ក្រុមហ៊ុនផលិតទូរស័ព្ទរបស់ប្រទេសអង់គ្លេស វើទូ (Vertu) បានប្រកាសចេញលក់នូវផលិតផលថ្មីរបស់ខ្លួន ប្រភេទ​ទូរស័ព្ទដៃពិសេស មានឈ្មោះថា «វើទូទីខល័រ» (Vertu Ti Color) ដែលមាន២ពណ៌ឲ្យជ្រើសរើស ក្នុងនោះមាន​ពណ៌​ខៀវ និងពណ៌ក្រហម។ ក្រុមហ៊ុនផលិតចំនួនតែ១០០០គ្រឿងប៉ុណ្ណោះ ហើយក្នុងមួយគ្រឿងតម្លៃ ១១៦០០ដុល្លា​សហរដ្ឋអាមេរិក។

ពណ៌ក្រហមមានរហ័សនាមថា «ព្រះអាទិត្យរៀបលិចពណ៌ក្រហម» (Sunset Red) រីឯពណ៌ខៀវមានរហ័សនាមថា «កណ្តាល​រាត្រីពណ៌ខៀវ» (Midnight Blue)។

អ្វីដែលធ្វើឲ្យទូរស័ព្ទដៃរបស់ក្រុមហ៊ុនវើទូ មានតម្លៃខ្ពស់ដាច់គេនេះ ដោយសារតែការរចនារបស់វា​មានភាព​ស្រស់​ស្អាត យ៉ាងប្រណិត និងទាន់សម័យ។ តួររបស់វើទូទីខល័រនេះ ត្រូវបានផលិតឡើងពីធាតុទីតាញ៉ូមថ្នាក់ទី៥ ដែល​ធ្វើ​ឲ្យវាមានភាពរឹងម៉ាំជាងទូរស័ព្ទដៃវ៉ៃឆ្លាតធម្មតាដល់ទៅ៥ដង។

ចំណែកឯលក្ខណៈសម្បត្តិរបស់វាសំខាន់ផ្សេងៗទៀត មានដូចជា៖
• អេក្រង់៖ ៣.៧អ៊ីញ
• គម្រប៖ ផលិតពីគ្រីស្តាល Sapphire រឹងបំផុត បន្ទាប់ពីពេជ្រ
• ម៉ាស៊ីន៖ ១.៧ជីហ្គាអែក
• កាមេរ៉ាក្រោយ៖ ៨ម៉េហ្គាភិចស្ស៊ែល, មានភ្លើង២គ្រាប់ (dual LED flash)
• កាមេរ៉ាមុខ៖ ១.៣ម៉េហ្គាភិចស្ស៊ែល
• អាចផ្ទុកបាន៖ ៦៤ជីហ្គាបៃ
• ប្រព័ន្ធដំណើរការ៖ អេនដ្រយ៤.០ អាយស្គ្រីម ស៊ាំងវិច (Android 4.0 Ice Cream Sandwich)

រូបភាព នៅពេលវាមានដំណើរការ។

ទូរស័ព្ទដៃស៊េរីទំនើប វើទូទីខល័រទាំង២ពណ៌នេះ ត្រូវបានចេញលក់ហើយ នៅប្រទេសអង់គ្លេស ដែល១គ្រឿងតម្លៃ​ជាង១ម៉ឺនដុល្លា៕

----------------------------------------------------
ដោយ៖ វិន ជីវ័ន្ត - ភ្នំពេញ ថ្ងៃទី២៤ ខែមិថុនា ឆ្នាំ២០១៣
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ