ក្រុមប៉ារីសប្រកាសជាផ្លូវការ ប្លង់ជាគ្រូបង្វឹក ឯក្រុមរៀលប្រកាសអង់សេឡូទី
ជារឿងដែលគេដឹង និងទន្ទឹងរងចាំមកមួយរយៈពេលមកហើយ ... ហើយឥឡូវនេះ ត្រូវបានប្រកាសជាផ្លូវការ។
«ក្រុមបាល់ទាត់ ប៉ារីស ស៊ាំងហ្សែរម៉ាំង (Paris Saint-Germain) មានសេចក្ដីសប្បាយរីករាយ នឹងប្រកាសពីការមកដល់ របស់ ឡូរ៉ង់ ប្លង់ (Laurent Blanc) ជាគ្រូបង្វឹករបស់យើងសម្រាប់រយៈពេលពីរឆ្នាំ។» នេះជាសេចក្ដីប្រកាសឲ្យដឹង កាលពីថ្ងៃអង្គារនេះ ដោយក្រុមបាល់ទាត់ នៃទីក្រុងប៉ារីស។ ក្រុមដែលជាម្ចាស់ជើងឯកក្នុងឆ្នាំកន្លងទៅនេះ បានបន្ថែមទៀតថា «ឡូរ៉ង់ ប្លង់ នឹងស្ថិតនៅជាមេដឹកនាំក្រុមកីឡា ជាមួយនឹងការងាររបស់គាត់ ចាប់ពីថ្ងៃហ្វឹកហាត់ទី១ ខែកក្កដានេះតទៅ»។
លោកឡូរ៉ង់ ប្លង់ អាយុ៤៧ឆ្នាំ ធ្លាប់ជាគ្រូបង្វឹងតែក្រុមបាល់ទាត់នៃទីក្រុងប៊កដូ មួយគត់ មុននឹងលោកត្រូវក្លាយជាគ្រូបង្វឹកឲ្យក្រុមជម្រើសជាតិបារាំង នៅឆ្នាំ២០១០ មកទល់ឆ្នាំ ២០១២។ តាំងពីនោះមក លោកប្លង់ មិនបានចូលទៅបង្ហាត់ឲ្យក្រុមណាផ្សេងនោះឡើយ រហូតមកដល់ពេលនេះ ដែលលោកនឹងត្រឡប់មកកាន់ការ ឲ្យក្រុមប៉ារីសនេះ។ ក្រុមប៉ារីស បានបន្ថែមថា «លោកនឹងបន្តកិច្ចការ ដែលក្រុមបានទទួលរួចហើយ កាលពីឆ្នាំកន្លងទៅ ព្រមទាំងដឹកនាំក្រុមបាល់ទាត់ ឆ្ពោះទៅការប្រកួតធំៗ ដើម្បីដណ្ដើមពានរង្វាន់កម្រិតអ៊ឺរ៉ុប»។
នេះគ្រាន់តែជាសេចក្ដីប្រកាសព័ត៌មាន របស់ក្រុមបាល់ទាត់ប៉ុណ្ណោះ តែនៅមិនទាន់មាន ការធ្វើសន្និសិតសារព័ត៌មានណាមួយនោះនៅឡើយ ក្នុងការប្រកាសជាផ្លូវការនេះ។ គេក៏មិនបានឃើញការប្រកាសណាមួយ ទាក់ទងនឹងការបិតបញ្ចប់ នូវរេជ្ជកាលរបស់គ្រូបង្វឹកមុន លោក កាឡូ អង់សឺឡូទី (Carlo Ancelotti) នោះដែរ។ ប៉ុន្តែដំណឹងចេញពីប្រទេសអេស្ប៉ាញ បានឲ្យដឹងថា លោកអង់សេឡូទី ក៏ទើបនឹងត្រូវបានក្រុមបាល់ រៀល ម៉ាឌ្រីដ (Real Madrid) ប្រកាសជាផ្លូវការនូវមុខតំណែងរបស់លោក ជាគ្រូបង្វឹកប្រចាំក្រុម សម្រាប់រយៈពេល៣ឆ្នាំនោះដែរ។
លោក អង់សឺឡូទី នឹងត្រូវទៅជំនួសតំណែងរបស់លោក ហ្សូសេ មូរីញ៉ូ ដែលបានចេញទៅធ្វើជាគ្រូបង្វឹក របស់ក្រុមឆែលស៊ី នៅអង់គ្លេស។ នៅក្នុងសេចក្ដីប្រកាសព័ត៌មាន ក្រុមបាល់ទាត់នៃទីក្រុងម៉ាឌ្រីដប្រទេសអេស្ប៉ាញ មិនបានបញ្ជាក់ពីទឹកប្រាក់ដែលក្រុមខ្លួន ត្រូវចំណាយទៅឲ្យក្រុមប៉ារីស ដើម្បីឆក់យកលោកអង់សឺឡូទី មកទាំងនៅក្នុងកិច្ចសន្យានោះទេ៕
-------------------------------------------------
ដោយ ៖ ឈូករ័ត្ន - ប៉ារីស ថ្ងៃទី២៥ ខែមិថុនា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ