋកិច្ច ១៩.៨៧១សម្លេង។

ស្របពេលដែលគ.ជ.ប មិនទាន់ប្រកាសលទ្ធផលនៃអសនៈនេះ គណបក្សសង្គ្រោះជាតិបានរៀបចំវេទិការ សាធារណៈ​នៅទីស្នាក់ការខណ្ឌទួលគោក ដើម្បីស្វែងរក និងបង្ហាញពីភាពមិនប្រក្រតីបក្ស ដោយបើកឱកាសឲ្យប្រជាពលរដ្ឋ​បាន​សម្ដែងនូវមតិ និងចុះឈ្មោះតវ៉ាពីភាពអសកម្មមួយចំនួន មុន និងក្នុងអំឡុងពេលបោះឆ្នោត ។

មន្ត្រីជាន់ខ្ពស់គណបក្សសង្គ្រោះជាតិ លោក ហូរ វ៉ាន់ បានបង្ហាញថាក្នុងពេលមួយថ្ងៃ(ថ្ងៃទី៣០ ខែកក្កដា) ប្រជាពលរដ្ឋ​មិនបានបោះឆ្នោតមានចំនួនជាងមួយពាន់នាក់។ លោកបន្តរថាពលរដ្ឋភាគច្រើនដែលមកប្តឹងនោះមាន៨០ភាគរយ មិន​បានបោះឆ្នោត ព្រោះតែឈ្មោះពួកគាត់គ្មានក្នុងបញ្ជីបោះឆ្នោត និង១០ភាគរយដោយសារតែឈ្មោះពួកគាត់​ត្រូវបានគេ​បោះជំនូស និង១០ភាគរយទៀតមកសម្ដែងមតិពីភាពមិនប្រក្រតីមួយចំនួនដែលបានកើតឡើងនៅថ្ងៃបោះឆ្នោត ដោយ​មានភស្តុតាងនានាដូចជាឯកសារ រូបថត ឬវីដេអូជាដើម។

មន្រ្តីរូបនេះបញ្ជាក់ថា ប្រជាពលរដ្ឋជាងមួយពាន់នាក់នេះ ក៏បានសម្ដែងនូវការខឹងចំពោះគ.ជ.ប ដែលបានធ្វើឲ្យបាត់​​ឈ្មោះរបស់គាត់ ដែលក្នុងអំឡុងបោះឆ្នោតឃុំ-សង្កាត់ពួកគាត់មានឈ្មោះ និងរាល់អាណត្តិកន្លងទៅបាន​បោះឆ្នោតគ្រប់​អាណត្តិ។

វេទិកាសម្ដែងមតិ និងការចុះឈ្មោះនេះ នឹងបន្តធ្វើរហូតដល់ថ្ងៃទី១០ ខែសីហា។ គណបក្សសង្គ្រោះជាតិនឹងរៀបចំ​បញ្ជី​ឈ្មោះ និងករណីមិនប្រក្រតីនានា ដែលប្រជាពលរដ្ឋបានជួបប្រទះ ដាក់ជាភស្តុងឲ្យ គ.ជ.ប ពិនិត្យនូវភាពមិនប្រក្រតី​ទាំង​នោះ ដើម្បីឈានទៅដល់ការបង្កើតគណៈកម្មការចម្រុះមួយ ដែលមានគ្រប់ភាគីពាក់ព័ន្ធទាំងអស់ចូលរួម ធ្វើការពិនិត្យ និងដោះស្រាយនូវបញ្ហានានាជុំវិញ ការរៀបចំការបោះឆ្នោតរបស់គ.ជ.ប។

ជាមួយគ្នានេះ គ.ជ.ប ក៏បានប្រកាសទទួលរបាយការណ៍ស្តីពីភាពមិនប្រក្រតី នានាដែលបានកើតឡើង ពីគណបក្ស​នយោបាយចូលរួមការបោះឆ្នោត និងពីភាគីពាក់ព័ន្ធមួយចំនួនទៀត ចាប់ពីថ្ងៃទី០២ ដល់ថ្ងៃទី០៦ ខែសីហា ឆ្នាំ២០១៣​នេះ។ គ.ជ.បនឹងធ្វើការត្រួតពិនិត្យ ស្រាវជ្រាវ និងចាត់វិធានការយ៉ាងហ្មត់ចត់ សហការអង្កេតមើលដោយតំណាង គណបក្សនយោបាយប្រកួតប្រជែង និងអង្គការសង្កេតការណ៍ជាតិ និងអន្តរជាតិ។

ក្នុងសេចក្តីជូនដំណឹងរបស់ខ្លួនមួយចុះដ្ងៃទី០១ ខែសីហានេះ គ.ជ.ប បានឲ្យដឹងថា នឹងចាប់ផ្តើមត្រួតពិនិត្យ និងផ្ទៀងផ្ទាត់​លទ្ធផលនៃការបោះឆ្នោតជ្រើសតាំងតំណាងរាស្រ្តនីតិកាលទីប្រាំឆ្នាំ២០១៣ ចាប់ពីថ្ងៃទី០៣ ខែសីហា នេះរហូតដល់ចប់​ជាស្ថាពរផងដែរ។

---------------------------------------------------------
ដោយៈ អ៊ុម វ៉ារី - ភ្នំពេញថ្ងៃទី០១ សីហា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ