ក្រុមបំបែកខ្លួនចេញពីពួកឧទ្ទាមនិយមឥស្លាម បានបើកការវាយប្រហារប្រឆាំង នឹងងកងទ័ពហ្វីលីពិន នៅផ្នែកខាងត្បូងនៃ​ប្រទេស ធ្វើឲ្យមានការផ្ទុះអាវុធយ៉ាងខ្លាំងក្លា ដែលបណ្ដាលឲ្យមានទាហានហ្វីលីពីនប្រាំនាក់ និងពួកបំបែកខ្លួនជាច្រើន​នាក់ផ្សេងទៀតស្លាប់។ ក្រុមបំបែកខ្លួននេះ ជាក្រុមមួយដែលចង់រំខានការចរចាទាំងឡាយ ដែលកំពុងមានដំណើរការ រវាង​ក្រុមឧទ្ទាមនិយមឥស្លាម និងរដ្ឋាភិបាលហ្វីលីពីន។

ក្រុមឧទ្ទាមនិយមឥស្លាម នៅប្រទេសហ្វីលីពីន។ (រូបថត TED ALJIBE, ARCHIVES AFP)

ការវាយប្រយុទ្ធគ្នា មានរយៈពេលពេញមួយថ្ងៃសៅរ៍ទី០៦ខែកក្កដា រវាងសមាជិកនៃក្រុមសកម្មប្រយុទ្ធសម្រាប់សេរីភាព បាងស៊ាំម៉ូរ៉ូ (Bangsamoro - BIFF) នៅក្នុងតំបន់ជាយភូមិ ដាទូ ពីយ៉ាង (Datu Piang) នៃខេត្តម៉ាហ្គិនដាណាវ (Maguindanao) និងនៅក្នុងតំបន់មួយផ្សេងទៀត ផ្នែកខាងជើងនៃខេត្តកូតាប៉ាតូ (Cotabato)។

អ្នកនាំពាក្យកងទ័ពប្រចាំតំបន់មួយរូប បាននិយាយាថា កងទ័ពប្រដាប់អាវុធហ្វីលីពីន ព្យាយាមរុញច្រានពួកឧទ្ទាម នៅ​ថ្ងៃ​អាទិត្យ ឲ្យថយចេញពីបន្ទាយមួយស្ថិតនៅលើចង្កេះភ្នំ។ ការជួបប្រយុទ្ធនេះ បានធ្វើឲ្យអ្នកស្រុកជាច្រើនរយនាក់ ជម្លៀស​ខ្លួន​ចេញ​ពីភូមិ ដាទូ ពីយ៉ាង ដែលជាភូមិដាច់ស្រយ៉ាលមួយក្រីក្រជាទីបំផុត ស្ថិតនៅចម្ងាយ៩០០គីឡូម៉ែត្រ​ពីរដ្ឋធានី​ម៉ានីល។

ការប្រយុទ្ធ បានដាក់បញ្ចប់នូវសភាពស្ងប់ស្ងាត់ ដែលបានកើតមានមួយរយៈពេលមកហើយ នៅតំបន់ផ្នែកខាងត្បូងនៃ​ប្រទេសនេះ តំបន់ដែលស្ថានភាពនយោបាយ និងសន្តិសុខមិនមានស្ថិរភាពពិតប្រាកដឡើយ។

ក្រុមឧទ្ទាមនិយមឥស្លាម ដែលបានចូលរួមក្នុងការប្រយុទ្ធនៅថ្ងៃសៅរ៍នេះ បានរត់ចោលជួរតាំងពីពីរឆ្នាំមុន ពី​រណសិរ្យ​រំដោះឥស្លាមម៉ូរូ។ រណសិរ្យម៉ូរ៉ូ ជាចលនាឧទ្ទាមឥស្លាមដ៏សំខាន់មួយ ដែលមានសមាជិកជាច្រើន មានចំនួន​ប្រមាណ​ជា១១ពាន់នាក់ មានទីតាំងនៅផ្នែកខាងត្បូងប្រទេសហ្វីលីពីន។

ក្រុមបំបែកខ្លួននេះបានបដិសេធចោល នូវរាល់ការចរចា រវាងរណសិរ្យម៉ូរ៉ូ និងរដ្ឋាភិបាលហ្វីលីពីន ដោយបានចោទថា ការចរចា​ទាំងនេះនឹងមិនមានប្រយោជន៍អ្វីទាំងអស់។ ពួកបំបែកខ្លួននៅតែបន្តប្រយុទ្ធ ដើម្បីបង្កើតនូវតំបន់មួយ ដែល​ត្រៀមទុក​បម្រុងសម្រាប់ទទួលឲ្យមករស់នៅ តែអ្នកកាន់សាសនាឥស្លាម នៅផ្នែកខាងត្បូងនៃប្រទេសហ្វីលីពីន។

សូមបញ្ជាក់ថា ប្រទេសហ្វីលីពីន មានបណ្ដាជនច្រើនលើសលប់ ជាអ្នកកាន់សាសនាគ្រីស្ទ៕

--------------------------------------------------------
ដោយ ៖ កេសរកូល - ភ្នំពេញ ថ្ងៃទី ០៧ ខែកក្កដា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ